Служба Порт-Артурской иконе Божией Матери, именуемой «Торжество Пресвятыя Богородицы»

На вечерни

На Господи, воззвах: стихиры, глас 8:

Тя, Мати Божия, хвалим: избранную Приснодеву от Превечного Отца исповедуем, Тебе все Силы Небесныя служат: преславный апостольский лик яко Матерь Творца восхваляет, множество мученик Богородицу величают, девственные полцы своего девства образ проповедуют, вси святии Царицей Небеси и земли нарицают, святая церковь верных христиан по всей вселенней исповедует, истиннаго Царя Небеснаго Богоизбранную Отроковицу.

Ангелов Госпоже и всех святых славо, приими приносимое Тебе благодарение: радуйся, Царя Славы Прекрасный Чертоже, радуйся, райская отверстая дверь, радуйся, лествице Царствия Небеснаго, радуйся, нетленный ковчеже благодати, радуйся, бездно щедрот, радуйся, прибежище грешных, радуйся, Обрадованная Мати, с Тобою Господь.

О Прещедрая милости Мати, не остави благодатию Твоею всех, призывающих во истине и служащих иконе Твоей: в уединении сущим буди утешением, во искушениях – прибежищем, покрый нас кровом крилу Твоею, и отжени всякаго врага и супостата и научи что подобает творити, да спасемся.

Радуйся, яко все естество Ангельское днесь похвальная приносит Тебе истинней Божией Матери и Заступнице всех, притекающих к иконе Твоей, ведуще, яко несокрушимым Покровом Твоим, праведных возвеселяеши, грешных вразумляеши, бедствующим помогаеши, и молишися о всех верных.

Другие стихиры, глас 5:

Яко Царскою порфирою и виссом, иконою Твоею, Богородице, Церковь Божия просветившеся, красуется чудесы, днесь обретением вся созывает праздновати, паче сияния солнечнаго, благодатию Святаго Духа блистающеся, Убрусом Сына Своего землю нашу покрывающая, в вере и надежде всех призывающих спасающая, яко скорая Помощница.

Преславная глаголашася о Тебе, о священнейший храме и раю словесный, премилосердная Богородице Марие: даяние благодати Твоея просвещает разум, источник благостыни напояет жаждущия, ангельский зрак лица Твоего отвлекает от греха, покланятися Тебе, есть корень блаженнаго безсмертия, и прославляти силы Твоея, есть путь спасения.

Преукрашенная во веки и всеми благословенная Приснодево Богородице Марие, невместимаго Бога во утробе вместила еси, и Духа Святаго смиренно прияла еси, рождеством Сына Своего, Спаса миру явила еси, и всея вселенныя Мати странно показалася еси, Тебе прилежное моление наше приносим: возбуди в сердцах наших желания небесныя, и исполни духом сладости райския.

Достойно славимая и праведно от горних чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная, Пресвятая Богородице Марие, кую достойную похвалу величию Твоему возможем принести, токмо молим Тя смиренно, сохрани землю нашу от навет вражиих и клевет, и спаси души наша.

Слава, и ныне, глас 1:

Придите празднолюбцев собори, возрадуемся торжеству Богоматере, и притецыте к тихому и пречудному почитаемому Ангелы, честному образу поклонимся, дарует бо верным Богородице, обильныя дары от источника святыя иконы благодать источающе, милостиво избавляет от искушений и бед и всякаго греха, благочестно и богоприятно поющих, и чтущих святую икону Твою, Той припадающе воззовем: помилуй нас Владычице, и приведи к отечеству любви вечныя.

На литии стихиры, глас 2:

Киими похвальными венцы увязем Матерь Божию, яко показалася Гора еси великая и преславная, паче горы Синайския, Богородице, она бо, не терпяще снития славы Божия во образех и сенех, огнем возгорашеся и громи и молнии тамо быша. Ты же Божественный Огнь, во чреве Твоем неопально носила еси, и от сосец Своих Божие Слово млеком питала еси, и ныне Матернее дерзновение к Нему имуще, помози, Владычице, верно празднующим Твой честный праздник, и не забуди милостивно посещающи покрывати христоименитое стадо, рабы Твоя.

Киими песненными пении похвалим Богородицу, яко воистину пречестнее древняго кивота явися, ныне пречистая Твоя икона, ейже предстоят архиереи и иереи, с Чинми Ангел, и все христоименитых людей множество, достойно блажат Тя, Матерь Божию, и поклоняются и молятся Тебе по Бозе, да умириши мир и утвердиши отечество в православии, и спасеши от всех зол рабы Твоя, яко Едина Благословенная.

Слава, и ныне, глас 6:

Днесь тварь просвещается, днесь всяческая веселятся, Небесная вкупе и земная, Ангели и человецы смешаются, идеже бо Царицы пришествие празднуют, тецем убо к Ея пречудному образу и припадем спасения нашего Содетельнице, и воспоем Архангельский глас вопиюще: радуйся, благодатная, с Тобою Господь, и даждь нам с веселием в Раи наслаждатися.

На стиховне стихиры, глас 5:

Видимо пред Твоею иконою предстоят празднолюбных собори, невидимо Тебе живущей на Небеси, мнят предстояти и со благоговением молят Тя, Мати Божия, врагов видимых и невидимых избавити и даровати велии и богатыя милости.

Стих: Помяну имя Твое во всяком роде и роде.

Престол всезлатый Царя и Раю процветший показалася еси, Пречистая Владычице Богородице, Бога бо во чреве Твоем носивши, благовонствуеши нас божественными благодатьми, отонудужде вси Мати Божию проповедуем присно, подающую нам велию милость.

Стих: Слыши, Дщи, и виждь, и приклони ухо Твое.

Стену нерушиму и твердое основание, пристанище не бурное стяжавше Тя, Всепетая, в пучине страстей обуреваеми в благотишное заступление Твое прибегаем: низспосли нам мир и велию милость.

Слава, и ныне, глас тойже:

Воспоим людие светло Давидскую песнь Препрославленней Мати щедрот и человеколюбия, Богорадованней Отроковице и Владычице, рясно златыми одеянней и благоукрашенней Божественными благолепотами, Ей же со страхом все Силы Небесные служат и с веселием воспевают от песней Сионских, земнии же духом смиренно молятся, яко Всемощней Заступнеце, тьмы бед и скорбей избавляющая, и молящейся о спасении душ наших.

Тропарь, глас 4:

Днесь тожествует град Владивосток, и с ним сликовствуют вси пределы земли Дальнероссийския: сретая вновь обретенную икону Твою, Богомати, Порт-Артурскою нареченную, в благословение и знамение торжества христолюбивому воинству Дальней России дарованную, на ню же взирающе вси зовем: Русь Святая храни веру Православную, в ней же твое утверждение.

На утрени, тропарь трижды.

После первой кафизмы седален:

Да ликовствует светло верных множество, рыдает же демонское полчище, видяще многименныя сияюще праздники Божия Матери, ублажаему божественными песньми, идеже бо богоприятно славится Пречистая Владычице, Богоизбранная Отроковице, неприязни падения, христианом же крепкое утверждение.

Слава, и ныне:

Едина Бога без тления рождшая, к иконе Твоей прибегаем Богородице, со страхом и любовию взывающее: лютых врагов злодействия избави ны.

После второй кафизмы седален:

Предстоят Ти, Госпоже Богородице, пред пречистым Твоим образом архиереев сословие и вси людие, ведуще Тя, Помощницу сильну и непобедиму, моление Тебе приносити от всея души подвизаются, требующе Твоея помощи, да простреши Твоя богоносныя руки и умолиши за мир.

Слава, и ныне:

Радуйся Божественное Владыки пребывалище, славо Ангелов и человек упование, крепость в нуждах и твердое предстательство, утверждение и стено на Тя надеющихся, Благолюбивая Мати Бога человеколюбиваго, Того умоли даровати рабом твоим, мир и велию милость.

По полиелее седален:

Воистину паче ума Твоя дарования, ихже сподобляеши рабы Твоя, Богородице, под Твою матернюю милость и покров прибегающих, с верою и любовию на помощь Тя призывающих и благоговейно покланяющихся иконе Твоей, яко Взбранней Воеводе непобедимей и христолюбивых воев стене необоримей.

Слава, и ныне:

Славою божественною блистающая, едина яко Матерь Тя прославльшаго, славу вышнюю улучити нам, Дево, умоли Единаго Препрославленного.

Стихира, глас 6:

Се день избавления нашего наста и смерти пременение, радуйтеся днесь собори града Владивостока и вси пределы Дальнеросийстии, веселящеся торжествуйте, иже бо на нас подвигшеся, конечне богоранными язвами уязвившеся.

Канон, глас 4

Песнь 1

Ирмос: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Пресвятая Богородица, спаси нас.

Радостно Ти, Богородице, Ангели и вси святии честно служат, и блажат Тя Небесных Ходатаицу, купно же и земнороднии в веселии восхваляем Тя и усердно милости просим: озари наша сердца Владичице, песнь воспети Твоея иконы обретению.

Роди земнии стецемся, умы тайно очистивше, во Святую Церковь Матери Христа Бога нашего, к приснотекущему источнику святей иконе Твоей, Богородице, источает бо обильныя дары песнь верно вопиющим: радуйся, Балгословенная, из Тебе бо рождейся Бог наш.

Странное чудо вижу и преславное, Богородице: како Херувимского Творца зачала еси! Како Невместимаго Бога, во утробе вместила еси! Како Жизнь Сущую плотию облекла еси, и Спасителя всему миру родила еси, Бога купно и человека.

Под Твою милость прибегаем, вси роди человечестии, Богородице Дево, просвети нас светом Сына Твоего Христа Бога нашего, и молящихся и кланяющихся прилежно иконе Твоей, сохрани и спаси, Благая Заступнице.

Песнь 3

Ирмос: Твоя песнословцы, Богородице, живый и независтный источниче, лик себе совокупльшия духовно утверди в Божественней Твоей славе, венцев славы сподоби.

Кую достойную похвалу принесем неизреченней милости Твоей, Богородице, яко обретением Пречистыя Твоея Божественныя иконы, злочестивых сопостат поражаеши и отгоняеши, право славящих Тя спасаеши.

Божественное Твоея иконы обретение, яко светоносное нам возсия солнце, преславных чудес лучи испущаеши, тьму неверия и идолослужения благодатию Твоею просвещаеши, священными Твоими, Владычице, молитвами.

Древле исполнила благодати первописанную икону Твою, Богородице, та же и ныне благодать истинствует сиянием веры во иконе Твоей, к ней же вси с верою прибегающе благих прошений приемлем исполнение.

Радуйся Пресвятая Дево Марие, от Тебе Царь царствующих плоть восприяти изволи, Ты Ходатаице между Богом и человеки, Небо и земля Твоим благословенным Плодом примирены, испроси у Человеколюбца Бога нашим согрешениям прощение и от тления смертнаго спасение.

Седален:

Величия Твоя кто исповесть, Богородительнице, яко возвеселила еси души православных града Киева, в видении подвигла их к созиданию великаго Божия дара, причудней иконы Твоей, Богородице, и явила волю Свою быть защитницей христолюбивых воев Дальней России, от врагов защищая, иже по Бозе на Тя упование возлагающих, ныне же, Всемилостивая Владычице, не лиши нас Твоего заступления, спаси страну нашу православную от всякого зла, да Тобою хвалящеся не постыдимся во веки.

Песнь 4

Ирмос: Седяй в славе на престоле Божества, во облаце легце, прииде Иисус Пребожественный, нетленною дланию, и спасе зовущия: слава, Христе, силе Твоей.

Почтим людие непреложное ко Творцу ходатайство, Пречистую Деву Марию и пречудную Тоя икону, лобызающе со страхом припадающие молимся, возбуди нас помраченных от сна греховнаго, и от всякого обстояния милостивно избави.

Божественный пророк Аввакум, видя грядущаго от горы приосенныя, Бога, незаходящее солнце Спаса Христа, рождшагося от Девы, и убояхся, мы же со страхом лобызаем икону Твою, Владычице, душами купно и телеси освещаемся.

Божественным мановением явила волю Свою, Богородице, и некий списатель написует пречудную Твою икону, на руцех Твоих Святый Убрус Спасителя нашего изобразив, к ней же притекающия напастей и бед избавляеши, и вся покрываеши и спасаеши Твоею милостию.

Неискусобрачная Дево, Дщи Авраамова и Давидова, непреложное упование и Помощнице по Бозе, надежду нашего спасения возложихом на Тя, и смиренно молимся: одожди всем богатыя душеспасительныя милости.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога, и родила еси Безлетнаго Сына, всем воспевающим Тя мир подавающая.

Предрожаешей Небесной Маргарите, Приснодево Марие, всяко существо по достоянию недоумеет воспети Тя: паче Горних Чинов возвеличена еси, одесную неприступного Бога в ризах позлащенных и преиспещренных стоиши, к Тебе вопием из плачевной юдоли мира сего: не презри молений наших и даруй скорую Твою Помощь.

Идеже возблистает светлость благодати Твоея Владычице, страхом исчезают губителие демони и паутина злокозненных мечтаний их разрушается, радуется же христиан множество и песнь Тебе возносити подвизаются: радуйся, божественный Покрове душ наших.

Исайя божественный и чудный пророк издалеча провидя великое чудо, ликуя: се Дево име во чреве и роди Сына Эммануила, Бога же и человека, Восток имя Ему, Егоже величающее с Небесными вои Пречистую Матерь ублажаем.

О Пресвятая Владычице Богородице, милосердия сущи источник, верное упование и прибежище правоверных, киими псалмы и песни воспоем величия Твоя: Бога бо воплотившагося нас ради родила еси во спасение наше всемирное и избавление.

Песнь 6

Ирмос: Божественное сие и всечестное совершающе празднество, богомудрии, Богоматере, приидите руками воеплещим, от Нея рождшагося Бога славим.

Творец и Избавитель наш Господь, из Твоих ложесн прошед, Пречистая, оболкийся, распныйся и погребыйся за ны неблагодарныя и врата адовы Воскресением сокрушил еси. Темже мы, яко Всемилостивой Матери Божией немолчно вопием: свободи нас от работы вражия и управи ко спасению, яко Ты вся можеши хотяй.

Пребеззаконныя на имя Твое хулу возносят, Святейшая Царице, дивные чудеса Твоя мнят быти измышлены, мы же исповедуем превелии милости и чудеса Твоя, и прибегаем к святей иконе Твоей, яко Всемощней и Скорей Заступнице.

Идеже прославляется святое имя Пречистой Владычице, тамо всяческих благих источницы проливаются: Даров Святаго Духа вернии исполняются, грехов прощение, болезней исцеление и душ спасения сподобляются, от поднебесной злобы и хищных рук избавляются святыми Твоими предстательствы, Владычице.

Ты еси крепость наша, похвало и радование, неусыпаемая хранительнице и заступнице по Бозе, верное прибежище и предстательство непостыдное, покров страны Российския, Пречистая Владычице, со всеми святыми моли спасти рабы Твоя.

Кондак, глас 8:

Избранней от всех родов Заступнице нашей и Царице, / покровом Своея благости покрывающей пределы земли Дальнероссийския, / благодарственная пение приносим Ти раби Твои, Богородице. / Ты же яко Всемилостивая Владычице, / от всяких нас бед спаси и вечных мук свободи, да радующеся зовем Ти: / Радуйся, Царице Препрославленная, // пределы Дальнероссийския земли (всех концев земли) милостию Своею не оставляющая.

Икос:

Возсияла яко Вифлеемская звезда, пречудная Твоя икона, Богородице, град Владивосток и пределы Дальней России светом Христовым озаряюще, от бесстуднаго лица адского врага и споспешников его защищающе. Благопоспеши, Премилосердная Мати, обуреваемым в океане суетнаго мира сего спасением Твоим: помози беспомощным, утеши плачущих, возвесели скорбящих, Ты бо еси Живоносный милостей источник с верою и молитвами к Тебе прибегающим.

Песнь 7

Ирмос: Не послужиша твари, богомудрии паче Создавшаго, но огненное прещение мужески поправше, радовахуся, поюще; препетый отцев Господь и Бог, благословен еси.

Радуются и веселятся вернии людие, пречудному обретению иконы Пречистыя Владычице, моляся и коленопреклоняяся пред Святым изображением Лица Ея, возводя ум на первообразное, дондеже обрящем милости Ея, во благовременную помощь к наследию Небеснаго Обетования.

Рече безумный враг в сердце своем: низложу Православную Россию, храмы и обители ея разрушу, и вложу дух лживый во уста и сердце верных христиан. Ускори, Владычице, и избави нас от сети ловящих и сокруши годыню их и спаси предстательством Твоим к Сыну Твоему верно вопиющих: отец наших Боже, благословен еси.

Неусыпную и богоприятную имуще, Пречистая, молитву и нерушимую крепости державу, врагов наших дерзость разори, и выя их под нозе христолюбивым воем нашим низложи, да возвеселимся о Тебе, раби Твои, Сыну Твоему Спасителю вопиюще: отец наших Боже, благословен еси.

Пространнейший дворе и пресветлейшая палато, Марие, Мати Христа Бога нашего, непостижим есть образ, Дево, зачатия Твоего, зачатие без семени, Рождество без мужа, Бесплотный воплотися от Тебе, Сын Божий Спаситель мира, Емуже вопием: отец наших Боже, благословен еси.

Песнь 8

Ирмос: Отроки благочестивыя в пещи рождество Богородицы спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите Его во вся веки.

Чистейшая Святаго Духа приятелище и непорочное Бога Слова вместилище, Пресвятая Мати и Приснодево Марие, радость Ангелов и человеков, сладчайшего Иисуса Христа от Духа Святаго плотию родила еси, Егоже ужасается тварь и трепещут Горнии Силы непрестанно вопиюще: Свят, Свят, Свят еси, Боже препетый и превозносимый во веки.

Бог богов через Архангела Гавриила, Марии возвещая: радуйся вместилище Невместимаго Царя, радуйся, Благодатная, носило Божества, радуйся, Адамово воззвание, с Тобою Господь, и Тебе ради с нами спасая нас. Егоже поем и превозносим во веки.

Ты похвала христианом еси, Владычице, непобедимое Оружие, нерушимая Стено, к Тебе прибегающим, Тя ныне на помощь призываем: не даждь врагом вознестися на люди Твоя, и иже не хвалят Бога нашего, и Твоей иконе не кланяются, сих победи и спаси души наша.

Благоукрашенный Доме непостижимаго Царя, церковное незаходимое и лучезарное Светило, пречудная Твоя икона, Богородице явися: тихое пристанище обуреваемым, плачущим и скорбящим райское утешение и правоверным христианом спасение.

Песнь 9

Ирмос: Всяк земнородный да взыграется, духом просвещаем, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная, Богородице Чистая Приснодево.

О Свете Небесным Светом осиянный, Царице Преблагая, лик пророческий многообразно провозвещает и воистину Тя нарицает: Пространнейшую Небес и Скрижаль Богописанную, Сень святую и Купину Неопалимую, Гору же и Лествицу и Жезл процветший, мы же Тя воистину, Богородицу, величаем.

Бог ста в сонме богов: от высочайшего благоволения Его, яко райский Цвет произыде Матерь Божия, приидите и припадите к стопам Ея, вси любящии и почитающии Ю, Она бо есть Источник Вечной Жизни, туне напояет жаждущия, и пиющии от Сего не вжаждут во веки.

Утро таинственное явилася еси, Приснодево Марие, пречистая Твоя икона во мраке отчаяния седящим, демонов прогоняет и лица нечестивых омрачает, не терпят бо взирати на силу Ея, бегают же и исчезают, мы же просвещшися, икону Твою лобызаем, да Тя, Богородице, величаем.

Спасительное пристанище и непреложное христиан упование! Недоумеет всяк ум по достоянию воспети Тя, Мати Божия: всея твари честнейши воистину показалася еси, Творца всяческих и Пищедателя родила и млеком от сосец питала еси, ныне приими прилежно возносимую Тебе песнь и спасай нас всегда, на Тя бо надеемся.

Светилен:

Икону Твою всечестную, в залог благоволения Твоего, верному воинству Дальней России даровала еси, Владычице, покрывая и сохраняя ю от нашествия вражия на Тя уповающия: о Мати Царя Христа Бога, буди и нам грешным прибежище спасения в нечаянных бедах, и Ходатаице вечныя жизни.

Слава и ныне:

Приидите, почепем отпущения от неистощимаго Источника, точащаго Святыню, Пречистыя Девы Марии, Жизнь сущую рождши, Христа Бога нашего, райских дверей отверзение и всего мира спасение. Сей есть пророки глаголавый, Тому поклонимся, Богу и Спасу душ наших.

На хвалитех стихиры, глас 6:

О, благосердаго Твоего промышления о нас, Владычице, в годину бед и обстояний, егда бяху наитие варваров на земли Дальней России, победный образ Твой, посылаеши Христолюбивым воем в помощь и защиту, но за неверие в предстательство Всесильной Заступницы, прелживыя агаряне плениша икону Твою и покориша Квантунскую волость. Ныне же Русская Земля Божиею милостию растет и укрепляется, и молитвами Твоими Христова Церковь возвышается. Темже проповедуем милости Твоя к роду христианскому и песньми хвалебными Тя величаем и ублажаем.

О великия благости и неисчетнаго милосердия Твоего о нас, Богородице, удивляеши нас преславными чудесы: от восток бо до запад прехвально Имя Пречистой Владычицы, всю Россию покрыла многоименными иконами Своими: днесь обретения празднует Твоего образа град Владивосток, и вси пределы Дальней России сликовствуют: яко обрели скорую всяческих благ Подательницу, от запинаний адскаго врага спасения и от вечнаго огня избавление, да Тя достодолжно песньми почитаем и ублажаем.

Слава и ныне, глас 1:

О Чудо чудес, Богоневестная Мати и Дево: чудотворити не престаеши и ныне, отраду и утешение от образа Твоего даруя странником земным, во юдоли многоскорбнаго сего мира: из Тебе бо воплотися Обновитель падшего естества человеча, Сый Бог наш, даровавый нам Тебе в покров и защиту, иже слышит молитву Твою за нас приносимую, и преклоняются Твоему матернему за нас молению, егда умоляеши Его за люди согрешившия. Темже не престай, Благосердая Владычице, предстательствовати за нас, чтущих Тя, да Тя, Ходатаицу спасения нашего, почитаем и ублажаем.