В 1-й день нача́ло Инди́кта, си́речь Но́ваго ле́та; И па́мять преподо́бнаго отца́ на́шего Симео́на Сто́лпника и архимандри́та; и святы́х му́чениц 40 жен.

Ве́чер, Блаже́н муж, 1 антифо́н: а́ще же в суббо́ту, стихологису́ем кафи́зму всю. На Го́споди, воззва́х, поста́вим стихо́в 10, и пое́м стихи́ры инди́кта 3. Глас 1. Подо́бен: Небе́сных чино́в:

Самосло́внаго и Боже́ственнаго уче́ния Христо́ва, / моли́тве научи́вшеся, / на всяк день возопии́м Зижди́телю: / О́тче наш, И́же на Небесе́х обита́яй, / насу́щный хлеб подава́й нам, / презира́я на́ша прегре́шения.

И́же на Сина́йстей горе́ скрижа́ли написа́в иногда́, / Сам и ны́не во гра́де Назаре́те по пло́ти / кни́гу прия́л еси́ проро́ческую почести́, Христе́ Бо́же, / и сию́ согну́в учи́л еси́ лю́ди / испо́лнитися Писа́нию о Тебе́.

Я́коже евре́ев телеса́ в пусты́ни иногда́, / не покори́вшихся и́стинно Тебе́ всех Влады́це, досто́йно падо́ша: / та́ко и ны́не ко́сти разсы́пли, злочести́вых и неве́рных ага́рян, / псало́мски, при а́де Христе́.

И́ны стихи́ры преподо́бному, глас 5. Подо́бен: Преподо́бне о́тче:

Преподо́бне о́тче, / а́ще бы возмо́жно столпу́ веща́ти, / не бы преста́л вопи́ти твоя́ боле́зни, труды́ и рыда́ния. / Но он носи́мь бя́ше, не́же ноша́ше я́ко дре́во напая́емо слеза́ми твои́ми, / удиви́шася а́нгели, учуди́шася челове́цы, / устраши́шася де́мони терпе́ния твоего́, Симео́не преподо́бне, / моли́ спасти́ся душа́м на́шым.

Преподо́бне о́тче, / си́лою Боже́ственнаго Ду́ха, Влады́це Твоему́ подо́бяся, / на столп вшел еси́ я́ко на Крест. / Но Он рукописа́ние всех растерза́, / ты же воста́ния страсте́й разруши́л еси́. / Он я́ко овча́, ты же я́ко заколе́ние. / Он взы́де на Крест, ты же на столп, Симео́не преподо́бне, / моли́ спасти́ся душа́м на́шим.

Преподо́бне о́тче, / те́ло омочи́в слеза́ми, и ду́шу очи́стив, на высоту́ возше́л еси́ доброде́телей; / чу́вственное у́бо жили́ще име́я столп твой, / мы́сленный же и небе́сный град го́рний Сио́н, / А́нгелы удиви́л еси́, челове́ки ужаси́л еси́, / де́моны посрами́л еси́, доброде́тельми твои́ми, Симео́не преподо́бне, / моли́ спасти́ся душа́м на́шым.

Други́я стихи́ры свята́го, глас 2, самогла́сны:

От ко́рене блага́го благи́й прозябе́ плод, / от младе́нства свяще́нный Симео́н, благода́тию па́че, не́же млеко́м воспита́н, / и на ка́мень те́ло возвы́сив, к Бо́гу же превозвы́сив ра́зум, / небе́сное созда́ доброде́тельми жили́ще, и с Боже́ственными си́лами лико́вне ше́ствуя, / Христа́ бысть жили́ще Бо́га и Спа́са душ на́ших.

Па́мять твоя́ во век пребыва́ет, преподо́бне о́тче Симео́не, / и кро́тость се́рдца твоего́, уго́дниче Христо́в блаже́нне: / а́ще бо и преста́вился еси́ от на́с, па́стырю до́брый, / но не отступа́вши от нас ду́хом, / в любви́ Бо́гу предстоя́, и со а́нгелы лику́я на небесе́х. / С ни́миже моли́, спасти́ся душа́м на́шым.

Киприа́ново:

Моще́й твои́х ра́ка, всехва́льне о́тче, источа́ет исцеле́ния, / и свята́я твоя́ душа́ со а́нгелы совоку́пльшися, досто́йно ра́дуется. / Име́я у́бо ко Го́споду, преподо́бне, дерзнове́ние, / и со безпло́тными лику́я на небесе́х. / С ни́миже моли́, спасти́ся душа́м на́шым.

Ге́рманово:

Возлюби́л еси́, Богоно́се, го́рнейшее любому́дрие, / и вне ми́ра был еси́, живы́й вы́шше ви́димых, / и зерца́ло нескве́рно Бо́жие, Боже́ственно показа́лся еси́, / и сый при́сно соединя́яся Све́ту, Свет приима́л еси́, / и ясне́йший, блаже́нне, получи́л еси́ коне́ц. / Моли́ся о душа́х на́ших, му́дре Симео́не.

Сла́ва, глас 6, Ге́рманово:

Боже́ственная благода́ть осеня́ет ра́ку моще́й твои́х, освяще́нный Симео́не: / те́мже и в воню́ ми́ра чуде́с твои́х притека́юще, / неду́гов исцеле́ние почерпа́ем. / Но, о́тче преподо́бне, Христа́ Бо́га моли́ о душа́х на́ших.

И ны́не, инди́кта, глас то́йже.

Византи́ево:

И́же со Ду́хом Святы́м соедине́н, Безнача́льне Сло́ве и Сы́не, / всех ви́димых и неви́димых Соде́телю и Зижди́телю, / вене́ц ле́та благослови́, сохраня́я в ми́ре правосла́вных мно́жества, / моли́твами Богоро́дицы, и всех святы́х Твои́х.

Та́же вход, проки́мен дне, и чте́ния

Проро́чества Иса́ина чте́ние (глава́ 61):

Дух Госпо́день на Мне, / Его́же ра́ди пома́за Мя, благовести́ти ни́щым посла Мя, исцели́ти сокруше́нныя се́рдцем, пропове́дати пле́нником отпуще́ние, и слепы́м прозре́ние, / пропове́дати ле́то Госпо́дне прия́тно, / и день воздая́ния Бо́га на́шего, уте́шити вся пла́чущыя, / да́ти пла́чущым Сио́н, сла́ву вме́сто пе́пела, / помаза́ние весе́лия пла́чущым: / одея́ние сла́вы, вме́сто ду́ха уны́ния, / и нареку́тся ро́ди пра́вды, насажде́ние Госпо́дне в сла́ву. / И сози́ждут пусты́ни ве́чныя, запусте́вшыя пре́жде воздви́гнут, / и обновя́т гра́ды пусты́я, запусте́вшыя от ро́да в род. / И прии́дут иноро́днии, пасу́ще о́вцы Твоя́, / и иноплеме́нницы ра́таи, и виногра́дари ва́ши. / Вы же свяще́нницы Госпо́дни нарече́теся, / служи́телие Бо́га ва́шего. / Рече́тся вам: кре́пость язы́ков поя́сте, / и в бога́тстве их чу́дни бу́дете, / вме́сто стыде́ния ва́шего сугу́баго, и вместо срамоты́, / возра́дуется часть их. / Сего́ ра́ди зе́млю свою́ втори́цею насле́дят, / и весе́лие ве́чное над главо́ю их: / Аз бо есмь Госпо́дь любя́й пра́вду и ненави́дяй хище́ния от непра́вды. / И дам труд их пра́ведником, и Заве́т ве́чен завеща́ю им. / И позна́ется во язы́цех се́мя их, и вну́цы их посреде́ люде́й. / Всяк ви́дяй их, позна́ет я, я́ко сии́ суть се́мя благослове́нное от Бо́га, / и весе́лием возвеселя́тся о Го́споде.

Леви́тских книг чте́ние (глава́ 26):

Глаго́ла Го́сподь сыно́м Изра́илевым глаго́ля: / а́ще в повеле́ниих Мои́х хо́дите, / и за́поведи Моя́ сохраните́, и сотворите́ я: / и дам вам дождь во вре́мя его́, и земля́ даст рожде́ния своя́, / и дре́ва по́льная отдадя́т плод свой. / И пости́гнет вас млаче́ние, обра́ние вина́, / и вина́ обра́ние пости́гнет се́ятву, / и сне́сте хлеб ваш в сы́тость, и всели́теся с тве́рдостию на земли́ ва́шей. / И дам мир в земли́ ва́шей, и у́спнете, / и не бу́дет вас устраша́яй. И погублю́ зве́ри лю́тыя от земли́ ва́шея, / и брань не про́йдет сквозе́ зе́млю ва́шу. / И пожене́те враги́ ва́ша, и паду́т пред ва́ми убие́ни. / И пожене́те пять из вас сто, и сто вас пожене́те тмы. / И паду́т врази́ ва́ши пред ва́ми мече́м. / И при́зрю на вы, и возблагословлю́ вы, и возращу́ вы, и умно́жу вы, / и положу́ заве́т Мой с ва́ми. / И сне́сте ве́тхая, и ве́тхая ве́тхих, и ве́тхая от лица́ но́вых изнесе́те. / И положу́ заве́т Мой в вас, и не возгнуша́ется душа́ моя ва́ми. / И похожду́ в вас, и бу́ду вам Бог, и вы бу́дете Мне лю́дие. / А́ще же не послу́шаете Мене́, ниже́ сотвори́те повеле́ний Мои́х сих: / Но ни покори́теся им, и суде́б Мои́х вознегоду́ет душа́ ва́ша, / я́коже вам не твори́ти всех за́поведей Мои́х, и я́ко разори́ти заве́т Мой. / И Аз сотворю́ си́це вам: / наведу́ на вы ску́дость, и се́ете вотще семена́ ва́ша, / и изъядя́т труды́ ва́ша проти́внии ва́ши. / И поста́влю Лице́ Мое́ на вы, и паде́те пред враги́ ва́шими, / и пожену́т вы ненави́дящий вас, и побе́гнете никому́же гоня́щу вас. / И сокрушу́ досажде́ние горды́ни ва́шея: / и положу́ не́бо вам я́ко желе́зно, и зе́млю ва́шу я́ко медя́ну. / И бу́дет вотще́ кре́пость ва́ша, и земля́ ва́ша не даст се́мене своего́, / и древа́ се́лная не дадя́т плода́ своего́. / И послю́ на вы зве́ри ди́вия земны́я, и поядя́т вас, и потребя́т скоты́ ва́ша, / и ума́лены сотворю́ вы, и погу́бит вы находя́й мечь. / И бу́дет земля́ ва́ша пуста́: / и дворы́ ва́ши бу́дут пу́сты, / я́ко вы хо́дисте ко Мне страно́ю, и Аз пойду́ к вам в я́рости страно́ю: / глаго́лет Госпо́дь Бог Святы́й Изра́илев.

Преподо́бнаго:

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет: / ста́рость бо честна́, не многоле́тна, ниже́ в числе́ лет исчита́ется. / Седина́ же есть му́дрость челове́ком, и во́зраст ста́рости, житие́ нескве́рно. / Благоуго́ден Бо́гу быв, возлю́блен бысть: / и живы́й посреде́ гре́шников преста́влен бысть, / восхи́щен бысть, да не зло́ба измени́т ра́зума его́, или́ лесть прельсти́т ду́шу его́. / Раче́ние бо зло́бы помрача́ет до́брая: / и паре́ние по́хоти пременя́ет ум незло́бив. / Сконча́вся вма́ле, испо́лни ле́та до́лга: / уго́дна бо бе Го́споду душа́ его́: / сего́ ра́ди потща́ся от среды́ лука́вствия. / Людие же ви́девше, и не разуме́вше, / ниже́ положи́вше в помышле́нии таково́е: / я́ко благода́ть и ми́лость в преподо́бных Его́, / и посеще́ние во избра́нных Его́.

На стихо́вне стихи́ры инди́кта, глас 1. Самогла́сны. Иоа́нна мона́ха:

Наста́ вход ле́та, созыва́ющ почита́ти Того́ просвеща́ющыя, / Калли́сту, Ево́да, и Ермоге́на, самобра́тныя страда́льцы: / Симео́на равноа́нгельнаго, и Иису́са Нави́на: / и́же во Ефе́се седмочи́сленныя о́троки: / и четверодесятосве́тлый святы́х жен лик. / И́хже па́мятем приобща́ющеся празднолю́бцы, возопии́м благоче́стно: / Го́споди, благослови́ дела́ рук Твои́х, / и сподо́би ны до́бре прейти́ ле́та обхожде́ние.

Стих: Тебе́ подоба́ет песнь, Бо́же, в Сио́не, / и Тебе́ возда́стся моли́тва во Иерусали́ме.

Христе́ Бо́же наш, / И́же му́дростию вся соде́явый, / и из не су́щих во е́же бы́ти приве́дый, / благослови́ вене́ц ле́та, и гра́ды на́ша сохраня́й невре́дны, / и ве́рныя лю́ди си́лою Твое́ю возвесели́, / побе́ды дая́ на сопоста́ты, Богоро́дицы ра́ди да́руя ми́ру ве́лию ми́лость.

Глас 2. Стих: Испо́лнимся во благи́х до́му Твоего́, / свят храм Твой ди́вен в пра́вде.

Киприа́ново:

Ди́вен еси́ Бо́же, и чу́дна дела́ Твоя́, / и путие́ Твои́ неизсле́дими: / еси́ бо му́дрость Бо́жия, и Ипоста́сь соверше́нна, и си́ла: / Собезнача́лен же и соприсносу́щен: / и соде́тельною всеси́льною вла́стию в мир прише́л еси́, ища́ е́же удобри́ти созда́ние Твое́, / неизрече́нне от неискусому́жныя Ма́тере, не превраще́н Божество́м, / завеща́в уста́вы и ле́та во спасе́ние на́ше неизме́нне. / Сего́ ра́ди вопие́м Ти: / Благи́й Го́споди, сла́ва Тебе́.

Стих: Благослови́ши вене́ц / ле́та бла́гости Твоея́, Го́споди.

Дамаски́ново:

И́же в му́дрости вся соде́тельствовавый, Преве́чное Сло́во О́тчее, / и вся́ческую тварь всеси́льным сло́вом Твои́м соста́вивый, / благослови́ вене́ц ле́та бла́гости Твоея́, / и е́реси низложи́ Богоро́дицы ра́ди, / я́ко Благ и Человеколю́бец.

Сла́ва, свята́го, глас 5:

Преподо́бне о́тче, / до́бру изобре́л еси́ ле́стницу, е́юже возше́л еси́ на высоту́, / ю́же обре́те Илиа́ колесни́цу о́гненну. / Но он у́бо восхо́да иным не оста́ви, / ты же и по сме́рти и́маши столп твой. / Небе́сный челове́че, земны́й а́нгеле, / свети́льниче неусы́пный вселе́нныя, / Симео́не преподо́бне, / моли́ е́же спасти́ся душа́м на́шым.

И ны́не, инди́кта, глас то́йже.

Иоа́нна мона́ха:

Ты, Царю́, Сый при́сно, и пребыва́яй, / и во ве́ки безконе́чныя, / приими́ моле́ние гре́шных, прося́щих спасе́ния, / и пода́ждь, Человеколю́бче, земли́ Твое́й благопло́дие, / благорастворе́ны возду́хи да́руя, / спобо́рствуй на ва́рвары, я́коже иногда́ Дави́ду, / я́ко приидо́ша сии́ во оби́тели Твоя́, и всесвято́е ме́сто оскверни́ша, Спа́се. / Но Ты да́руй побе́ды, Христе́ Бо́же, моли́твами Богоро́дицы: / Побе́да бо Ты правосла́вных и хвала́.

Тропа́рь инди́кта, глас 2:

Всея́ тва́ри Соде́телю, времена́ и ле́та во Свое́й вла́сти положи́вый, благослови́ вене́ц ле́та бла́гости Твоея́, Го́споди, сохраня́я в ми́ре Импера́тора, и град Твой, моли́твами Богоро́дицы, и спаси́ ны.

Сла́ва, преподо́бнаго, глас 1:

Терпе́ния столп был еси́, / ревнова́вый пра́отцем, преподо́бне, / И́ову во страсте́х, Ио́сифу во искуше́ниих, / и безпло́тных жи́тельству, сый в телеси́, / Симео́не о́тче наш, / моли́ Христа́ Бо́га спасти́ся душа́м на́шым.

И ны́не, Богоро́дицы, глас то́йже:

Ра́дуйся, Обра́дованная Богоро́дице Де́во, / приста́нище и предста́тельство ро́да челове́ческаго, / из Тебе́ бо воплоти́ся Изба́витель ми́ра: / Еди́на бо еси́ Ма́ти и Де́ва, / Присноблагослове́нная, и Препросла́вленная, / умоли́ Христа́ Бо́га мир дарова́ти всей вселе́нней.

На у́трени, на Бог Госпо́дь, тропа́рь инди́кта два́жды.

Сла́ва, преподо́бнаго. И ны́не, Богоро́дицы. По 1-й стихоло́гии седа́лен инди́кта, глас 4. Подо́бен: Удиви́ся Ио́сиф:

Я́ко Влады́це всех, и Пода́телю благи́х, / Тебе́ припа́даем ве́рно, вопию́ще приле́жно: / от Твое́го умоля́емь благоутро́бия Спа́се, / и моли́твами Ро́ждшия Тя, и всех при́сно благоугожда́ющих Тебе́, / ле́то благоприя́тно принести́ Тебе́, я́ко благ сподо́би, / во дву существу́ че́ствующих, и ве́рно сла́вящих Тя.

Сла́ва, преподо́бнаго, глас 8. Подо́бен: Прему́дрости:

Крест Госпо́день взем му́дре, / и Тому́ до конца́ после́довав, / умо́м не возврати́лся еси́ в мир, Богому́дре: / воздержа́нием и труды́ стра́сти умертви́в, / и храм угото́вил еси́ себе́ Го́споду Твоему́. / Те́мже и дарова́ний возме́здие прия́л еси́, / исцеля́ти неду́жныя, и ду́хи отгони́ти, / Симео́не преподо́бнейший, / моли́ Христа́ Бо́га, грехо́в оставле́ние пода́ти / пра́зднующым любо́вию святу́ю па́мять твою́.

И ны́не, инди́кта: Я́ко Влады́це всех: Зри вы́ше.

По 2-й стихоло́гии седа́лен, глас 8. Подо́бен: Прему́дрости и Сло́ва:

Воздержа́нием и труды́ и моли́твами ду́шу твою́ обучи́в, Боголе́пне, / был еси́ соприча́стник му́чеником, блаже́нне, / и чуде́с и́стинно дарова́ния прия́л еси́ исцеля́ти неду́ги, / ве́рою че́ствующих тя. / Те́мже и де́монския отгоня́еши полки́, / на сия́ свы́ше вла́стию да́нною тебе́, Симео́не преблаже́нне, / моли́ Христа́ Бо́га, согреше́ний оставле́ние дарова́ти, / пра́зднующым любо́вию святу́ю па́мять твою́.

Сла́ва, глас 4. Подо́бен: Ско́ро предвари́:

Вошла́ еси́ в по́двиг муче́ния ве́рно Калли́сто пропове́дающи, со двема́ бра́ты, Христа́ Бо́га на́шего, / жела́нием бо воспита́на, мы́сленныя сосу́ды и́стинно Христо́вы Це́ркве, / соверши́ла еси́ сих. / Те́мже сочета́лася еси́ им, му́ченице, в вы́шнюю жизнь.

И ны́не, Богоро́дичен:

Ско́ро приими́, Влады́чице, мольбы́ на́ша, / и сия́ принеси́ Твоему́ Сы́ну и Бо́гу, Госпоже́ Всечи́стая. / Разреши́ обстоя́ния к Тебе́ притека́ющих, разруши́ наве́ты, и де́рзости, Де́во, / ны́не вооружа́ющихся на рабы́ Твоя́.

А́ще есть храм преподо́бнаго Симео́на: по полиеле́и седа́лен преподо́бнаго, глас 8. Подо́бен: Прему́дрости:

Превозше́л еси́ ве́рою, о́тче му́дре, / и привре́менная вся презре́в, / Христу́ после́довал еси́ си́лою ду́ха, / воздержа́нием иста́ил еси́ те́ло твое́, преподо́бне, / небе́сную сла́ву при́сно прови́дя. / Те́мже и обре́л еси́ к восхо́ду Боже́ственному столпа́ ле́ствицу, / твоего́ жела́ния прили́чну, Симео́не свяще́ннейший. / Моли́ Христа́ Бо́га, согреше́ний оставле́ние дарова́ти, пра́зднующим любо́вию святу́ю па́мять твою́.

Сла́ва, глас 5. Подо́бен: Собезнача́льное:

Воздержа́нием житие́ твое́ украси́л еси́, умертви́в те́ло твое́, в ни́чтоже обрати́л еси́ вра́жия прило́ги, о́тче блаже́нне, и преста́вился еси́ к Бо́гу в ве́чную жизнь, я́ко досто́ин насле́дник. Те́мже не преста́й моля́ся, поми́ловатися душа́м на́шым.

II ны́не, Богоро́дичен:

Пресвята́я Де́во, нас поми́луй, прибега́ющих ве́рою к Тебе́ Благоутро́бней, и прося́щих те́плаго Твоего́ заступле́ния: мо́жеши бо я́ко Блага́я всех спасти́, я́ко су́щи Ма́ти Бо́га Вы́шняго, Ма́терними Твои́ми мольба́ми, при́сно умоля́ющи Богоблагода́тная.

Степе́нна. 1-й антифо́н 4-го гла́са. Проки́мен. Ева́нгелие и стихи́ра хра́ма: та́кже псало́м 50.

Кано́ны 3. Инди́кта, глас 1, со ирмосо́м на 6. Творе́ние Кир Иоа́нна мона́ха, ирмо́с по два́жды, тропари́ на 4.

Песнь 1.

Ирмо́с: Пои́м вси лю́дие, / от го́рькия рабо́ты фарао́ни, / Изра́иля Изве́дшему, / и во глубине́ морсте́й нога́ми немо́крыми Наста́влшему, / песнь побе́дную, я́ко просла́вися.

Воспои́м вси Христу́, / И́мже соста́вишася вся́ческая, / и в Не́мже соверши́шася неразлу́чна, / я́ко из Безнача́льнаго ро́ждшуся Бо́га Отца́ Ипоста́сному Сло́ву, / песнь побе́дную, я́ко просла́вися.

Воспои́м вси Христу́, / О́тчим благоволе́нием я́вльшуся из Де́вы, / и пропове́давшу ле́то Госпо́дне прия́тно, / нам на избавле́ние, / песнь пoбе́дную, я́ко просла́вися.

В Назаре́т прише́д Пода́тель зако́на, / в день суббо́тный уча́ше, / законополага́я евре́ем прише́ствия Своего́ неизрече́ннаго: / и́мже я́ко Ми́лостив спаса́ет род наш.

Богоро́дичен: Пою́ще вси ве́рнии Преди́вную Отрокови́цу, / Христа́ вселе́нней возсия́вшую, / и ра́дости вся́ческая испо́лнившую, / При́сносу́щныя Жи́зни, / при́сно восхваля́ем, я́ко просла́вися.

Ин кано́н святы́х жен на 4, его́же краегране́сие: Тве́рдых жен му́чениц пою́ боле́зни. Глас 4.

Ирмо́с: Отве́рзу уста́ моя́ / и напо́лнятся Ду́ха, / и сло́во отрыгну́ Цари́це Ма́тери, / и явлю́ся, светло торжеству́я, / и воспою́, ра́дуяся Тоя́ чудеса́.

Тве́рдо на противобо́рца подвиза́стеся, му́ченицы, посто́м у́бо пе́рвее, второ́е же кро́вным страда́нием: / сего́ ра́ди ва́ша па́мяти ве́рою почита́ем.

Уязви́вшеся любо́вию нас ра́ди Претерпе́вшего Крест же и сме́рть, / Сего́ стопа́м после́доваша святы́я жены́, плотску́ю не́мощь забы́вше.

Е́ллинския же́ртвы, и де́монская водруже́ния ору́жием ве́ры низложи́сте, / и принесо́стеся ко хра́му небе́сному, сосу́ди одушевле́ннии, му́ченицы всечестни́и.

Богоро́дичен: Укре́пльшеся благода́тию, / от Твоея́ Возсия́вшаго утро́бы, Всенепоро́чная, / отрокови́цы де́вы, отрази́ша мук треволне́ние, / и в след Тебе́ приведо́шася, ра́дующеся.

Ин кано́н преподо́бнаго на 4, его́же краегране́сие: Приими́ пе́ние, о Симео́не всеблаже́нне. Иоа́нна мона́ха, глас 8.

Ирмо́с: Пои́м Го́сподеви вси лю́дие, / в мо́ри Чермне́м фарао́на погрузи́вшему, / побе́дную песнь пою́ще, / я́ко просла́вися.

Даждь мне орга́ном язы́ка гнилы́м, / о Богоно́се Симео́не, / песнь тебе́ плету́щему, / мольба́ми твои́ми, зна́ния свет Богонауче́н.

Позна́ша му́дрость, о́тче, твою́, / перся́не, ефиопля́не, индиа́не, и скифя́не, и ара́вов множество, / и просла́виша Христа́, тобо́ю прославля́емаго.

Благода́ти испо́лнився духо́вныя, / от пасту́шеских бо ста́нищ я́ко Иа́ков, Дави́д и Моисе́й, / началово́ждь слове́сных яви́лся еси паств, блаже́нне.

Богоро́дичен: Пречи́стая Богоро́дице, ра́дуйся Честна́я, / Невмести́маго Бо́га во утро́бе Твое́й вмести́вшая, / изба́витися лю́тых испроси́ пою́щым Тя.

Катава́сиа: Крест начерта́в Моисе́й, / впря́мо жезло́м Чермно́е пресече́, / Изра́илю пешеходя́щу, / то́же обра́тно фарао́новым колесни́цам / уда́рив совокупи́, / вопреки́ написа́в непобеди́мое ору́жие. / Тем Христу́ пои́м Бо́гу на́шему, я́ко просла́вися.

Пое́м и до отда́ния Честна́го Креста́.

Песнь 3.

Ирмо́с: Утверди́ мене́, Христе́́, / на недви́жимом ка́мени за́поведей Твои́х, / и просвети́ мя све́том лица́ Твоего́. / Несть бо свят па́че Тебе́ Человеколю́бче.

Утверди́, Бла́же, его́же насади́ любо́вию на земли́ десни́ца Твоя́, / плодови́т виногра́д, / сохра́няя Твою́ Це́рковь, Всеси́льне.

В де́лех духо́вных Богокра́сных кра́сящияся, / наста́вшее, Го́споди, ле́то сие́, преведи́, Влады́ко, и́же ве́рою Тя песносло́вящия, / Бо́же вся́ческих.

Ти́хий ми, Христе́́, ле́тный круг дава́й, Ще́дре, / и насы́ти мя слове́с Боже́ственных Твои́х, / я́же яви́лся еси́ глаго́ля иуде́ем в суббо́тах.

Богоро́дичен: Я́ко Еди́ну преесте́ственно па́че челове́ка / благода́ть во Твою́ утро́бу прие́мшую, / и невра́щно ро́ждшую Христа́ Бо́га на́шего, / при́сно Тя сла́вим.

Ин. Ирмос: Лук си́льных изнемо́же, / и немощству́ющии препоя́сашася си́лою: / сего́ ра́ди утверди́ся в Го́споде се́рдце мое́.

Кре́постию всеси́льною укрепля́еми, / противобо́рцев попра́сте си́лу: / сего́ ра́ди я́ко победоно́сицы от Христа́ венча́стеся.

Яви́шася зве́рская зия́ния, / Боже́ственною си́лою Христо́вою неде́йственна: / и изба́вистеся, Богоно́сицы, невреди́мы, / Бо́га почита́юще.

Воззре́нием к Бо́гу обожа́еми, / многобо́жия хлад отри́нусте, / и к теплоте́ вы́шния сла́вы, страстоно́сицы, достиго́сте.

Богоро́дичен: Зна́юще благоче́стно / пропове́даем Тя Всеи́стинную Бо́жию Ма́терь, Всенепоро́чная: / Тобо́ю бо нам Созда́тель приобщи́тися сподо́би.

Ин. Ирмо́с: Страх Твой, Го́споди, всади́ в сердца́ раб Твои́х, / и бу́ди нам утвержде́ние, / Тя во и́стине призыва́ющих.

Ско́ро избе́г зи́мныя беды́ духо́в, / ко спаси́тельней устреми́лся еси́ оби́тели, Симео́не, / из нея́же и нестаре́емую жизнь прия́л еси́.

Приклони́л еси́ ра́дуяся, / покорли́вый слух твой, всеблаже́нне, Влады́це блажа́шу, / и блаже́нную обре́л еси́ жизнь.

Сло́ва прие́м семена́, / се́рдца твоего́ бразда́ми, и слез напое́нии, / Христу́ умно́жен клас доброде́телей пожа́л еси́.

Богоро́дичен: Неизрече́нно зачала́ еси́, Богоневе́сто, / Спа́са и Го́спода, избавля́ющего ны от лю́тых, / Тя во и́стине призыва́ющия.

Катава́сиа: Жезл во о́браз та́йны прие́млется, / прозябе́нием бо предразсужда́ет свяще́нника, / неплодя́щей же пре́жде Це́ркви, ны́не процвете́ / дре́во Креста́, в держа́ву и утвержде́ние.

Конда́к инди́кта, глас 2: В Вы́шних живы́й, Христе́ Царю́, / всех ви́димых и неви́димых Тво́рче и Зижди́телю, И́же дни и но́щи, времена́ и ле́та, сотвори́вый, / благослови́ ны́не вене́ц ле́та, / соблюди́ и сохрани́ в ми́ре град и лю́ди Твоя́, Многоми́лостиве.

Та́же седа́лен инди́кта, глас 8. Подо́бен: Прему́дрости:

И́же времена́ плодоно́сна, / и дожди́ с небесе́ подая́ су́щим на земли́, / и ны́не прие́мля мольбы́ рабо́в Твои́х, / от вся́кия изба́ви ну́жды град Твой: / щедро́ты бо Твоя́ и́стинно на всех де́лех Твои́х. / Те́мже вхо́ды благослови́ и исхо́ды, / дела́ испра́ви в нас рук на́ших, / и согреше́ний проще́ние да́руй нам, Бо́же: / Ты бо из не су́щих вся́ческая во е́же бы́ти, / я́ко си́лен, приве́л еси́.

Ин седа́лен преподо́бнаго, глас и подо́бен то́йже:

Земна́я вся оста́вив, / и в ми́ре сый теле́сне, / ду́хом был еси́ небе́сный а́нгел, / находя́щыя бо стра́сти умертви́в пло́тию, / Тро́ицы яви́лся еси́ уго́дник, блаже́нне. / Те́мже неду́гующих исцеля́вши стра́сти, / и сло́вом ду́хи отгоня́еши благода́тию, / Симео́не преблаже́нне, / моли́ Христа́ Бо́га, согреше́ний проще́ние дарова́ти / че́ствующым любо́вию святу́ю па́мять твою́.

Сла́ва, ин седа́лен святы́х жен, глас 1. Подо́бен: Гроб Твой, Спа́се:

А́гницы слове́сныя, / А́гнцу и Па́стырю, приведо́стеся ве́рно муче́нием, / тече́ние соверши́вше, и ве́ру соблю́дше. / Тем ра́достно днесь восхваля́ем, досточу́днии, / свяще́нную ва́шу па́мять, / Христа́ велича́юще.

И ны́не, Богоро́дичен: Наста́ви ны на путь покая́ния, / уклоня́ющыяся при́сно к злым безпу́тием, / и Преблага́го прогне́вающыя Го́спода, Неискусобра́чная, Благослове́нная Мари́е, / прибе́жище отча́янных челове́ков, Бо́жие обита́лище.

Песнь 4.

Ирмо́с: Разуме́х, Всеси́льне, / Твое́ смотре́ние, / и со стра́хом просла́вих Тя, Спа́се.

Нача́ло Тебе́ ле́та лю́дие Твои́ прино́сят, / а́нгельскими пе́сньми славосло́вяще Тя, Спа́се.

Я́ко Человеколю́бец сподо́би наче́ншим ле́то / и сконча́ти Тебе́ благоуго́дно, Христе́.

Вседержи́телю Еди́не Го́споди, лет обхожде́ния утиши́в, ми́ру да́руй.

Богоро́дичен: Я́ко приста́нище ны́не душ на́ших / и тве́рду наде́жду, Богоро́дицу вси воспои́м.

Ин. Ирмо́с: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.

Претерпе́вше му́ки, и сокруше́ние те́ла разли́чными о́бразы, / раздробле́ние же уде́с и опаде́ние, / небе́сная селе́ния насле́довасте, / насла́ждшеся дре́ва жи́зни, досточу́днии.

Деви́ц блаже́нных по́двигу удиви́шася небе́сныя си́лы, / я́ко врага́ победи́ша в же́нстем естестве́, / укрепля́еми си́лою от Жены́ Возсия́вшаго.

Отве́ргше ми́ра суету́ всю, / Бо́гу Еди́ному все́ю душе́ю прилепи́стеся. / Тем воздержа́ния боле́зни, и страда́ния претерпе́сте, / неве́сты Христо́вы терпели́вии.

Прекре́пкое я́ко ору́жие, Крест обнося́ще, / к сопоста́тным противоста́сте ополче́нием, / со Христо́м же побе́ду отнесо́сте, / победи́вшим мир си́лою Божества́.

Богоро́дичен: Сни́де, я́ко дождь на руно́, во утро́бу Твою́, / Богоглаго́ливый дре́вле рече́ проро́к, Всенепоро́чная: / Его́же во дву существу́ родила́ еси́. / Ему́же взыва́ем: сла́ва, Христе́, си́ле Твое́й.

Ин. Ирмо́с: Услы́шах, Го́споди, слух Твой, и убоя́хся, /разуме́х дела́ Твоя́, / и просла́вих держа́ву Твою́, Господи.

Не на песце́, преблаже́нне, / но на глубоча́йших труде́х твои́х положи́в основа́ние воздержа́ния, / доброде́телей созда́л еси́ столп непоколеби́м.

Всели́в те́ло твое́ в жили́ще жесто́ко, / стра́хом пригвозди́л еси́ ду́ха, / и жили́ще насле́дия Боже́ственнаго обре́л еси́, преподо́бне.

Укроти́л еси́ теле́сныя сокрове́нныя стра́сти, пребога́те, / в гнои́ лежа́ черве́й, о́тче, / благово́ние обре́л еси́.

По стра́сти во́льней, Жизнотвори́вому Мертвецу́ подо́бяся, / я́коже гро́бу, ро́ву те́мному, / сам себе́ жи́ва преда́л еси́.

Богоро́дичен: Бо́га, Его́же родила́ еси́ Пречи́стая Мари́е, / моли́ всегда́ рабо́м Твои́м / дарова́ти согреше́ний проще́ние.

Катава́сиа: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Песнь 5.

Ирмо́с: От но́щи у́тренююще, пое́м Тя, Христе́, / Отцу́ Собезнача́льна / и Спа́са душ на́ших, / мир ми́рови пода́ждь, Человеколю́бче.

Исполня́яй вся́ческая бла́гости, Христе́, / Ты благорастворе́нием и благопло́дием, благослове́нми венча́емо, / многокру́жное ле́то рабо́м Твои́м да́руй.

Ле́тное воздая́ние покажи́ нам преложе́ние к лу́чшим: / ми́рное же устрое́ние ве́дущим Тя, Сло́ве Бо́жий, / уподо́бльшася челове́ком.

На зе́млю прише́л еси́, Собезнача́льне Отцу́, / пле́нником отпуще́ние, слепы́м же прозре́ние от Отца́ возвеща́я, / и вре́мя прия́тно.

Богоро́дичен: На́ши наде́жды, Богоро́дице Чи́стая, / и на́ше жела́ние на Тя возлага́ем, / Ми́лостива нам даждь, Де́во, Его́же родила́ еси́.

Ин. Ирмо́с: Нечести́вии не у́зрят сла́вы Твоея́, Христе́, / но мы Тя, Единоро́дне, Оте́ческия сла́вы сия́ние Божества́, / от но́щи у́тренююще, / воспева́ем Тя, Человеколю́бче.

Я́ко а́гницы непоро́чныя, я́ко же́ртвы прия́тныя, / А́гнцу И́стинному, и Па́стырю, му́ченицы принесо́стеся, / приноше́ния всебога́тая, и прия́тна всесожже́ния.

Умерщвле́ни бы́вше те́лом, ожи́сте душе́ю, / Умертви́вшему кре́пость сме́рти, му́ченицы, / я́ко уподо́бльшеся и Кресту́ и сме́рти и стра́сти во́льней.

Еди́н ра́зум иму́ще в телесе́х мно́гих, / Еди́наго Го́спода Иису́са, / разли́чными ра́нами стру́жеми, и огне́м сожига́еми, / испове́даху Богому́дрыя.

Богоро́дичен: Воздви́гни па́дша мя в ро́ве искуше́ний, / и упра́ви, Бо́га Ко́рмчию Ро́ждшая, / Еди́на Всенепоро́чная, / пе́рвее соедини́вшаго разстоя́щияся, бла́гостию.

Ин. Ирмо́с: Просвети́ нас повеле́нии Твои́ми, Го́споди, / и мы́шцею Твое́ю высо́кою, / Твой мир пода́ждь нам, Человеколю́бче.

Но́ваго Дании́ла Симео́не, / Христо́с тя показа́, / из ро́ва бо зве́рска тя явле́нием неврежде́на возврати́.

Весь сам себе́ Го́споду возложи́в, / слоте́, и мра́зу, и зно́ю проти́вным озлобле́нием обнажи́лся еси́.

Но́вый Моисе́й и Илиа́ показа́лся еси́, / еди́нощи чрез всю четыредеся́тницу пи́щу прие́мля, / во всей жи́зни твое́й, преподо́бне.

Я́ко златоза́рным, Симео́не, мони́стом преподо́бне, у́жем облага́емь, / небоше́ственник показа́лся еси́ / Боже́ственными кри́лы.

Богоро́дичен: Моли́ при́сно Сы́на Твоего́ и Бо́га на́шего, / неискусобра́чная Мари́е Чи́стая, / низпосла́ти нам ве́рным ве́лию ми́лость.

Катава́сиа: О, Треблаже́нное дре́во, / на не́мже распя́ся Христо́с, Царь и Госпо́дь, / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шым.

Песнь 6.

Ирмо́с: Проро́ка спасл еси́ от ки́та, Человеколю́бче, / и мене́ из глубины́ прегреше́ний / возведи́, молю́ся.

Житие́ нача́ти, благоуго́дно Тебе́, Влады́ко, / с ле́тным начина́нием, нас сподо́би. (Два́жды)

Дней духо́вных, в поуче́нии зако́на Твоего́, / покажи́ испо́лнены, Ще́дре Спа́се, пою́щия Тя.

Богоро́дичен: Ро́ждшая Го́спода, Богоро́дице Всенепоро́чная, / изба́ви от бед ве́рою пою́щия Тя, Пречи́стая.

Ин. Ирмос: Возопи́ прообразу́я погребе́ние тридне́вное, / проро́к Ио́на в ки́те моля́ся: / от тли изба́ви мя, Иису́се Царю́ сил.

Раздраже́на, и нога́ми же́нскими попира́ема, / зря́щи прама́терь, Боже́ственне ра́дуется, / ту́ю ле́стию из рая́ пе́рвее изгна́вшаго.

Воздержа́нием к страда́нию усе́рдно совоку́пльшеся, / Жениху́ душ ны́не нетле́ние совокупи́стеся, / и в черто́зе Боже́ственней, ра́достною душе́ю водворя́етеся.

Возвыша́емая мук свире́пая волне́ния, / му́чениц корабле́й потопи́ти не возмого́ша: / держа́вною бо руко́ю к Боже́ственным приста́нищем достиго́ша.

Богоро́дичен: Глаго́лов Твои́х сбы́тия зря́щи, / возвели́чи наипа́че, Богома́ти, Тя Возвели́чившаго: / ро́ди бо вси Тя ны́не и́стинно ублажа́ют.

Ин. Ирмо́с: Ри́зу мне пода́ждь све́тлу, / одея́йся све́том я́ко ри́зою, / Многоми́лостиве Христе́ Бо́же наш.

Зна́мений и чуде́с тя Христо́с самоде́теля показа́, / Боже́ственнаго блаже́нне, де́йства, прия́тно жили́ще.

Возне́сл еси́ те́ло твое́, Симео́не, / я́ко на Крест на столп. / Тем спросла́вился еси, / на дре́во тебе́ ра́ди Возне́сшемуся Христу́.

Вы́шнее ше́ствие обре́т, Симео́не чу́дне, / к высоте́ небе́сней пою́щыя тя ве́рно возведи́.

Богоро́дичен: Го́ру, ю́же прови́де Дании́л, / из Нея́же несеко́мый Ка́мень ве́ры отсече́ся Христо́с, / Тя познава́ем.

Катава́сиа: Во́днаго зве́ря во утро́бе, / дла́ни Ио́на крестови́дно распросте́р, / спаси́тельную страсть прообража́ше я́ве. / Тем тридне́вен изше́д, / преми́рное воскресе́ние прописа́ше, / пло́тию пригвожде́ннаго Христа́ Бо́га, / и тридне́вным воскресе́нием мир просве́щшаго.

Конда́к преподо́бного Симео́на, глас 2: Вы́шних ища́й, ни́жним совокупля́яйся, / и колесни́цу о́гненную столп соде́лавый: / тем собесе́дник а́нгелом был еси́ преподо́бне, / с ни́ми Христу́ Бо́гу моля́ся / непреста́нно о всех нас.

Икос: Симео́ново непоро́чное житие́, / кий язы́к челове́чь довле́ет когда́ к похвале́ испове́дати? / оба́че воспою́, Бо́жиею му́дростию, / до́бляго сего́ исполи́на страда́ние же и по́двиги, я́же на земли́, / я́ко свети́льника я́вльшася, всем челове́ком, / мно́гим терпе́нием, в ли́це а́нгельстем возсия́вша: / с ни́ми бо поя́ непреста́нно Христу́, / воздержа́нием чистоту́ стяжа́, / моля́ся непреста́нно о всех нас.

Песнь 7.

Ирмо́с: О́троцы благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но посреде́ пла́мене стоя́ще поя́ху: / отце́в Бо́же благослове́н еси́.

Начина́ющии ле́то и пе́сней нача́ток сотворя́ем ца́рствующему Христу́, / Ца́рством безконе́чным, правосла́внии лю́дие, / благоче́стно пою́ще: отце́в Бо́же благослове́н еси́. (Два́жды.)

Сый пре́жде век, на век же, и еще́ Госпо́дь, / воспева́ющим Тя, Христе́, исто́чник бла́гости, / благи́х Твои́х даро́в ле́то сие́ испо́лни: / отце́в Бо́же благослове́н еси́.

Богоро́дичен: Я́ко раби́ Влады́це на моли́тву, / Чи́стую Ма́терь Твою́ Тебе́ предлага́ем, Христе́, / от вся́каго обстоя́ния лю́ди Твоя́, Бла́же, изба́вити пою́щия: / отце́в Бо́же благослове́н еси́.

Ин. Ирмо́с: Спасы́й во огни́ авраа́мския твоя́ о́троки, / и халде́и уби́в, / я́же пра́вда пра́ведно уловля́ше: / препе́тый Го́споди, Бо́же оте́ц на́ших, благослове́н еси́.

Коль непобеди́мо твое́ мудрова́ние, Амму́не Богоно́се: / и́бо нача́льник ли́ка дев, мук не убоя́лся еси́, / с ни́ми скончева́яся, я́ко диа́кон и таи́нник Боже́ственный сла́вы, / пел еси́: препе́тый Го́споди Бо́же оте́ц, благослове́н еси́.

Я́ко невестоводи́тель мудр, / словесы́ помазу́еши му́жества, / к Жениху́ взира́ти, и плотски́я терпе́ти боле́зни, зову́щыя му́ченицы: / препе́тый Го́споди Бо́же оте́ц, благослове́н еси́.

Да не облени́мся, / се отве́рзеся три́знище, отрокови́цы, ста́нем му́жески: / Христо́с венцы́ простира́ет, / те́ла на́шего не пощади́м, вопия́ху до́блии на три́знищи: / препе́тый Го́споди Бо́же оте́ц, благослове́н еси́.

Богоро́дичен: Благослове́н плод благослове́ннаго чре́ва Твоего́, / Его́же благословя́т небе́сныя си́лы, и челове́честии собо́ри, / нас Изба́вльшаго кля́твы дре́вния, Благослове́нная.

Ин. Ирмо́с: О́троцы благочести́вии в Вавило́не, / о́бразу злато́му не поклони́шася, / но посреде́ пе́щи о́гненныя ороша́еми, / песнь воспева́ху глаго́люще: превозноси́мый отце́в и нас Бо́же, благослове́н еси́.

Разреши́л еси́ у́бо сухоту́ недоуме́ющымся, / и врата́ тем дожде́вныя отве́рзл еси́, / и зе́млю коле́блющуюся моли́твами уста́вил еси́, / и лю́ди зва́ти научи́л еси́: / благослове́н Бог отце́в на́ших.

Я́ко велича́йший свети́льник церко́вный, / и многосве́тлое, Симео́не, со́лнце, всю́ду лучи́ испуща́я просвети́л еси́, / и лю́ди зва́ти научи́л еси́: / благослове́н Бог отце́в на́ших.

Во́ды отвсю́ду стеко́шася, уго́дниче Христо́в, / челове́ков пучи́на, во огра́де твоего́ собра́ся воздержа́ния, / от тебе́ вопи́ти наказу́еми: / благослове́н Бог отце́в на́ших.

Дре́вле у́бо ста́рца объя́тии, / скрижа́льми же твоего́ се́рдца, преподо́бне, неви́димою си́лою, Христо́с упоко́ися, Симео́не. / Те́мже взыва́л еси́: благослове́н Бог отце́в на́ших.

Богоро́дичен: Подоба́ше безсе́менно Вопло́щшемуся из Тебе́ проити́, Де́во Чи́стая: Ты бо яви́лася еси́ чистото́ю всех пребо́льши. / Ему́же вопию́ще пе́сньми зове́м: / благослове́н Бог отце́в на́ших.

Катава́сиа: Безу́мное веле́ние мучи́теля злочести́ваго лю́ди поколеба́, / ды́шущее преще́ние и злохуле́ние Богоме́рзское: оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному ду́ху, / со огне́м су́ще поя́ху: / Препе́тый отце́в и нас Бо́же благослове́н еси́.

Песнь 8.

Ирмо́с: Песносло́вцы в пещи́ спа́сшаго де́ти, / и громопла́менную прело́жшаго на ро́су, / Христа́ Бо́га по́йте, / и превозноси́те во вся ве́ки.

Я́ко Нача́льнику спасе́ния, Христе́, / нача́ток Тебе́ прино́сит ле́тный, честна́я Це́рковь зову́щи: / по́йте и превозноси́те Христа́ во ве́ки.

Из не су́щих вся́ческая му́дре обнови́вшаго Созда́теля, / и Производя́щего време́н обраще́ния хоте́нием, / по́йте и превозноси́те Его́ во ве́ки.

Изводя́щему вся́ческая Бо́гу, / и времена́ Изменя́ющему, / на многообра́зное челове́ков управле́ние, / пое́м: хвали́те и превозноси́те Христа́ во ве́ки.

Богоро́дичен: Богома́терь Де́ву Чи́стую, / лет обхожде́нми же и обраще́нми, правосла́вно челове́честии собо́ри, / пое́м Тя я́ко Богоро́дицу, и всех спасе́ние.

Ин. Ирмо́с: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́, / и превозноси́те Его́ во вся ве́ки.

Све́тлы себе́ от крове́й ри́зы му́ченицы обложи́сте, / совле́кшеся и́стинно тле́емаго греха́ми челове́ка, / и воспева́юще: Го́спода по́йте дела́, и превозноси́те Его́ во вся ве́ки.

Оби́льнаго све́та светоли́тиями, / со́лнца мы́сленнаго Боже́ственными све́тлостьми, му́ченицы освеща́еми, / нощь претеко́сте безбо́жия, / пою́ще единомышле́нием души́: / Го́спода по́йте дела́ и превозноси́те Его́ во вся ве́ки.

Я́ко а́гницы, я́ко нескве́рныя ю́ницы, / я́ко Боже́ственныя голуби́цы, я́ко самово́льная заколе́ния, / приведо́стеся му́ченицы Зижди́телю, / и я́ко же́ртвы непоро́чны, / согла́сно пою́ще: Го́спода по́йте дела́, и превозноси́те Его́ во вся ве́ки.

Повеле́нием мучи́телей пребеззако́нных, непра́ведную подья́сте смерть, / на у́ды ссеца́еми, па́лицами сокруша́еми, / неми́лостивне бие́ми, огне́м всесожига́еми, мече́м посека́еми: / тем безсме́ртная прия́сте с ра́достию бога́тная возда́яния.

Богоро́дичен: Во след Тебе́ теко́ша жены́, ми́ра благово́ннаго ве́дуще, / Всечестна́я Богоневе́сто, / Еди́на неискусобра́чная, / из утро́бы Твоея́ Возсия́вшаго Единоро́днаго Сы́на, / и с Тобо́ю ца́рствуют и́стинно, песносло́вяще Христа́ во ве́ки.

Ин. Ирмо́с: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте, / и превозноси́те во вся ве́ки.

От вся́каго отлучи́вся пристра́стия, / и ма́терию не́мощь уще́дрив, / я́ко живе́й я́вился еси́ по сме́рти, / Го́спода по́йте, и превозноси́те Его́, вопия́, во ве́ки.

Ю́ношу стя́гнул еси́ разсла́блена, / и одр Фи́ларху повелева́еши на ра́ме нести́ свяще́ннейше вопия́: / Го́спода по́йте, и превозноси́те Его́ во вся ве́ки.

Благослови́м Отца́, и Сы́на, и Свята́го Ду́ха, Го́спода.

Уясни́вый И́ова стра́стию, / согни́вшия пло́ти твоея́ гни́лость, / в би́сер претвори́ многоце́нен, тя, Христо́в уго́дниче, Симео́не, / сла́вяй во вся ве́ки.

И ны́не, Богоро́дичен: От а́нгела ра́дость прие́мшую, / и Ро́ждшую Го́спода Сла́вы, / и свет ми́ру возсия́вшую, / вси Тя пое́м Де́во Богоро́дице, во вся ве́ки.

Та́же: Хва́лим, благослови́м, покланя́емся Го́сподеви, / пою́ще и превознося́ще во вся ве́ки.

Катава́сиа: Благослови́те о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь Подава́ющаго, / Ду́ха Всесвята́го во ве́ки.

Иере́й же, покади́в святу́ю трапе́зу, возгласи́т: Богоро́дицу и Ма́терь Све́та в пе́снех возвели́чим.

И покади́в святы́й олта́рь, и всю це́рковь, и бра́тию, е́же повсегда́ на 9-й пе́сни у́трени не оставля́ется. Мы же стихологису́ем 9-ю песнь пою́ще велегла́сно, на глас 6:

Вели́чит душа́ Моя Го́спода: Припева́ем же: Честне́йшую Херуви́м: (На 9-й пе́сни, я́ко а́ще несть пра́здник Госпо́дский, то всегда́, а́ще и вели́кое славосло́вие, или́ храм свята́го ко́его бу́дет, стихологису́ем Честне́йшую:)

Песнь 9.

Ирмо́с: О́браз чи́стаго Рождества́ Твоего́, / огнепали́мая купина́ показа́ неопа́льная, / и ны́не на нас напа́стей свирепе́ющую угаси́ти мо́лимся пещь: / да Тя, Богоро́дице, непреста́нно велича́ем.

Сло́во Бо́жие, и Си́ла, и́стинная Му́дрость и Ипоста́сная, / содержа́щая и пра́вящая вся́ческая му́дре, / и ны́не наста́вшее рабо́м Твои́м вре́мя, / во устрое́нии ти́се произведи́.

Вся дела́ Твоя́, Го́споди: / небеса́, земля́, свет и мо́ре; / во́ды, и вси исто́чницы; / со́лнце же, луна́ и тьма; / зве́зды, огнь, челове́цы и ско́ти / со А́нгелы восхваля́ют Тя.

Еди́н еси́ Преве́чный, я́ко Творе́ц веко́в: / и ца́рствующее Триипоста́сное Еди́но Божество́ неразде́льное, / мольба́ми Чи́стыя Богома́тере, / ле́то плодоно́сно насле́дию Твоему́ покажи́.

Спа́се всего́, и Строи́телю и Зижди́телю и Вседержи́телю тва́ри, / мольба́ми безсе́менно Ро́ждшия Тя, мир ми́ру Твоему́ пода́ждь, / соблюда́я Це́рковь всегда́ немяте́жну.

Ин. Ирмо́с: Е́ва у́бо неду́гом преслуша́ния кля́тву всели́ла есть / Ты же, Де́во Богоро́дице, / прозябе́нием чревоноше́ния ми́рови благослове́ние процвела́ еси́, / тем Тя вси велича́ем.

Подаю́т исцеле́ний то́ки тре́бующим, я́ко от исто́чника Всеблаже́нныя: / уставля́ют па́губу неду́гов, и страсте́й отгоня́ют зной: / сердца́ Боголюби́вых напая́ют, / к благопло́дию Боже́ственных дея́ний.

Боже́ственный диа́кон Амму́н, / Келси́на же, и к сим четы́редесять, Боже́ственныя и Богому́дрыя жены́, / пострада́вше зако́нно венча́шася, / и ны́не со а́нгелы лику́ют, / я́же по до́лгу ублажа́ем.

Вознесо́стеся держа́ву на враги́ взе́мше, / и а́нгелом уподо́бистеся, / дре́ва наслажда́етеся невозбра́нно жи́зненнаго в раи́ Богоневе́сты, / исто́чник ны́не до́брых прия́сте, / о ми́ре моля́щеся.

Богоро́дичен: Му́дрости вмести́лище па́че ума́ лу́чшаго яви́лася еси́, / Отрокови́це непоро́чная, / одушевле́н Престо́л же и Дверь: / тем я́ко Цари́цу возлюби́ша де́вы Тя, Де́во, / в след Тебе́ приведо́шася, Богоотрокови́це.

Ин. Ирмо́с: Проявле́нное на горе́ законополо́жнику во огни́ и купине́, / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Воцари́вшася над страстми́ терпе́нием, / Христо́с тя прия́т, Симео́не Богоно́се, / Своему́ о́бщннка ца́рству: / тем тя пе́сньми почита́ем.

Целе́бней благода́ти сподо́бився, / от некрадо́мых Ду́ха сокро́вищ, Богоно́се Симео́не, / исцеле́ния пода́вши торжеству́ющим па́мять твою́.

Возше́д, преподо́бне, небе́снаго тече́ния на доброде́тельный возду́х, / страда́нии препоя́сан, возлете́в к ски́ниям небе́сным, / моли́ спасти́ся душа́м на́шым.

Богоро́дичен: Купина́ горя́щая огне́м, и неопаля́ема яви́лася еси́, о Влады́чице, / заче́нши безсе́менно Бо́га и Спа́са ми́ра, / Его́же непреста́нно велича́ем.

Катава́сиа: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся дре́во. / Тем ны́не возноси́му, / покланя́ющеся Ему́, Тя велича́ем.

Други́й ирмо́с: Сне́дию дре́ва, ро́ду прибы́вшая смерть, / кресто́м упраздни́ся днесь. И́бо прама́терняя всеро́дная кля́тва разруши́ся, / прозябе́нием Чи́стыя Богома́тере: Ю́же вся си́лы небе́сныя велича́ют.

Свети́лен инди́кта. Подо́бен: Ученико́м:

Бо́же бого́в и Го́споди, / Триипоста́сное естество́, / непристу́пне, присносу́щне, несозда́нне, / и всех Соде́телю Вседержи́телю, / Тебе́ припа́даем вси, и Тя мо́лим: настоя́щее ле́то сие я́ко Благ благослови́в, / сохрани́ в ми́ре вся лю́ди Твоя́, Ще́дре.

Сла́ва, преподо́бнаго, подо́бен то́йже:

Я́коже свети́ло, преподо́бне, / светоно́сное твое́ житие́ облиста́вшее просвети́ подсо́лнечную всю, / чуде́с луча́ми. / Столпо́м бо, о́тче, возше́д еси́, я́ко ле́ствицею к Бо́гу, / иде́же всех жела́ний, Симео́не, / коне́чное и́стинно восприя́тие есть, / о нас моля́ся, че́ствующих тя, блаже́нне.

И ны́не, инди́кта, подо́бен то́йже:

Соде́телю и Прави́телю всея́ тва́ри Сый, / времена́ и ле́та положи́в в Твое́й вла́сти, / ле́тний круг, благослове́нми Ще́дре, бла́гости венча́й, / в ми́ре сохраня́я Твоя́ лю́ди невре́дны, и це́лы, мо́лимся, / моли́твами Ро́ждшия Тя, и Боже́ственных а́нгел.

На хвали́тех стихи́ры самогла́сны инди́кта, на 4, глас 3. Иоа́нна мона́ха:

Преве́чное Сло́во О́тчее, / и́же во о́бразе Бо́жий Сый, / и соста́вивый тварь из не су́щаго во е́же бы́ти, / времена́ и ле́та в Свое́й вла́сти положи́вый, / благослови́ вене́ц ле́та бла́гости Твоея́, / да́руя мир церква́м Твои́м, / и побе́ды правосла́вным христиа́ном, / благопло́дие же земли́, и нам ве́лию ми́лость.

Глас 4. Того́же: Ца́рствие Твое́, Христе́ Бо́же, ца́рство всех веко́в, / и влады́чество Твое́ во вся́ком ро́де и ро́де, / вся бо му́дростию сотвори́л Еси́, / времена́ и ле́та нам предложи́в. / Те́мже благодаря́ще о всех и за вся вопие́м: / благослови́ вене́ц ле́та бла́гости Твоея́, / и сподо́би нас неосужде́нно вопи́ти Тебе́: / Го́споди, сла́ва Тебе́.

Андре́я Пи́рскаго: Ше́ствия Твоя́, Бо́же, ше́ствия ве́лия и чу́дна: / тем строе́ния Твоего́ си́лу велича́ем, / я́ко свет от Све́та прише́л еси́ во окая́нный мир Твой, / и пе́рвую погуби́л еси́ кля́тву ве́тхаго Ада́ма, / я́ко благоволи́л еси́, Сло́ве, / и нам, му́дростию времена́ и ле́та положи́л еси́, / е́же сла́вити вседе́тельную Твою́ бла́гость: / Го́споди, сла́ва Тебе́.

Святы́х жен, глас 2. Ге́рманово: Егда́ стра́стию Твое́ю, Го́споди, / вселе́нную утверди́л еси́, / тогда́ и немощству́ющии препоя́сашася си́лою, / жены́ му́жествоваша на горча́йшаго мучи́теля, / и побежде́ние ма́тернее испра́вивше, / па́ки в сла́дости ра́йстей бы́ша, / в сла́ву Твою́ Ро́ждшагося от Жены́, / и спа́сшаго род челове́ческий.

Сла́ва, преподо́бнаго, глас то́йже:

От ко́рене блага́го благи́й прозябе́ плод, / и́же от младе́нства свяще́нный Симео́н, / благода́тию па́че, не́же млеко́м воспита́н, / и на ка́мень те́ло возвы́сив, к Бо́гу же превозвы́сив ра́зум, / небе́сное созда́ доброде́тельми жили́ще, / и с Боже́ственными си́лами лико́вне ше́ствуя, / Христа́ бысть жили́ще, Бо́га и Спа́са душ на́ших.

И ны́не, инди́кта. Глас 8. Ге́рманово:

Неизрече́нною му́дростию, / соста́вивый вся́ческая, Сло́ве Христе́ Бо́же, / времена́ и ле́та нам предложи́вый, / дела́ рук Твои́х благослови́, / и ве́рныя лю́ди Твоя́ си́лою Твое́ю возвесели́, / подая́ им кре́пость, я́ко Еди́н Благ и Человеколю́бец.

Та́же славосло́вие вели́кое.

И по Трисвято́м, тропа́рь инди́кта: Сла́ва, свята́го: И ны́не: Ра́дуйся, Обра́дованная: Ектении́, и отпу́ст, и час 1-й: На 1-м ча́се тропа́рь инди́кта: Сла́ва, свята́го: И ны́не, Богоро́дичен часо́в. По Трисвято́м, конда́к инди́кта, и свята́го, глаго́лем пременя́юще. И про́чая, и соверше́нный отпу́ст.

На литурги́и: Блаже́нна от кано́на инди́кта, песнь 3-я, на 4: и преподо́бнаго, песнь 6-я на 4. По вхо́де тропа́рь, пре́жде инди́кта, и Богоро́дицы: Ра́дуйся, Обра́дованная: и преподо́бнаго. Сла́ва, конда́к свята́го: И ны́не, конда́к инди́кта. (А́ще же храм Богоро́дицы: И ны́не, хра́ма Богоро́дицы: инди́кта же конда́к глаго́ли в нача́ле.) Проки́мен инди́кта, глас 3: Ве́лий Госпо́дь наш, и ве́лия кре́пость Его́, и ра́зума Его́ несть числа́. Стих: Хвали́те Го́спода, яко благ псало́м. И преподо́бнаго: Проки́мен, глас 7: Честна́ пред Го́сподем смерть преподо́бных Его́. Апо́стол к Тимофе́ю, зача́ло 282: Ча́до Тимофе́е, молю́ у́бо пре́жде: И преподо́бнаго к Колосса́ем, зача́ло 258: Бра́тие, облецы́теся у́бо: Аллилу́иа, глас 4: Тебе́ подоба́ет песнь, Бо́же, в Сио́не. Стих: Благослови́ши вене́ц ле́та бла́гости Твоея́, Го́споди. И преподо́бнаго: Блаже́н муж, боя́йся Го́спода, в за́поведех Его́ восхо́щет зело́. Ева́нгелие Луки́, зача́ло 13: Во вре́мя о́но, вни́де Иису́с в Назаре́т, иде́же бе воспита́н: И преподо́бнаго; Матфе́а, зача́ло 43: Вся Мне предана́ суть: Прича́стен: Благослови́ши вене́ц ле́та бла́гости Твоея́, Го́споди. Други́й: В па́мять ве́чную: Дневны́й же Апо́стол и Ева́нгелие вычита́ем напреди́.

ЗРИ

Подоба́ет ве́дати: А́ще случи́тся пе́рвый день ме́сяца сентября́ в неде́лю, оставля́ется слу́жба святы́х жен, и пое́тся егда́ екклисиа́рх рассу́дит. Пое́тся же воскре́сни слу́жба со воссле́дованием инди́кта, и преподо́бнаго Симео́на еще́: На ма́лей вече́рни стихи́ры воскре́сны, и Богоро́дицы, по обы́чаю. Тропа́рь воскре́сен. Сла́ва, и ны́не, Богоро́дичен. На вели́цей вече́рни пое́м, Блаже́н муж: кафи́зму всю. На Го́споди, воззва́х, стихи́ры воскре́сны 3: и восто́чен еди́н: и инди́кта три: и свята́го три. Сла́ва, инди́кта: И ны́не, Богоро́дичен гла́са. И чте́ний инди́кта два: и свята́го еди́но. На лити́и стихи́ра хра́ма: и инди́кта стихи́ры стихо́вныя. Сла́ва, свята́го: И ны́не, инди́кта, пи́сан на хвали́тех. На стихо́вне, стихи́ры воскре́сны, по алфави́ту, с припе́вы их. Сла́ва, свята́го: И ны́не, инди́кта, На благослове́нии хлебо́в, Богоро́дице, Де́во, ра́дуйся: два́жды, и инди́кта, еди́ножды. И чте́ние в посла́ниих апо́стольских. На у́трени, на Бог Госпо́дь, тропа́рь воскре́сен, два́жды: Сла́ва, свята́го: И ны́не, инди́кта. По кафи́змах седа́льны воскре́сны с Богоро́дичны их, и чте́ние в толкова́ниих Ева́нгельских, е́же на ряды́. По непоро́чных тропари́, и ипакои́: и чте́ние. Степе́нны, и проки́мен гла́са, и Вся́кое дыха́ние: Ева́нгелие воскре́сное. Воскресе́ние Христо́во: Псалом 50. Стихи́ра воскре́сна. Кано́н воскре́сен со ирмосо́м на 4: и Богоро́дицы на два: и инди́кта на 4: и свята́го на 4. Катава́сиа: Крест начерта́в: По 3-й песни, конда́к инди́кта, и свята́го: и седа́лен, свята́го, два́жды. Сла́ва, и ны́не, инди́кта. И чте́ние жития́ свята́го Симео́на. По 6-й пе́сни, конда́к воскре́сен, и и́кос. И чтем про́лог. На 9-й пе́сни пое́м, Честне́йшую: Свети́лен воскре́сный: Сла́ва, свята́го: И ны́не, инди́кта. На хвали́тех стихи́ры воскре́сны 4: и инди́кта три, глас 3: Преве́чное сло́во: с припе́вом инди́кта. То́же самогла́сен свята́го, глас 2, с припе́вом: Честна́ пред Го́сподем смерть преподо́бных Его́. От ко́рене блага́го: Сла́ва, стихи́ра Ева́нгельская: И ны́не: Преблагослове́нна еси́: Славосло́вие вели́кое. По Трисвято́м, тропа́рь воскре́сен то́чию. Ектении́. И отпу́ст. И оглаше́ние. И обы́чное исхожде́ние. И час 1, в притво́ре. И коне́чный отпу́ст. На часе́х, глаго́лем тропа́рь, воскре́сен, Сла́ва, инди́кта: И ны́не, Богоро́дичен часо́в. По О́тче наш: конда́к инди́кта. На 3-м часе, тропа́рь воскре́сен: Сла́ва, свята́го: И ны́не, Богоро́дичен часо́в. По О́тче наш, конда́к свята́го. Та́кожде и на про́чих часе́х, конда́к воскресе́н, и инди́кта, и свята́го, глаго́лем пременя́юще.

На литурги́и, Блаже́нна воскре́сна гла́са, на 4: и от кано́на инди́кта песнь 3, на 4: и свята́го песнь 6, на 4. По вхо́де тропа́рь воскре́сен: и инди́кта, и свята́го: конда́к воскре́сен: Сла́ва, свята́го: И ны́не, инди́кта. Проки́мен, Апо́стол, Аллилу́иа, и Ева́нгелие, пре́жде инди́кта, воскре́сно же под зача́ло: та́же свята́го. Прича́стен инди́кта: пото́м свята́го.