Преподо́бнаго Рема́кля, Апо́стола Арде́ннскаго

Моли́тва:

О пречу́дне и богоно́сне о́тче Рема́кле, земли́ Арде́ннския равноапо́стольный просвети́телю и Та́ин Бо́жиих ве́рный служи́телю. От ю́ности Христа́ еди́наго возлюби́вый и вся блага́я ми́ра презре́в, во оби́тели святы́я всели́выйся, иде́же и́ноческаго жития́ наста́вник яви́лся еси́, уста́вом твои́м бра́тию послуша́нию, рассужде́нию духо́вному и смире́нию научи́вый. Научи́ же и нас во братолю́бии пребыва́ти и у́мнаго де́лания прича́стниками бы́ти, коего́ждо в том зва́нии в не́мже по во́ли Бо́жией тружда́емся. О́тче святы́й, от оби́тели своея́ повеле́нием госуда́ревым разлуче́нный, ты и́мже во главе́ сове́тников и ста́рцев людски́х поста́влен был еси́, во е́же суд и пра́вду твори́ти, и на сем по́прище па́че пра́вды сострада́ние возлюби́в, жестоковы́йного госуда́ря суд на ми́лость преклоня́л еси́, целому́дрием и воздержа́нием любостра́стие све́та посрамля́я. Бу́ди моли́твенник о прави́телях страны́ на́шея, вразумля́я их зако́нами челове́ческими зако́ны Бо́жии не попира́ти, научи́ нас немощны́х посреди́ ми́ра и всей я́же в ми́ре по́хоти оче́с и го́рдости жите́йской дух трезве́ния стяжа́ти, и я́коже ты гото́выми бы́ти утеше́ние оста́вив, во́ле Бо́жией после́довати на путя́х тя́гостных и благоче́стию проти́вных. О свя́тче Бо́жий, ю́ного госуда́ря Сигебе́рта во благоче́стии христиа́нстем наста́вник яви́выйся, и того́ к попече́нию о созида́нии оби́телей же и хра́мов святы́х подви́гнувый, моли́ся о ча́дех на́ших во е́же им целому́дрие храни́ти и ре́вностью к слу́жбе Бо́жией не оскудева́ти. О чудотво́рче святы́й, зверонра́вному во́лку за́вистию диа́вола осля́ исхити́вшему, оби́тели твое́й в ме́сто осла́ о́наго служи́ти повеле́вый, ра́йское е́же со зверми́ ку́пно житие́ прообразова́л еси́. Преклони́ сердца́ на́ша к бра́тиям ме́ньшим, грехо́м прароди́тельским от прича́стия блаже́нныя жи́зни в саду́ еде́мском отри́нутым, и на́ши бесслове́сныя и зверонра́вныя стра́сти плотски́е ра́зуму со́вести покори́ во е́же не попира́ти нам естество́ на́ше, но ко благо́му направля́ти. О пустыннолю́бче преди́вный, от трудо́в теле́сных в сокрове́нном богомы́слии упокое́ние обрета́вый, и па́че всего́ пусты́нное житие́ возлюби́вый, в пеще́рах нерукотворе́нных страны́ Конгидуну́мския подвиза́лся еси́, и я́коже в черто́гах ца́рских та́мо самого́ Царя́ Христа́ в Бескро́вней Же́ртве невид́имо дориноси́ма лицезре́вый. Помози́ и нам в боре́нии с по́мыслами не ослабева́я побежда́ти все прило́ги диа́вольския, ум наш в серде́чную хра́мину низводя́ и горе́ отоню́ду же по ле́ствице небе́сней воздвиза́я. О́тче преди́вный, ко благода́ти свяще́нства сугу́бую благода́ть епи́скопства приложи́вый, во смире́нии твое́м жезл святи́тельский прия́л еси́, и не то́кмо ду́хом, но и зва́нием апо́стол яви́выйся, ста́до твое́ слове́сное упа́сл еси́, и́дольския ка́пища сокруши́вый, и от язы́ческого суему́дрия гра́ды и ве́си отвраща́я, ко Христу́ лю́ди твоя́ приводи́л еси́. Сподоби́ и нас теплохла́дностию уя́звленных огнь ре́вности апо́стольския в себе́ твои́ми моли́твами возжига́ти посреди́ идолопокло́нства дней на́ших е́же многообра́зно льсти́выми и лжи́выми словесы́ от безбо́жник я́коже и́стинное поклоне́ние челове́ку нарица́ется. Явле́нием А́нгела о жела́нии врага́ дре́вняго диа́вола е́же храм оби́тели ставло́тския скало́ю сокруши́ти пре́жде да́же освяти́тися ему́ предупрежде́нный, ду́хом не уныва́л еси́, отца́ лжи простото́ю голуби́ною и му́дростию зми́евою посра́мил еси́, тому́ я́коже пу́тнику я́вльшемуся виде́ние до́лгаго пути́ истопта́нием о́буви монасты́рския показа́вый и бе́са тем в уны́ние пове́ргнувый. Сподо́би и нас предста́тельством твои́м ко́зни диа́вольския до вре́мени распознава́ти и не то́кмо доброде́телями и́хже не и́мамы, но и хи́тростию врагу́ противоста́ти и реши́мость же к тому́ непоколеби́му во Христе́ Иису́се укрепля́ющем нас стяжа́ти. С ним же в незаходи́мой сия́еши славе, во Ца́рстве Отца́ и Сы́на и Свята́го Ду́ха во ве́ки веко́в. Ами́нь.