Слу́жба свято́му му́ченику Ма́манту; и преподо́бному отцу́ на́шему Иоа́нну По́стнику, Патриа́рху Царягра́да.

Ве́чер, обы́чная кафи́зма. На Го́споди, воззва́х, стихи́ры, глас 8. Подо́бен: О пресла́внаго чудесе́:

Кро́ви твое́й ка́плющи, Жизнода́вцу Христу́, кровь Свою́ тебе́ ра́ди излия́вшему, / приве́лся еси́ блаже́нне, / и́же и о́бщника тя сла́вы соде́я, / и ца́рства Своего́ сприча́стника, / я́ко до́бльствовавше на льсти́ваго, и лю́тыя сего́ ко́зни до конца́ угаси́вша.

Столп благоче́стия был еси́, / осно́ван тве́рдо на ка́мени ве́ры, / искуше́нми неги́блемь, и беда́ми, блаже́нне. / Со мно́гою бо бу́рею и волне́нием, / тебе́ прирази́вшияся во́лне, / твоея́ не низложи́ша неукло́нныя кре́пости: / му́ченическим бо венце́м украси́тися вожделе́л еси́.

Вопло́щшемуся Бо́гу на́шему, и стра́стию кре́стною низложи́вшему мучи́теля, / живоно́сным стопа́м страстоте́рпче, после́дуя, / в му́ченическое ра́дуяся вшел еси́ суди́лище, / и ра́нами протерза́емь, хваля́щагося погуби́ти мо́ре, / с пло́тию, му́чениче, уязви́л еси́, / и на зе́млю низложи́л еси́.

И́ны стихи́ры преподо́бнаго, глас 8, подо́бен то́йже:

О́тче Иоа́нне всече́стне, / мирска́го отступи́в мяте́жнаго смеше́ния, / Христо́вой же прите́кл еси́ тишине́ всепреподо́бне: / и виде́ния и Боже́ственнаго дея́ния, / всебога́тными я́сно сия́нии и́стинно обогати́лся еси́, / и ве́рным пре́дал еси́, / Боголе́пным житие́м уясня́емь блаже́нне.

О́тче Иоа́нне всече́стне, / ты оде́ждею че́стно, я́коже Ааро́н вторы́й украше́н, / святы́х свята́я ны́не зри́ши, / внутрь быв и вторы́я заве́сы. / О неизрече́ннаго твоего́ па́че ума́ сия́ния, / иера́рхов Боже́ственное удобре́ние, / Ему́же причасти́лся еси́.

О́тче Иоа́нне всему́дре, / Богови́ден быв нра́ва простото́ю, / Бо́гу ны́не предстои́ши, / соедине́нием лу́чшим, и непреста́нным манове́нием обожа́емь, / и отону́дным све́том исполня́ешь, / ума́ чистото́ю и души́ све́тлостию, / иера́рхов Боже́ственное украше́ние и свяще́ннейшее.

Сла́ва, му́ченика, глас 2. Византи́ево: Нов сад я́коже ма́слина на Бо́жии трапе́зе положи́лся еси́, / я́ко сын ходя́щих путе́м Госпо́дним: / муче́ния ра́ди благослови́ тя Госпо́дь, / и зри́ши блага́я Го́рняго Сио́на, наслажда́лся Боже́ственнаго ра́дования, / с роди́тельми вы́ну, Ма́манте достойнопе́тый: / и́мже о́бщники ны мольба́ми твои́ми бы́ти сотвори́.

И ны́не, Богоро́дичен, или́ Крестобогоро́дичен. Подо́бен: Егда́ от дре́ва: Егда́ нескве́рная А́гница ви́де Своего́ А́гнца, на заколе́ние я́ко челове́ка во́лею влеко́ма, / рыда́ющи глаго́лаше: / безча́дствовати Мя ны́не тщи́шися Христе́, Тебе́ ро́ждшую, / что сие́ сотвори́л еси́, Изба́вителю вся́ческих; / оба́че воспева́ю и сла́влю Твою́, ю́же па́че ума́ и сло́ва, / кра́йнюю бла́гость, Человеколю́бче.

На стихо́вне, окто́иха. Сла́ва, му́ченика, глас 4: Прииди́те, согла́сно ве́рнии, / па́мять соверши́м Ма́манта му́ченика, сей бо но́вый А́вель яви́ся нам: / я́коже бо он па́стырь ове́ц быв, / а́гнца на же́ртву пе́рвый приведе́, / и вене́ц страда́ния пе́рвый прия́т: / та́ко и сла́вный страстоно́сец пите́нными ста́ды преизя́ществовав, / себе́ сама́го же́ртву благоприя́тну Христу́ приведе́ муче́нием: / и дерзнове́ние име́я к Нему́, мир ми́ру про́сит, / и душа́м на́шым ве́лию ми́лость.

И ны́не: Богоро́дичен, или́ Крестобогоро́дичен. Подо́бен: Я́ко до́бля в му́ченицех: Распина́ема ви́дящи, и в ре́бра пробода́ема копие́м, Пречи́стая, Христа́ Человеколю́бца, / пла́каше вопию́щи: / что сие́ Сы́не Мой? / что Тебе́ неблагода́рнии людие возда́ша, / вме́сто я́же сотвори́л еси́ до́брая им? / и тщи́шися безча́дствовати Мя вселюбе́знейше? / дивлю́ся, Благоутро́бне, Твоему́ во́льному распя́тию.

Тропа́рь му́ченика, глас 4: Му́ченик Твой, Го́споди, Ма́мант, / во страда́нии свое́м вене́ц прия́т нетле́нный, от Тебе́, Бо́га на́шего: име́яй бо кре́пость Твою́, мучи́телей низложи́, / сокруши́ и де́монов немощны́я де́рзости, / того́ моли́твами спаси́ ду́шы на́ша.

Сла́ва, преподо́бного, глас то́йже: Пра́вило ве́ры и о́браз кро́тости, / воздержа́ния учи́теля, / яви́ тя ста́ду твоему́, / я́же веще́й и́стина: / сего́ ра́ди стяжа́л еси́ смире́нием высо́кая, / нището́ю бога́тая, о́тче Иоа́нне, / моли́ Христа́ Бо́га, спасти́ся душа́м на́шим.

И ны́не, Богоро́дичен, по гла́су: или́ Крестобогоро́дичен.

На у́трени кано́н Окто́иха еди́н, со ирмосо́м, на 6: и святы́х два.

Кано́н му́ченика, на 4. Творе́ние Феофа́ново. Глас 8.

Песнь 1.

Ирмо́с: Колесницегони́теля фарао́на погрузи́, / чудотворя́й иногда́ / Моисе́йский жезл, крестообра́зно порази́в, / и раздели́в мо́ре: / Изра́иля же беглеца́, пешехо́дца спасе́, / песнь Бо́гови воспева́юща.

Небеса́ обходя́ я́ко изря́ден му́ченик быв, / и Трисия́нныя зари́ сла́вне исполня́яся, / на земли́ че́ствующия твоя́ честны́й и светоно́сный день сконча́ния, / Боже́ственнаго просвеще́ния сподо́би.

Благоро́дие и по всем соверше́нное ума́ твоего́, / прове́дый Сло́во Ма́манте, / от пеле́н тя ра́зума испо́лни, / и до́брых сла́достьми многови́дно украси́, му́чениче страстоте́рпче всехва́льне.

Роди́телие твои́ непоро́чныя ве́ры предбе́дствующе, / во изгна́нии пре́лести, заключа́еми в темни́цах, / Бо́жиими веле́нми, прозябо́ша тебе́, / разори́вшаго многобо́жия соу́з.

Богоро́дичен: Пресла́вная о Тебе́ глаго́лашася в ро́дех родо́в, / я́же Бо́га Сло́ва во чре́ве вмести́вши, / чиста́ же пребыва́еши Богоро́дице Мари́е. / Тем Тя вси честву́им, по Бо́зе предста́тельство на́ше.

И́н кано́н преподо́бнаго Иоа́нна на 4. Творе́ние Германово. Глас то́йже.

Песнь 1.

Ирмо́с: Истря́сшему в мо́ри мучи́тельство фарао́не, / и Изра́иля су́шею наста́вльшему пои́м Христу́, я́ко просла́вися во ве́ки.

Возсия́вшему в ми́ре иера́рха му́драго, / ца́рствия сия́ющаго веле́нии, / воспои́м Христу́, я́ко просла́вися во ве́ки.

Просия́вшаго в ми́ре благоче́стия све́том, / и нече́стия мглу отгна́вшаго почти́м ве́рнии, / я́ко иера́рха вели́каго Иоа́нна.

Я́ко предстоя́ со а́нгелы непристу́пному Царю́, / соверша́ющим твою́ па́мять моли́ дарова́тися очище́нию, / священнопропове́дниче всеблаже́нне Иоа́нне.

Богоро́дичен: Я́ко заче́нши Преве́чное Безнача́льное Сло́во О́тчее, / и пло́тию ро́ждши па́че Сло́ва Всепе́тая, / моли́ приле́жно, е́же изба́витися нам от бед.

Песнь 3.

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Я́ко светоза́рну звезду́, / страстоте́рпца Ма́манта положи́ Христо́с на высоте́ Це́ркве Своея́, / страда́ний све́тлостьми, и пресла́вных чуде́с, / всю подсо́лнечную просвеща́юща.

Возше́д на го́ру и́стиннаго зна́ния, / и облиста́вся виде́нии ума́ чистото́ю, / естество́ безслове́сное, к слове́сному песнопе́нию, / Боже́ственными повеле́нии, блаже́нне, воздви́гл еси́.

Ю́ноша красе́н добро́тою был еси́. / Тем беззако́нно и́щущим я́ти тя, яви́лся еси́ непристу́пен, / прише́дшему на страсть, я́ко всех Го́споду приведе́ся.

Богоро́дичен: Не́бо простры́й, и земны́й, Пречи́стая, / круг содержа́й весь, естество́м Божества́, / на обья́тиих Твои́х пло́тию держи́мь бысть, / и ве́рным Тя утвержде́ние всем показа́.

Ин.

Ирмо́с: Утвержде́й сло́вом небеса́, / и зе́млю основа́вый на вода́х мно́гих: / утверди́ мя к пе́нию славосло́вия Твоего́ Го́споди.

Воздержа́нием о́тче, и моли́твою неукло́нною, / возше́л еси́ к вы́шнему гра́ду доброде́телей, Богоно́се, / иде́же сла́дости пото́к, пита́ешися.

Я́ко дерзнове́ние име́я к Бо́гу, / иера́рше преподо́бне Иоа́нне му́дре, / моли́ спасти́ся ве́рою соверша́ющым па́мять твою́.

Я́ко благочести́вых догма́тов наста́вник, / и му́дрых слове́с сказа́тель и́стинен, / венце́м увя́злся еси́ на е́реси, преподо́бне.

Богоро́дичен: Я́ко не́бо и Престо́л Тя Бо́жий, / воспева́ем вси Богороди́тельнице Чи́стая, / я́ко из Тебе́ яви́ся Иису́с Христо́с И́стина.

Седа́лен му́ченика, глас 8. Подо́бен: Прему́дрости: Благоче́стия сый рожде́ние че́стно, / нече́стия показа́лся еси́ потреби́тель, Ма́манте всехва́льне, си́лою Ду́ха: / в три́знищи бо лесть и́дольскую обличи́л еси́, / и благоде́рзостно Тро́ицу пе́ти пропове́дал еси́. / Те́мже и звере́м вдан быв страстоно́сче, / зве́ря умори́л еси́, и злонача́льнаго зми́я. / Сего́ ра́ди вопие́м ти: / моли́ Христа́ Бо́га, согреше́ний оставле́ние дарова́ти, / че́ствующим любо́вию святу́ю па́мять твою́.

Сла́ва, преподо́бнаго, глас 3. Подо́бен: Боже́ственныя ве́ры: Сосу́д Боже́ственный воздержа́ния, / бога́тство некрадо́мо благоче́стия показа́лся еси́, Иоа́нне блаже́нне, / в безстра́стии уясни́в житие́ твое́: / тре́бующыя обогати́в ми́лостынею о́тче преподо́бне, / Христа́ Бо́га моли́, дарова́ти нам ве́лию ми́лость.

И ны́не, Богоро́дичен: Боже́ственная ски́ния была́ еси́ Сло́ва, Еди́на Пречи́стая Де́во Ма́ти, / чистото́ю а́нгелы превозше́дшая, / па́че всех мене́ персть бы́вша, оскве́рнена пло́тскими прегреше́нми, / очи́сти моли́тв Твои́х Боже́ственными вода́ми, / подаю́щи Чи́стая, ве́лию ми́лость.

Крестобогоро́дичен: Нескве́рная А́гница Сло́ва, нетле́нная Де́во Ма́ти, / на Кресте́ зря́щи пове́шена, из Нея́ безболе́зненно Прозя́бшаго, / матероле́пно рыда́ющи взыва́ше: / увы́ Ча́до Мое́, ка́ко стра́ждеши, / хотя́ изба́вити от страсте́й безче́стия челове́ка.

Песнь 4.

Ирмо́с: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча. / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва Человеколю́бче.

Самово́льне к по́двигом отлучи́лся еси́, неужа́сно сла́вне, му́дростию: / Христа́ бо име́л еси́ помога́юща Боже́ственною си́лою, не́мощь твою́ утвержда́юща, / и свиде́теля показу́юща свои́х страда́ний, / и вы́шней све́тлости прича́стника.

Я́ко помо́щник и́же от Бо́га спу́тник твой, / покаря́шеся я́коже слове́снейшнй ди́вий зверь. / Божестве́нною бо любо́вию ты покори́л еси́ стра́сти безслове́снейшыя, красе́н яви́лся еси́ по́мыслом мудре́йшим, / безслове́сие враго́в побе́ждь.

Пред суди́лищи мучи́телей ты предста́, / Сло́ва воплоще́ние, блаже́нне, / проявле́ние возглаша́я, / и безбо́жия низлага́я свире́пство, / и вся несомне́нно пе́ти науча́я: / си́ле Твое́й сла́ва Человеколю́бче.

Богоро́дичен: Рожде́нием преесте́ственным Рождества́ Твоего́, / боле́зней грех разреши́ся, / и от кля́твы земноро́дных естество́ измени́ся, / Богороди́тельнице Всенепоро́чная, / и отверзо́шася до́льным Тебе́ ра́ди го́рняя, / и со а́нгелы челове́цы лику́ют.

Ин.

Ирмо́с: Та́йно проро́к предзря́, / от Де́вы Тя, Сло́ве, воплоща́ема, / пе́сненно вопия́ше: / Сла́ва си́ле Твое́й, Го́споди.

Иера́рха вси му́драго, в пе́снех восхвалим глаго́люще: / Богоно́се Иоа́нне, / моли́ся Го́споду приле́жно, спасти́ся нам.

Я́ко благочести́вых догма́тов насади́теля, / и му́дра иера́рха тя иму́ще Богоблаже́нне о́тче, / пе́сньми и пе́ньми восхваля́ем тя.

Свяще́нную твою́ па́мять ве́рнии, / первонача́льнице пита́телю сла́вне, иера́рше Госпо́день, / пе́ньми и пе́сньми пра́зднуем.

Богоро́дичен: Безневе́стная Неве́сто, / и Чи́стая и нескве́рная Ма́ти Христа́ Бо́га, Того́ непреста́нно моли́, / спасти́ ду́шы пою́щих Тя.

Песнь 5.

Ирмо́с: Вску́ю мя отри́нул еси́, / от Лица́ Твоего́, Све́те незаходи́мый; / и покры́ла мя есть чужда́я тма окая́ннаго. / Но обрати́ мя, и к Све́ту за́поведей Твои́х, / пути́ моя́ напр́ави, молю́ся.

Стру́жемь, ника́коже о телеси́ сла́вный Ма́мант попече́ся, / тле́ния дебельство́ растерза́тися отложи́в, / и ко́жныя совле́к ри́зы, / и оде́жду нетле́ния прие́м.

Благода́рственную хвалу́ пел еси́ Зижди́телю твоему́, / ископова́емь в ре́бра всеблаже́нне, / и глас с небесе́ услы́шал еси́ утвержда́ющь па́че по́мысл твой к лу́чшему, / и страда́ний боле́знь облегча́ющь.

В темни́це заключе́ну яви́ся с небесе́ тебе́ нося́щи пресла́вно виде́ние, / страстоте́рпче всеблаже́нне многострада́льне, / пи́щу нетле́ния, голуби́ца красне́йша: / тле́ния бо преде́лы премину́л еси.

Богоро́дичен: Воплоще́ния Боже́ственнаго, и премене́ния несказа́ннаго Ты бы́ла еси́ Хода́таица, / я́же пре́жде Со́лнца из Отца́ рожде́ннаго ро́ждши: / Тобо́ю бо естество́ земны́х Бо́гу совокупи́ся, / и на Престо́ле сла́вы посади́ся.

Ин.

Ирмо́с: От но́щи неве́дения, / Богове́дением просвети́вый концы́, / просвети́ мя у́тром человеколю́бия Твоего́, Го́споди.

Па́стырски пома́зался еси́ благоче́стия ми́ром, Богому́дре: / тем я́ко иера́рха вси восхваля́ем тя, преподо́бне.

Я́ко подража́тель сый апо́столов, Богому́дре сла́вне, / боле́зньми и бде́нии, / церко́вным предста́тельствовал еси́ лю́дем.

Ревни́телю Илии́, и Моисе́ю Богови́дцу поревнова́л еси́, о́тче священноявле́нне, / и ересенача́льники посрами́л еси́.

Богоро́дичен: Я́ко Цари́цу вси, и Царя́ всех ро́ждшую, / прииди́те со а́нгелом Благослове́нную почти́м.

Песнь 6.

Ирмо́с: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ша мя, / Бо́же спасе́ния моего́.

Ре́вностию к Богу распаля́емь свяще́ннейше, / о поджига́ющем пла́мени ника́коже попе́клся еси́, / Боже́ственным ороша́емь с небесе́ дожде́м, / страда́льче до́блественнейше.

Ю́ношам трие́м претвори́вши пещь в ро́су светоявле́нно, / Богому́дре всеблаже́нне, от пла́мене исхити́ тя, / и огня́ показа́ пресла́вно сильне́йша.

Велича́йшыя претерпева́я по́двиги, / яви́лся еси́ превелича́йш, в страда́льцех чу́ден, / в му́ченицех же иску́сен. / Тем и велича́йших тя подвигополо́жник воздая́ний сподо́би.

Богоро́дичен: Бы́хом о́бщницы Боже́ственному естеству́, Пречи́стая, / Боже́ственным рождество́м Твои́м: / и поко́й небе́сный со а́нгельскими чи́нми Тя восхваля́ющий, / во Христе́ насле́дствовахом.

Ин.

Ирмо́с: Я́коже проро́ка изба́вил еси́ из глубины́ преиспо́дняя, Христе́ Бо́же, / и мене́ от грехо́в мои́х изба́ви я́ко Человеколю́бец, / и упра́ви живо́т мой, молю́ся.

Церко́вную сла́ву украси́л еси́ Иоа́нне блаже́нне, / Боже́ственными твои́ми догма́ты и му́дрыми наказа́нии, / е́реси же исчезнове́ны сотвори́л еси́.

Я́ко свети́льник благоче́стия, / догма́тов твои́х добро́тою облиста́л еси́ по всей тва́ри, Богому́дре учи́телю, / и помрачи́л еси́ е́реси сло́вом Бо́жиим.

Вме́сто меча́ язы́ком и сло́вом вооружи́вся преподо́бне, / буесло́вныя отсе́к еси́ уче́ния вся, / и уясни́л еси́ всем Тро́ицу я́ве.

Богоро́дичен: Рожде́йся из Де́вы и мир просвеще́й, Христе́ Бо́же, / и мене́ от прегреше́ний мои́х изба́ви я́ко Человеколю́бец, / и упра́ви жизнь мою́, молю́ся.

Конда́к, глас 3. Подо́бен: Де́ва днесь: Жезло́м, свя́те, от Бо́га тебе́ да́нным, / лю́ди твоя́ упаси́, на па́житех живоно́сных: / зве́ри же неви́димыя и неукроти́мыя / сокруши́ под но́ги тя пою́щих: / я́ко вси и́же в беда́х предста́теля тя те́пла, Ма́манте, и́мут.

И́кос: И́же по всей земли́ пресла́внаго тя му́ченика, / и на небесе́х со а́нгелы лику́юща, воспои́м, Ма́манте, / пе́рвее еле́ни в пусты́нях я́ве доя́ща, / и ны́не бога́тныя лю́ди Госпо́дня, жезло́м си́лы я́ко па́стыря до́бра пасу́ща, / и путеводя́ща на ме́сто злачно, / иде́же есть и́стинно райская сла́дость. / Тоя́ бо ра́ди мир оста́вил еси́, / я́ко да вси тя предста́теля, Ма́манте, те́пла и́мут.

Песнь 7.

Ирмо́с: Бо́жия снизхожде́ния огнь устыде́ся в Вавило́не иногда́, / сего́ ра́ди о́троцы в пещи́ ра́дованною ного́ю, / я́ко во цветни́це лику́юще, поя́ху: / благослове́н еси́ Бо́же оте́ц на́ших.

Пе́щи вид, я́коже хла́да потре́бное тебе́ испо́лни: / на дни бо мно́гия в той, Ма́манте, затворе́н, / не опали́лся еси́, вопи́я Сотво́ршему: / благослове́н Бог оте́ц на́ших.

А́нгелы сприе́мники, слико́вники тебе́, и о́бщники неизглаго́ланных пе́сней, / посреде́ пла́мене, му́чениче, име́л еси́. / С ни́ми же всех Влады́це взыва́л еси́: / благослове́н Бог оте́ц на́ших.

Я́ко ши́пок неувяда́емь, / я́ко от черто́га жени́х исходя́ красне́йший и́стинно, / от пе́щи попали́в безу́мныя, / и зря́щыя просвети́в зову́щыя: / благослове́н Бог оте́ц на́ших.

Богоро́дичен: Се ны́не испо́лнися Богоглаго́ливаго прорече́ние: / во утро́бе бо, Де́во, Бо́га Сло́ва име́ла еси́, / и родила́ еси́ Жизнода́вца, / Ему́же вси зове́м: благослове́н Бог оте́ц на́ших.

Ин.

Ирмо́с: В нача́ле зе́млю основа́вый, / и небеса́ сло́вом утверди́вый, / благослове́н еси́ во ве́ки. Го́споди, Бо́же оте́ц на́ших.

И́же на земли́ свети́льника показа́вый, / благочести́ваго и му́драго иера́рха, / благослове́н еси́ во ве́ки, Го́споди Бо́же оте́ц на́ших.

И́стиннаго Иоа́нна вели́каго па́стве твое́й па́стыря показа́вый, / благослове́н еси́ во ве́ки, Го́споди Бо́же оте́ц наших.

Плотска́я привоста́ния, о́тче, низложи́в, Христу́ вопия́л еси́: / благослове́н еси́ во ве́ки, Го́споди Бо́же оте́ц наших.

Богоро́дичен: Нас ра́ди роди́выйся из Де́вы, / и от врага́ изба́вивый мир, / благослове́н еси́ во ве́ки, Го́споди Бо́же оте́ц на́ших.

Песнь 8.

Ирмо́с: Седмери́цею пещь халде́йский мучи́тель, / Богочести́вым неи́стовно разжже́, / си́лою же лу́чшею, спасе́ны сия́ ви́дев, / Творцу́ и Изба́вителю вопия́ше: / о́троцы благослови́те, / свяще́нницы воспо́йте, / лю́дие превозноси́те во вся́ ве́ки.

Я́ко Дании́л зия́ния звере́й заусти́л еси́ / Боже́ственным Влады́ки призва́нием, сла́вне, / зми́я умертви́л еси́, злочести́выя посрами́л еси́, / и я́ко победи́тель на небесе́х поя́, живе́ши в весе́лии: / свяще́нницы, благослови́те, лю́дие, превозноси́те во вся ве́ки.

Побива́ху ка́мением тя, блаже́нне, / ка́мению служа́щий, и окамене́ннии душе́ю пребеззако́ннии, / о́ко воздвиза́юща свяще́нныя твоея́, му́чениче, души́, / к неразсе́дному и неукло́нному ка́меню, / и пою́ща усе́рдно: свяще́нницы благослови́те, лю́дие превозноси́те во вся ве́ки.

Подвигополо́жник свы́ше тебе́ простира́я вене́ц я́коже победи́телю, / и до́брый проше́дшу по́двиг пребога́те, возглаша́ет тебе́ е́же к Нему́ спеши́ти, честно́е и сладча́йшее ше́ствие, усе́рдно пою́щу: свяще́нницы благослови́те, лю́дие превозноси́те во вся ве́ки.

Богоро́дичен: Преесте́ственно зачала́ еси́, Су́щаго из Отца́ без ма́тере, / пребы́вши Де́ва и по рождестве́ Чи́стая: / Бо́жие бо соедине́ние обновля́ет естества́ в Тебе́, и обновля́ются существа́ преде́лы. / Тем Тя правосла́вно я́ко Бо́га ро́ждшую и́стинно Богоро́дицу пое́м во ве́ки.

Ин.

Ирмо́с: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте, и превозноси́те во вся ве́ки.

Моисе́ю подо́бяся, Треблаже́нне, на го́ру возше́л еси́ / и во мрак мы́сленный, благода́ти прие́м зако́н иера́рше: / тем воспева́ем Христа́ во ве́ки.

Лю́ди твоя́ упа́с, иера́рше, / еги́петскую пре́лесть отрази́л еси́, и Вавило́на страсте́й убежа́в, / Сио́н го́рний обре́л еси́ жили́ще во вся ве́ки.

Я́ко ми́ром пома́зався, священноявле́нне, сло́вом и дело́м благоче́стия, / священноде́йствуеши Боже́ственная, свяще́ннейше. / Тем Тро́ицу во Еди́ном существе́ пое́ши во вся ве́ки.

Богоро́дичен: В ложесна́ всели́вшагося Де́вы, / и Сея́ ра́ди ужа́сно и па́че сло́ва, ве́тхаго Ада́ма обнови́вша, / Го́спода по́йте, и превозноси́те во вся ве́ки.

Песнь 9.

Ирмо́с: Ужасе́ся о сем не́бо, / и земли́ удиви́шася концы́, / я́ко Бог яви́ся челове́ком пло́тски, / и чре́во Твое́ бысть простра́ннейшее небе́с. / Тем Тя Богоро́дицу / а́нгелов и челове́к чинонача́лия велича́ют.

Возложи́л еси́ ду́шу твою́ Изба́вителю, / и к Сему́ усе́рдно восте́кл еси́, / добро́тами укра́шен све́тло свяще́нных по́двигов твои́х, / и боре́ний чу́дных всехва́льне ору́жниче, / свети́ло вселе́нныя, церко́вное удобре́ние.

Совокупи́лся еси́ со а́нгелы, а́нгельское на земли́ жи́тельство стяжа́в, / и с ни́ми пое́ши во хвале́нии ра́достно / свяще́нное песнопе́ние, Ма́манте, Тро́ице всехва́льно, / обожа́емь Боже́ственными прича́стии, и сла́вою непрее́мною обогаща́емь.

Я́ко име́я дерзнове́ние к Бо́гу, / Боже́ственное твое́ сие́ торжество́ ра́достно му́чениче соверша́ющия, / и честно́е и свяще́нное твое́ страда́ние ве́рою чи́стою хваля́щыя / помина́й, всеблаже́нне, и бу́ри и бед и напа́стей ны спаси́.

Богоро́дичен: Неискусому́жную Ма́терь су́щих на земли́, Отроча́ ражда́ющу, кто слы́ша когда́, / и Рожде́нное, Безнача́льна Бо́га же и соесте́ственна, Отцу́ Пребезнача́льному же и ро́ждшей преесте́ственно? / о стра́ннаго та́инства! О Боже́ственнаго обще́ния! / И́мже Бо́гу соедини́хомся!

Ин.

Ирмо́с: Проявле́нное на горе́ законополо́жнику во огни́, и купине́, / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Безстра́стием и ве́рою, наде́ждою и любо́вию, / словеса́ нам жи́зни ве́чныя показа́в, му́дре Иоа́нне, / моли́ спасти́ся душа́м на́шим.

Жезло́м Ду́ха Свята́го, лю́ди я́ко упа́сша честны́я Це́ркве, / и отгна́вша Богобо́рныя е́реси, / вси иера́рха восхваля́ем тя.

Я́ко церко́внаго свети́льника и иера́рха, / во псалме́х и пе́ниих че́ствуем тя немо́лчно, / и ра́ку моще́й твои́х блаже́нне о́тче Иоа́нне великоимени́те.

Богоро́дичен: Ра́дуйся, присноживо́тный исто́чниче нетле́ния, / ра́дуйся, Всесве́тлый Со́лнца мысленнаго О́блаче; / ра́дуйся, носи́ло Божества́ всего́: / ра́дуйся, Ковче́же свяще́ния.

Свети́лен окто́иха.

Сла́ва, му́ченика: Подо́бен: Ученико́м: Млеко́м воспита́лся еси́ еле́ней, / в гора́х живы́й му́чениче Ма́манте: / но яви́лся еси́ па́ки на три́знищи страда́в усе́рднейше, / и побе́ды взе́м вене́ц, ко Го́споду отше́л еси́.

Богоро́дичен: И́же жи́зни Боже́ственней, и блаже́нней, / позави́дев ми дре́вле в раи́ враг льсти́вейший и вселука́вый, / и Еде́ма изгна́на сотвори́ мя, / умерщвля́ется Твои́м рождество́м Де́во.

На литурги́и проки́мен, глас 7: Возвесели́тся пра́ведник о Го́споде и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́.

Апо́стол к Ри́мляном, зача́ло 99.

Аллилу́иа, глас 4: Пра́ведник, я́ко фи́никс процвете́т, я́ко кедр, и́же в Лива́не, умно́жится.

Ева́нгелие от Иоа́нна, зача́ло 50.

Прича́стен: Ра́дуйтеся, пра́веднии, о Го́споде, пра́вым подоба́ет похвала́.