Слу́жба Пресвяте́й Богоро́дице в честь Ея́ святы́я ико́ны «Всеблаже́нныя»

На вече́рни стихосло́вим 1 статию́: Блаже́н муж: На Го́споди, воззва́х, поста́вим стихо́в 8 и пое́м стихи́ры подо́бны инди́кта 3 и Всеблаже́нная на 5.

Глас 1. Подо́бен: О ди́вное чу́до:

Днесь све́тлое торжество́ ве́рным, Де́во, лучеза́рно возсия́. / Веселя́тся небеса́ и сликовству́ет земля́. / Сра́дуется же Христо́ва старе́йшая Це́рковь, / и красу́ется во Христе́ пра́здник Твой, Всенепоро́чная, све́тло пра́зднующи. / И Зижди́тель Вели́кий, во псалме́х и пе́ниих спрославля́ется суще́ственне, Всесвята́я Всеблаже́нная.

Днесь в пе́ниих све́тлых правосла́вно Христа́ сла́вяще, Де́во, / соверша́ем Твой честны́й ца́рственный пра́здник. / Ты бо еси́ вои́стину у́мных Арха́нгелов Всецари́ца: / сего́ ра́ди Тя, Ма́ти Бо́жия, со А́нгелы всегда́ ублажа́ем. / Благода́тная, ра́дуйся / ве́рных спасе́ние: / предста́тельство ми́ра, Всесвята́я Всеблаже́нная.

Днесь торжество́ Твое́, Де́во, / благогове́йно со А́нгелы соверша́ем, / почита́юще Твой честны́й и свяще́нный о́браз. / Веселя́тся ны́не лю́дие Богоспаса́емаго гра́да Каза́ни, / благогове́йно почита́юще Богоподо́бнаго Твоего́ ли́ка изображе́ние, / и во умиле́нии взыва́ют: / Всечестна́я Всеблаже́нная, Сы́на Твоего́ моли́ о нас, любо́вию чту́щих Тя.

Сла́ва: инди́кта, и ны́не: Всеблаже́нная, глас 6: Днесь созыва́ет нас Богоро́дицы свяще́нное торжество́. / В ра́дости у́бо и весе́лии к честне́й Ея́ ико́не припа́дающе возопии́м глаго́люще: / Богоро́дице Всеблаже́нная, / хода́таице и покро́в по Бо́зе к Тебе́ прибега́ющих, / сохрани́ град Твой невреди́м от сопроти́вных нападе́ний. / Непобеди́мым бо Твои́м предста́тельством мир да́руеши и очище́ние грехо́в, / с любо́вию покланя́ющимся ико́не Твое́й, Пречи́стая.

Вход. Све́те Ти́хий: проки́мен дне и чте́ние, от ни́хже два инди́кта и еди́но Всеблаже́нныя, сицево́е:

Проро́чества Иезекии́лева чте́ние.

Та́ко глаго́лет Госпо́дь: бу́дет от дне осма́го и про́чее: (зри 8 сентября́).

На лити́и стихи́ры, глас 1, подо́бен: Небе́сных чино́в:

Возсия́ ца́рствующему гра́ду па́ки / светоза́рная и всесла́вная, всепра́зднственная па́мять / о́браза честна́го па́че ума́ бы́вшая Богоотрокови́цы, / к Ней у́бо ра́достно восклица́юще ве́рою те́плою и се́рдцем ублажи́м.

Со благогове́нием лобыза́ем вси, Всеблаже́нная, свяще́нную Твою́ и святу́ю ико́ну: / те́плое утеше́ние в ско́рбех всегда́ сию́ иму́ще, / жите́йскими искуше́нии одержи́ми, Богоро́дице Присноде́во.

Благоче́стия ча́да прииди́те, / стеце́мся на Боже́ственную па́мять всечестна́го о́браза су́щия Богоро́дицы / и благогове́йно к Ней воззове́м: от враг неви́димых и ви́димых чту́щия Тя сохрани́.

Сла́ва, и ны́не, глас 8:

Ду́хом Святы́м заче́тная Богочелове́ка, Пречи́стая Де́во, / Всеблаже́нная, те́плая Хода́таица к Бо́гу су́щая, / ве́рно Тебе́ покланя́ющихся сохрани́. / Це́рковь си́лою Твое́ю укрепи́, даю́щи кре́пость на супоста́ты, / Еди́на Предста́тельница и Помо́щница.

На стихо́вне стихи́ры самогла́сны инди́кта.

Сла́ва, и ны́не, Всеблаже́нныя, глас 5:

Прииди́те, празднолю́бцев собра́ние, / соше́дшеся днесь, в ра́дости торжеству́ем. / Прииди́те пе́нии пра́зднественными воспои́м честну́ю ико́ну Всеблаже́нныя, / сия́ бо па́губы избежа́вши ди́вно сохране́на есть во всечестне́м сем и боже́ственнем хра́ме. / И се ны́не предлежи́т ве́рным в поклоне́ние, / подаю́щи оби́лие исцеле́ний благогове́йно покланя́ющимся и прося́щим предста́тельства Твоего́, Всеблаже́нная.

На благослове́нии хлебо́в тропа́рь Всеблаже́нныя, глас 4, подо́бен: Ско́ро предвари́:

Торжество́ днесь пра́зднуем све́тлое, / се бо предлежи́т, о Всеблаже́нная, ико́на Твоя́ Всечестна́я, / к ней же любо́вию се́рдца вси приходя́ще, Влады́чице, поклоня́емся и те́пло Тебе́ вопие́м: / изба́ви нас от бед и обстоя́ний.

Тропа́рь инди́кта еди́ножды, а иде́же несть бде́ния: Два́жды Тропа́рь инди́кта.

Сла́ва, и ны́не: Всеблаже́нныя.

На у́трени, на Бог Госпо́дь, тропари́: инди́кта два́жды, сла́ва, и ны́не: Всеблаже́нныя еди́ножды.

По 1-й кафи́зме седа́лен инди́кта. Сла́ва, и ны́не, Всеблаже́нныя. Глас 8, подо́бен: Прему́дрости и Сло́ва:

От честны́я Твоея́ ико́ны напа́сти вся́ко ума́ливши, Ма́ти Бо́жия, / сию́ сохрани́ла еси́, благода́ти исто́чник всем приходя́щим бо ве́рою мир да́рует / и с небесе́ источа́ет им исцеле́ния. / Те́мже по до́лгу благогове́йно покланя́емся ей, Всеблаже́нная, / и с ве́рою Тебе́ взыва́ем, скорбми́ одержи́ми: / предста́тельствуй у Сы́на Твоего́ и Бо́га, да бу́дет от претыка́ний Изба́витель / и Жи́зни Ве́чныя Пода́тель Всеми́лостивый.

По 2-й кафи́зме, седа́лен инди́кта. Сла́ва, и ны́не, Всеблаже́нныя. Глас 4, подо́бен: Удиви́ся Ио́сиф:

Свята́я и благода́тная ико́на Твоя́, Пречи́стая, / напа́стей и огня́ избе́гши, / па́губы и тле́ния ди́вно невреди́ма сохра́ншися, / благода́ть неисчерпа́емую ве́рным излива́ет ще́дро, Всеблаже́нная. / Сего́ ра́ди согла́сно днесь соверша́ем свяще́нное Твое́ торжество́, Де́во: / спаса́й покланя́ющихся ико́не Твое́й, Всечестна́я.

По полиеле́и, седа́лен Всеблаже́нныя два́жды. Глас 1, подо́бен: Гроб Твой, Спа́се:

Боже́ственная Твоя́ ико́на, Всесвята́я Де́во, / исцеле́ний исто́чник излива́ет незави́стно и кре́пость подае́т с ве́рою прибега́ющим. / Те́мже вси, всеблагогове́йно покланя́ющеся, / лобыза́ем Твой о́браз, благода́ть источа́ющий, Честна́я Всеблаже́нная.

Та́же 1-й антифо́н 4-го гла́са. Проки́мен: Помяну́ И́мя Твое́:

Ева́нгелие от Луки́, зача́ло 4: Во дни о́ны, воста́вши Мариа́м: и псало́м 50-й. Сла́ва: Моли́твами Богоро́дицы: И ны́не: Моли́твами Богоро́дицы.

Та́же стих: Поми́луй мя, Бо́же: и пое́м самогла́сен инди́кта: И́же в му́дрости вся соде́тельствовавый (зри на стихо́вне).

Та́же кано́н инди́кта со ирмосы́ на 6 и Всеблаже́нныя на 8. Глас 1.

Песнь 1: Песнь побе́дную:

Днесь возсия́ Всенепоро́чныя Де́вы торжество́. / Прииди́те у́бо, празднолю́бцы, / согла́сными пе́сньми и пе́нии ра́достно сию́ воспои́м.

Боже́ственное и всенепоро́чное торжество́ Богоро́дицы соверша́юще, / притеце́м, богому́дрии, / рука́ми пле́щуще све́тло, и ду́хом Боголе́пно пе́сньми почти́м.

Чи́стая Всеблаже́нная, Всечестна́я Отрокови́це, / све́тлое Твое́ торжество́ ра́достно соверша́юще, / вели́чия Твоя́ благогове́йными мы́сльми ве́рнии вси почита́ем.

Мари́е Всепе́тая, Отрокови́це Де́во, / всечестну́ю па́мять Твою́ све́тло пра́зднующе, / весе́лою душе́ю сла́ву Твое́ю всеблагогове́йно ны́не воспева́ем.

Катава́сиа: Крест начерта́в:

Песнь 3: Да утверди́тся се́рдце мое́:

Обетова́ние предве́чное исполня́ющи, Отрокови́це Всенепоро́чная, / и от непло́дныя ма́тере, я́ко цвет произра́сши, / сме́ртным всем дарова́ла еси́ ра́дость неизглаго́ланную.

В Рождестве́ Твое́м возра́довашася честни́и роди́тели Твои́, Отрокови́це, / Иоаки́м достохва́льный и А́нна всечестна́я : / приводя́ше же Бо́гови, Тя преда́ша ве́рно.

Свяще́нник и проро́к Заха́риа прия́т Тя внутрь олтаря́, / свещено́сныя же де́вы све́тло стеко́шася к Созда́телю, / воспева́юще песнь благода́рственную.

Воспита́вшаяся во Свята́я Святы́х, Отрокови́це Всенепоро́чная, / пребыла́ еси́ вся чи́ста, и свя́та и нескве́рна: / от А́нгела бо приима́ла еси́ пи́щу небе́сную.

По 3-й песни конда́к и и́кос инди́кта. Седа́лен инди́кта. Сла́ва, и ны́не, Всеблаже́нныя, зри по 2-м стихосло́вии: Свята́я и благода́тная ико́на Твоя́:

Песнь 4: Духом провидя:

Арха́нгел по́слан бысть с высоты́ небе́с, / благовеству́яй та́йну стра́шную. / Во чре́ве же Твое́м несказа́нно нося́щи и ро́ждши всех Творца́, / спасла́ еси́ челове́ка, Влады́чице.

Безневе́стная Де́во, Честна́я Голуби́це, / Бо́га Сло́ва безнача́льнаго родила́ еси́ на земли́, / и пре́жде рождества́ Де́ва просия́вши, / по рождестве́ же вои́стину освяще́на пребы́вши, Мари́е Богоневе́сто.

Во страну́ Еги́петскую пришла́ еси́, о Честна́я, / и чуде́с стра́шных самови́дица была́ еси́: / Сы́на же Твоего́ на дре́ве пове́шена и во гро́бе но́ве заключе́нна ви́дела еси́, воскре́сша тридне́вно.

Я́ко одушевле́нный обла́к и столп све́та, / Светода́вца Со́лнца показа́ла еси́ нам: / на небеса́ же преста́вилася еси́, Благослове́нная, / в позлаще́нней красоте́ преиспещре́на, сла́ва А́нгелов, Всецари́це.

Песнь 5: Твой мир даждь нам:

Сын у́бо Твой, Всечестна́я, / дарова́л есть ве́рным Боже́ственнаго ли́ка нерукотворе́нное изображе́ние: / Ты же, Де́во Всеблаже́нная, ми́рови честну́ю Твою́ ико́ну оста́вила еси́.

Пречи́стую ико́ну Твою́, Ма́ти Бо́жия, / Богосве́тлыми благода́тьми облиста́ла еси́: / в цари́це же градо́в Цари́ца боже́ственных А́нгелов сию́ возложи́ла еси́.

Боже́ственная Твоя́ ико́на, и честна́я, Всеблаже́нная, / мно́гия всечестны́я хра́мы премину́вши, / прославлена всели́ся во хра́ме Боже́ственнем сла́внаго Победоно́сца.

Всечестна́я ико́на Твоя́, Пречи́стая Де́во, / ца́рствующаго гра́да похвала́ есть, / и с ве́рою прибега́ющим бога́тно излива́ет оби́льную Твою́ благода́ть.

Песнь 6: Проро́ка Ио́ну:

Проро́к помоли́вся, свободи́ся тле́ния: / мы же лобыза́юще ико́ну Твою́, честна́я Богоневе́сто, стра́шных бед ве́рою избавля́емся.

Све́тлый Твой и честны́й пра́здник соверша́юще / и мы́сленных исто́чников реки поче́рпывающе, Всепе́тая, / Твою́ ико́ну лобыза́ем.

Неисчерпа́емь исто́чник дарова́ний свяще́нных показу́ется / всепречи́стая ико́на ли́ка Твоего́, Всенескве́рная, / всему́ ми́ру благода́ть посыла́ющи.

Свята́я Твоя́ ико́на, Всеблаже́нная Чи́стая, / вели́кия и честны́я це́ркве Христо́вы блиста́ние есть ве́лие и украше́ние.

Конда́к. Глас 4, подо́бен: Вознесы́йся на Крест:

Во пра́здник Твой соше́дшеся, ве́рнии, / свяще́нное ко сла́ве Бо́жией торжество́ Твое́, Влады́чице, днесь всеблагогове́йно соверша́ем, любо́вию же чту́ще честну́ю ико́ну Твою́, / Тебе́ песносло́вим вси в ра́дости: / ра́дуйся, Де́во Честна́я Всеблаже́нная.

И́кос, подо́бен: И́же до тре́тияго Небесе́:

Пре́жде век от Бо́га я́сно избра́нная, и Ма́ти бы́вшая всех Царя́, Его́же незри́мый о́браз пло́тию обложи́вшая, / и зело́ помраче́нный о́браз Ада́мов неизрече́нно возобрази́вшая / и Боже́ственною си́лою нача́льника тьмы уби́вшая, / и возбра́нная Воево́да показа́вшаяся, / соблюди́ град сей и спаси́ лю́ди христоимени́тыя, Богоро́дице, ико́ну Твою́ чту́щия и вопию́щия Тебе́ те́пло: / ра́дуйся, Де́во Честна́я Всеблаже́нная.

Чте́ние инди́кта и про́чая толкова́ния чте́ния.

Песнь 7: Тебе́ у́мную:

Име́яше у́бо пре́жде Киво́т Богода́нный ски́ния свиде́ния. / Соломо́нов же храм той унасле́дова, я́ко Боже́ственное украше́ние: Твой же о́браз, Де́во, иму́щи Христо́ва Це́рковь, све́тло весели́тся.

Дре́вле игра́я Богооте́ц пред сенны́м ковче́гом скака́ше: / христоимени́тии же лю́дие похваля́ются, чту́ще, я́ко Киво́т святы́ни в Це́ркви Христо́вой, всечестну́ю ико́ну Твою́, Всеблаже́нная.

Во огнь лю́тый ико́ны вверга́ху иконобо́рцы зломы́слении: / Феодо́ра же цари́ца ины́я воздвиже́, я́ко благоче́стия побе́дное зна́мение: ве́рнии же ны́не лобыза́ют свяще́нную Твою́ ико́ну, Честна́я Всеблаже́нная.

Ма́ти Непоро́чная, Богоро́дице Всепречи́стая, обогати́хомся ве́рнии, / изображе́ние лица́ Твоего́ я́ко вои́стину многоце́нное сокро́вище иму́ще: и́бо и мы с ве́рою чту́ще Твою́ ико́ну, чтим Первоо́бразное.

Песнь 8: Его́же ужаса́ются А́нгели:

О́бразу власти́теля нечести́ваго посмея́вшеся о́троцы, изба́вишася от пе́щи и пла́мене. / Мы же, почита́юще Твою́ ико́ну честну́ю, избавля́емся от бед вся́ческих, Богоро́дице.

Ико́не поклоне́ние Лев царь непрекло́нно лю́дем запрети́ повеле́нием стра́шным. / Ты же, Чи́стая, дае́ши ве́рным сокро́вище, Твоего́ ли́ка, Де́во, всечестну́ю ико́ну.

Возбра́ннии борцы́ за ико́ны Боже́ственныя го́ресть мук тя́жких претерпе́ша, / оба́че чту́щие честны́й о́браз Твой, Де́во, спаса́ются от вся́ких бед.

О́бразы и куми́ры служе́ния нечести́ваго тле́нием исчезо́ша. / И се уже́ благогове́йно сла́вим вси ико́ну Твою́, Пречи́стая Де́во, во вся ве́ки.

Песнь 9: Светоно́сный о́блак:

Я́ко день лучеза́рный и све́та Ма́ти су́щи, / всем испуща́еши всесве́тло спасе́ния лучи́: / сего́ ра́ди Тя, Всепречи́стая, ны́не в пе́ниих почита́юще, све́тло веселя́щеся, вси ве́рнии соверша́ем честны́й Твой пра́здник.

Светообра́зных А́нгел и Херуви́м Вы́сшую и Небе́с Простра́ннейшую, и Ма́терь Де́ву славосло́вяще вои́стину, / и Тя велича́юще, Всенепоро́чная, / честне́й Твое́й ико́не с любо́вию покланя́емся благоче́стно.

К свяще́нному о́бразу Всепречи́стаго Ли́ка Твоего́, Чи́стая Всеблаже́нная, / благоче́стно припа́дающе честни́и патриа́рси и весь причт, / и ли́ки дев, и лю́дие, покланя́емся и сла́вим всех Творца́.

Апо́столи Богоно́снии, Твое́ те́ло погреба́юще, / мир арома́ты чи́стыми пома́заша дре́вле, / ико́ну же Твою́, Чи́стая Де́во, Всецари́це, А́нгели стоя́ще незри́мо Боже́ственными пе́сньми почита́ют благогове́йно.

Сла́ва, Тро́ичен: Пре́жде век сый Зижди́тель всех Бо́же, / Безнача́льне О́тче, Сы́не и Ду́ше, Еди́но Божество́ и́стинное, Тро́ице Единосу́щная и Сопресто́льная, / моли́твами Всечи́стыя соблюди́ ве́рныя лю́ди Твоя́.

И ны́не: Славосло́вим, Де́во, Твое́ нетле́нное рождество́ / и благоче́стно покланя́емся честне́й Твое́й ико́не, / да изба́вимся искуше́ний и благода́ть всегда́ су́щую почерпе́м: / сего́ ра́ди Твои́ми мольба́ми покры́й, соблюди́ на Тя упова́ющих.

Ексапостила́рии: два инди́кта и Всеблаже́нныя.

Подо́бен: Со ученики́ взы́дем:

А́нгельски Тя пое́м, Богоро́дице Де́во, / я́ко Христа́ родила́ еси́, Спаси́теля ми́ру. / Я́ко ма́тернее у́бо дерзнове́ние к Нему́ иму́щая, / непреста́нно моли́ со все́ми святы́ми о нас, / Твое́ торжество́ соверша́ющих и поклоня́ющихся честне́й ико́не Твое́й, Всечи́стая.

На хвали́тех поста́вим стихов 6, и пое́м стихи́ры самогла́сны инди́кта 3, и 3 стихи́ры Всеблаже́нныя.

Глас 4, подо́бен: Я́ко до́бля в му́ченицех:

Влады́чица Всеблаже́нная изря́дно Ты яви́лася еси́, Пречи́стая, / зача́вши Невмести́маго и во объя́тиих держа́вши вся Держа́щаго / и глаго́лом си́лы Своея́ нося́щаго мир весь, Всесвята́я Де́во: / ра́дуйся селе́ние Спа́са бы́вшая и кля́тву нам разреши́вшая.

Велича́ем и почита́ем рождество́ Твое́, Пречи́стая, / во псалме́х и пе́ниих ублажа́юще Тя, чи́стую Присноде́ву, / несказа́нно ро́ждшую Богочелове́ка Христа́; нас искупи́вшаго. / Ра́дуйся, Влады́чице, Всеблаже́нная Отрокови́це: / ра́дуйся Еди́на, Ю́же всегда́ ублажа́т ро́ди, я́коже предрекла́ еси́.

Ро́ди вси язы́ков, Всечи́стая, ублажа́ют Присноблаже́нную и Богоневе́сту, / Ю́же Христо́м облагода́рствова, / показа́ же всегда́ су́щий исто́чник исцеле́ний многоразли́чных и чуде́с ве́рующим Сы́ну Твоему́, Всеблаже́нная Отрокови́це, / Его же моли́ непреста́нно о чту́щих Тя любо́вию.

Сла́ва, инди́кта: Неизрече́нною му́дростию:

И ны́не, Всеблаже́нныя. Глас 8:

Ду́хом Святы́м заче́ншая Богочелове́ка, Пречи́стая Де́во, / Всеблаже́нная, те́плая хода́таица к Бо́гу су́щая, / ве́рою Тебе́ покланя́ющихся сохрани́. / Це́рковь си́лою Твое́ю укрепи́, даю́щи кре́пость на супоста́ты, / Еди́на Предста́тельница и помо́щница.

Славосло́вие вели́кое и отпусти́телъный тропа́рь Всеблаже́нныя.

На литурги́и Блаже́нны инди́кта песнь 3 и 4 и Всеблаже́нныя песнь 6 на 4. По вхо́де тропа́рь инди́кта и Всеблаже́нныя. Сла́ва: конда́к инди́кта: И ны́не: Всеблаже́нныя. Проки́мен, Апо́стол, Ева́нгелие и прича́стен инди́кта и Богоро́дицы.

А́ще случи́тся пра́здник инди́кта и Всеблаже́нныя во вся́кий ины́й день, кроме́ неде́ли, на вече́рни, по предначина́тельном (псалме́) и по Блаже́н муж, пое́м на Го́споди, воззва́х, стихи́ры на 8: инди́кта 3 и Всеблаже́нныя 3: повторя́юще пе́рвыя две. Сла́ва, инди́кта: И́же со Ду́хом Святы́м: И ны́не, Всеблаже́нныя: Днесь созыва́ет нас: Вход. Све́те Ти́хий: проки́мен дне и чте́ния: Дух Госпо́день на Мне: и прочая. Глаго́ла Госпо́дь сыно́м изра́илевым: и прочая. Та́ко глаго́лет Госпо́дь: бу́дет от дне осма́го: (зри 8 септе́мвриа). На лити́и стихи́ры Всеблаже́нныя, глас 1, подо́бен: Небе́сных чино́в: Сла́ва, и ны́не, Всеблаже́нныя: Ду́хом Святы́м заче́ншая: На благослове́нии хлебо́в, тропа́рь Всеблаже́нныя два́жды и инди́кта еди́ножды. На стихо́вне инди́кта 3. Сла́ва, и ны́не, Всеблаже́нныя: Прииди́те, празднолю́бцев собра́ние: А́ще же несть бде́ния: тропа́рь инди́кта: Сла́ва, и ны́не, Всеблаже́нныя: Торжество́ днесь пра́зднуем све́тлое: На полу́нощнице по 50-м псалме́, Трисвято́е, отпусти́тельный Всеблаже́нныя и шестопса́лмие. На у́трене: на Бог Госпо́дь, тропа́рь инди́кта. Сла́ва, и ны́не, Всеблаже́нныя. По 1 стихосло́вии седа́лен инди́кта: И́же времена́ плодоно́сна: Сла́ва, и ны́не, Всеблаже́нныя: От честны́я Твоея́ ико́ны: по 2 стихословии паки седа́лен инди́кта: Я́ко Влады́це всех: Сла́ва, и ны́не, Всеблаже́нныя: Свята́я и благода́тная ико́на Твоя́: Полиеле́й, велича́ние: Досто́йно есть: Стихи́: Отрыгну́ се́рдце мое́: Ектения́ ма́лая. Седа́лен Всеблаже́нныя: Боже́ственная Твоя́ ико́на: два́жды. Та́же 1-й антифо́н 4 гла́са: Проки́мен: Помяну́ и́мя Твое́: со стихи́: Слы́ши дщи: Вся́кое дыха́ние: Ева́нгелие: Во дни о́ны, воста́вши Мариа́м: 50 псало́м. Сла́ва, Моли́твами Богоро́дицы: И ны́не, то́йже. Стих: Поми́луй мя Бо́же: и стихи́ра самогла́сна инди́кта: И́же в му́дрости вся: Спаси́, Бо́же, лю́ди Твоя́: Го́споди, поми́луй (12 раз) и во́зглас: Ми́лостию и щедро́тами: По ря́ду кано́ны инди́кта со ирмосо́м на 6 и Всеблаже́нныя на 8. Катава́сиа: Кре́ст начерта́в: По 3-й пе́сни, конда́к с и́косом инди́кта, та́же седа́лен инди́кта: Сла́ва, и ны́не, седа́лен Всеблаже́нныя: Свята́я и благода́тная ико́на Твоя́: По 6-й пе́сни, конда́к и и́кос Всеблаже́нныя, чте́ние дне и про́чая. По 8-й пе́сни пое́м Честне́йшую: По 9-й, Та́ин eси: Ексапостила́рии два инди́кта и еди́н Всеблаже́нныя. На хвали́тех стихи́ры инди́кта 3 и Всеблаже́нныя 3. Сла́ва, инди́кта: Неизрече́нною му́дростию: И ны́не, Всеблаже́нныя: Ду́хом Святы́м заче́ншая: Славосло́вие вели́кое и тропа́рь Всеблаже́нныя.

На литурги́и, Блаже́нны от кано́на инди́кта, песнь 3-я, на 4: и Всеблаже́нныя, песнь 6-я на 4. По вхо́де тропа́рь инди́кта, Всеблаже́нныя. Сла́ва, конда́к инди́кта. И ны́не, Всеблаже́нныя. Проки́мен, Апо́стол, Ева́нгелие и прича́стен инди́кта и Всеблаже́нныя.

А́ще случи́тся в неде́лю: На вече́рни, по предначина́тельнем псалме́ и по 1 кафи́зме, пое́м на Го́споди, воззва́х, стихи́ры воскре́сны 3 и восто́чен 1, инди́кта 3 и Всеблаже́нныя 3. Сла́ва, инди́кта: И́же со Ду́хом Святы́м: И ны́не, Богоро́дичен 1-го гла́са. Вход. Све́те ти́хий: Проки́мен дне и чте́ния, я́коже предписа́ся. На лити́и стихи́ры Всеблаже́нныя, глас 1, подо́бен: Небе́сных чино́в: Сла́ва, и ны́не: Ду́хом Святы́м заче́ншая: стихи́ры на хвали́тех. На стихо́вне стихи́ры воскре́сны, сла́ва инди́кта, и ны́не Всеблаже́нныя. На благослове́нии хлебо́в, тропа́рь Всеблаже́нныя два́жды и инди́кта еди́ножды. А́ще несть бде́ния: тропа́рь воскре́сный, Сла́ва, инди́кта, И ны́не, Всеблаже́нныя.

На полу́нощницы: по 50-м псалме́, кано́н Тро́ичен, Тро́ичны, Трисвято́е, отпусти́тельный Всеблаже́нныя. На у́трени на Бог Госпо́дь, тропа́рь воскре́сен два́жды, Сла́ва, инди́кта, И ны́не, Всеблаже́нныя: По кафи́змах седа́льны воскре́сны и Богоро́дичны их. Полиеле́й. Велича́ние. Тропари́: Благослове́н eси́, Го́споди: ипакои́ и степе́нны гла́са. Проки́мен: Помяну́ и́мя Твое́: со стихи́ я́коже рече́ся. Вся́кое дыха́ние: Ева́нгелие: Во дни́ о́ны, воста́вши Мариа́м: Воскресе́ние Христо́во: псало́м 50, Сла́ва, Моли́твами Богоро́дицы: И ны́не, то́йже стих. Поми́луй мя, Бо́же: и стихи́ра Всеблаже́нныя. Та́же кано́ны: воскре́сный со ирмосо́м на 4, инди́кта на 4 и Всеблаже́нныя на 6. Катава́сиа: Крест начерта́в: по 3 пе́сни, конда́к воскре́сный со и́косом, та́же седа́лен инди́кта и Всеблаже́нныя. По 6 конда́к и и́кос Всеблаже́нныя и чте́ние, я́коже предрече́ся. По 8 песни Честне́йшую: по 9 катава́сиа, Та́ин eси́, Богоро́дице, рай: Свят Госпо́дь Бог наш: Ексапостила́рий воскре́сный, инди́кта и Всеблаже́нныя. На хвали́тех воскре́сны 3, инди́кта 2 и Всеблаже́нныя 3, с припе́вы их (зри септе́мвриа во 8 день). Сла́ва, инди́кта, И ны́не, Преблагослове́нна eси́: Славосло́вие вели́кое. Тропа́рь воскре́сный то́чию и про́чая.

На литурги́и: Блаже́нны гла́са на 4, инди́кта песнь 3-я на 4 и Всеблаже́нныя песнь 6-я на 4. По вхо́де тропари́: воскре́сный, инди́кта, Всеблаже́нныя. Та́же кондаки́: воскре́сен. Сла́ва, инди́кта, И ны́не, Всеблаже́нныя. Проки́мен, Апо́стол и Ева́нгелие, пре́жде инди́кта, воскре́сно же под зача́ло, та́кже Богоро́дицы. Прича́стен инди́кта и Богоро́дицы.