Слу́жба Пресвяте́й Богоро́дице

в честь чудотво́рныя Ея́ ико́ны Калу́жския

Всено́щное бде́ние

На Го́споди, воззва́х стихи́ры, глас 1: Подо́бен: Небе́сных чино́в:

Небе́сных ра́дование и земны́х упова́ние, / Чи́стая Богоотрокови́це! / Дарова́ла еси́ земли́ Калу́жстей преди́вную ико́ну Твою́. / Сия́ бо, я́ко исто́чник приснотеку́щий исцеле́ний да́ры источа́ет / ея́же светоза́рную па́мять ны́не пра́зднующе, / велича́ем Тя, Богоро́дице Присноде́во.

Небе́сная Цари́це и Влады́чице! / свяще́нную Твою́ и святу́ю ико́ну / а́нгельские си́лы окружа́ют и боголе́пно че́ствуют, / с ни́миже и мы, земноро́днии, / те́плое утеше́ние в ско́рбех сию́ иму́ще, / воспева́ем Тя, Богоро́дице Присноде́во.

Небе́с превы́шшая, я́ко роди́вшая святы́х Святе́йшее Сло́во, / ку́ю досто́йную похвалу́ принесе́м Ти, недосто́йнии, / а́ще не Сама́ Ты нау́чиши нас неосужде́нно хвали́ти Тя, / пред пречи́стым Твои́м о́бразом со слеза́ми, / и благогове́йно к Тебе́ взыва́ти, / и сла́вити Тя, Богоро́дице Присноде́во.

И́ны стихи́ры, глас 4:

Я́ко вои́стину дре́вняго киво́та честне́йшая / дарова́ла святу́ю ико́ну Твою́, Влады́чице, / я́ко стра́жа неусы́пна Калу́жския земли́, / яви́ла еси́ ю на возду́се иноплеме́нником / и дарова́ла еси́ побе́ду росси́йстим во́ином, / отону́дуже воспева́ем ми́лостивное Твое́ заступле́ние / и мо́лим Ти ся приле́жно: / умири́ мир и спаси́ ду́ши на́ша.

Предстоя́т честне́й ико́не Твое́й христолюби́вии лю́дие / почерпа́юще оби́льныя от нея́ да́ры щедро́т Твои́х: / я́ко смертоно́сныя я́звы врачу́еши / и губи́тельныя боле́зни исцеля́еши / подае́ши слепы́м зре́ние, разсла́бленным кре́пость, / бе́сами одержи́мых свобожда́еши, / утеша́еши скорбя́щих и обремене́нных; / благогове́йно лобыза́ем Ли́ка Твоего́ подо́бие / и мо́лим Ти ся приле́жно: / умири́ мир и спаси́ ду́ши на́ша.

Днесь торжество́ Твое́, Де́во, / ку́пно со А́нгелы соверша́ем, / почита́юще Богоподо́бнаго Твоего́ ли́ка изображе́ние; / веселя́тся ны́не ве́рнии, / наипа́че же лю́дие Богоспаса́емаго гра́да Калу́ги, / воспева́юще мно́жество неизче́тное чуде́с Твои́х; / сего́ ра́ди и мы, на ми́лость Твою́ упова́юще, вопи́ем, / и мо́лим Ти ся приле́жно: / умири́ мир и спаси́ ду́ши на́ша.

Сла́ва, и ны́не, глас 8: Днесь созыва́ет нас Бо́жия Ма́тере свяще́нное торжество́, / в ра́дости и весе́лии к честне́й Ея́ ико́не припа́дающе, / возопии́м, глаго́люще: / о, Влады́чице Богоро́дице! / Хода́таице и покро́в моля́щихся Тебе́, / заступи́ зе́млю на́шу от наше́ствий вра́жиих, / непобеди́мым бо Твои́м предста́тельством / мир да́руеши и оставле́ние грехо́в / с любо́вию чту́щих Тя, Всеблага́я.

Вход. Проки́мен дне и чте́ния три Богоро́дице.

На лити́и стихи́ра, глас 7: Гора́ еси́ велика́ и пресла́вна / па́че горы́ Сина́йския, Богоро́дице. / Та бо, не терпя́ще сни́тия сла́вы Бо́жия, огне́м возгара́шеся, / и гро́ми, и мо́лнии та́мо бы́ша. / Ты же Огнь Божества́, / Бо́га Сло́ва неопа́льно во чре́ве Твое́м вмести́ла еси́, / и млеко́м пита́ла еси́ Пита́теля вселе́нныя. / Те́мже, дерзнове́ние Ма́терне к Нему́ иму́ще, / спаса́й от всех бед / све́тло пра́зднующия Твой честны́й пра́здник, / в не́мже песносло́вим ми́лости Твоя́ и щедро́ты, / и мо́лим Ти ся приле́жно / и Тя ублажа́ем, Еди́ну Благослове́нную в жена́х, / и при́сно в пе́снех велича́ем.

Сла́ва и ны́не, глас той же: Пода́ждь по́мощь, Влады́чице, моля́щимся Тебе́, / ико́ною Твое́ю защити́ и изба́ви, / утоли́ гнев Бо́жий, пра́ведно на нас воздвиза́емый, / мно́го бо мо́жет Ма́тернее Твое́ проше́ние / и всеси́льно хода́тайство Твое́ ко Творцу́. / Его́же умоля́ти не преста́й за род христиа́нский. / Мы же пе́нии хвале́бныя прино́сим Тебе́, / Еди́на Чи́стая, Еди́на Благослове́нная.

На стихо́вне стихи́ры, глас 6:

Велича́ем Тя, Богоро́дице Де́во, / возвели́чившую род челове́ческий, / из Тебе́ бо воплоти́ся Христо́с Бог наш, / И́мже прароди́тели на́ша кля́твы свободи́шася / и от мра́чных удо́лий па́ки в рай введо́шася. / Сый Бог наш, / спаса́яй при́сно Тя велича́ющия.

Стих: Помяну́ и́мя Твое́ во вся́ком ро́де и ро́де.

Велича́ем Тя, Богоро́дице Де́во, / Засту́пницу усе́рдную ро́да христиа́нскаго, / покро́вом ми́лости Твоея́ покрыва́ющую всю вселе́нную. / Се бо ико́на Твоя́ свята́я чудеса́ источа́ет / и я́ко у́тварь драга́я Це́ркви Христо́вой дарова́ся / бла́гостию Творца́, все́льшагося в Тя пло́тию, / Сый Бог наш, / спаса́яй при́сно Тя велича́ющия.

Стих: Слы́ши, Дщи, и виждь, и приклони́ у́хо Твое́.

Велича́ем Тя, Богоро́дице Де́во, / я́ко одушевле́нный киво́т Божества́ / и манноприе́мную ста́мну, позлаще́нную Ду́хом Святы́м / и Ле́ствицу Небе́сную, Иа́ковом предви́денную, / ложесна́ бо Твоя́ престо́л Себе́ сотвори́ / Сый Бог наш, / спаса́яй при́сно Тя велича́ющия.

Сла́ва, и ны́не, глас 2: Ны́не наста́ день честна́го торжества́ / Засту́пницы на́шея, Влады́чицы Богоро́дицы, / Я́же дарова́ нам ико́ну Свою́ святу́ю в покро́в и утеше́ние, / сию́ у́бо обы́мем любо́вию серде́чною и возопие́м: / Цари́це Небе́сная! / сотвори́ ны досто́йны бы́ти / такова́го да́ра ми́лости Твоея́ / и чту́щих Тя всегда́ спаса́й от вся́ких бед, / Богоро́дице Чи́стая Присноде́во.

На благослове́нии хлебо́в тропа́рь, глас 4: Засту́пнице от враг иноплеме́нных необори́мая Калу́жския земли́ / и Изба́вительнице от смертоно́сныя я́звы ми́лостивая! / Изба́ви рабы́ Твоя́ от вся́ких бед и боле́зней, / с ве́рою и любо́вию прибега́ющия к чудотво́рней ико́не Твое́й, / и спаси́ ду́ши на́ша. Три́жды.

На у́трени. На Бог Го́сподь тропа́рь три́жды.

По пе́рвом стихосло́вии седа́лен: Всех святы́х святе́йшая, / блага́я Богоро́дице Де́во, / Ты еси́ по Бо́зе упова́ние на́ше, / и на Тя наде́жду спасе́ния на́шего возложи́хом. / Тебе́ мо́лимся и Тебе́ неуста́нно вопие́м: / пода́ждь гре́шным рабо́м Твои́м вели́кия Твоя́ ми́лости.

Сла́ва, и ны́не: Всех Царя́ и Творца́ заче́нши, Де́во, родила́ еси́. / И ны́не, я́ко Небе́сная Цари́ца / одесну́ю Сего́ предстои́ши. / Те́мже мо́лим Тя: / шу́ия ча́сти изба́ви нас в час Суда́ / и десны́м овца́м сопричти́.

По второ́м стихосло́вии седа́лен: Богоро́дицу пе́сньми велича́ем, ве́рнии, / любо́вию Пренепоро́чную почита́юще, / взира́юще на честны́й о́браз Ея́, / бога́тно источа́ющий чудеса́ / и да́рующий ра́дость всем, / с ве́рою к нему́ притека́ющим.

Сла́ва, и ны́не: К Тебе́ припа́даем, Влады́чице ми́ра, / умилосе́рдися на безпо́мощныя лю́ди, / умоли́ милости́ваго Бо́га / изба́витися душа́м на́шим от вся́каго преще́ния, / да Твои́м заступле́нием прейде́м от сме́рти в живо́т / и у́зрим Со́лнце Пра́вды Христа́.

Велича́ние: Велича́ем Тя, / Богоро́дице Де́во, / и почита́ем чудотво́рную ико́ну Твою́, / е́юже благоволи́ла еси́ спасти́ зе́млю Калу́жскую / от наше́ствий вра́жиих и всегуби́тельных боле́зней.

Псало́м избра́нный: Помяни́, Го́споди, Дави́да и всю кро́тость его́.

По полиеле́и седа́лен: Вели́чия Твоя́ кто испове́сть, Богоро́дице, / явле́нием бо чудотво́рныя ико́ны Твоея́ Калу́жския / возвесели́ла еси́ ду́ши правосла́вных, / мно́гия неду́ги то́ю врачу́ющи / и от вся́ких бед избавля́ющи, / я́же по Бо́зе на Тя упова́ние возложи́вших; / не лиши́ и нас Твоего́ заступле́ния, Влады́чице, / и сохрани́ от вся́каго зла, Всеми́лостивая, / да, Тобо́ю хваля́щеся, / не постыди́мся во ве́ки.

Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6: Прииди́те, ве́рнии, прииди́те, / просла́вим чу́дную ико́ну Бо́жия Ма́тере, / та бо пресла́вно на тве́рди церко́вней возсия́вши / чудесы́ вели́кими духо́вно всех просвеща́ет / и созыва́ет всех воспе́ти песнь Богоро́дице: / ра́дуйся, Обра́дованная, Госпо́дь с Тобо́ю.

Кано́н Пресвяте́й Богоро́дице, глас 1

Песнь 1

Ирмо́с: Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, я́ко просла́вися.

Днесь возсия́ Пренепоро́чныя Де́вы торжество́; / приди́те у́бо, празднолю́бцы, / согла́сными пе́сньми и пе́нии ра́достно Сию́ воспои́м.

Моли́твою Твое́ю, Влады́чице, / воспламени́ хла́дная сердца́ на́ша Боже́ственною любо́вию, / да Тебе́ пе́ние хвале́бное воспои́м досто́йно, Чи́стая.

Стра́стными помышле́нии обурева́еми, Госпоже́, / ина́го приста́нища не и́мамы ко спасе́нию, / то́кмо Тебе́, да́рующую от ико́ны Твоея́ святы́я всем утеше́ние.

Во́ды целе́бныя источа́ет нам ико́на Твоя́ всечестна́я, Богоро́дице, / и боле́зни многоразли́чныя исцеля́ет, / и по́мощь в беда́х ве́рным от Тебе́ подае́т, / да сла́вим чудеса́ Твоя́.

По́прище земно́е прейти́ безбе́дно помози́ нам, Чи́стая, / и от лю́тых неду́гов исцеле́ние нам пода́ждь, / и покажи́ прича́стники нас бы́́ти насле́дия Небе́снаго.

Цари́ца еси́ всех еди́на, / Бо́гу, Богороди́тельнице Чи́стая, святы́й престо́л, / Его́же моли́ о чту́щих ико́ну Твою́ честну́ю, / пода́ти грехо́в оставле́ние.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же, / И́же над вода́ми Не́бо утвержде́й второ́е / и основа́вый на вода́х зе́млю, Всеси́льне.

Прими́ поклоне́ние на́ше, Влады́чице, / пред свято́ю ико́ною Твое́ю днесь приноси́мое: / ви́дим бо Тя на ико́не, зако́ну Бо́жию поуча́ющуся, / и поуча́емся ро́ждшагося от Тебе́ Го́спода разуме́ти и сла́вити.

Жезл Ааро́нов процве́тший именова́ Тя дре́вле Моисе́й, / Цвет бо живоно́сный — Христа́ — прозябла́ еси́, / Ему́же те́пле моли́ся, Богома́ти, / страстьми́ умерщвле́нныя ду́ши на́ша просвети́ти / животворя́щею Боже́ственною благода́тию.

Услы́шала еси́, Ми́лостивая, глас моли́твенник Твои́х, / вопию́щих Тебе́ во обстоя́нии иноплеме́нников, / и яви́ла еси́ ико́ну Твою́ на возду́се, / и мно́жество враго́в, обыше́дших зе́млю на́шу, / дале́че отгнала́ еси́.

Всяк с ве́рою принося́й моли́тву пред пречи́стым о́бразом Твои́м, / Влады́чице, / не неуслы́шан от Тебе́ оты́дет: / дарова́ла бо тя́жко боля́щим здра́вие, / разсла́бленным кре́пость, осле́пшим зре́ние; / те́мже и нас боле́зней душе́вных и теле́сных свободи́.

Моли́тися всегда́ усе́рдно жела́ние пода́ждь нам, Преблага́я, / вся бо мо́жеши я́ко Ма́ти воплоти́вшагося Бо́га, / Его́же ми́лостива нам сотвори́ / всеси́льным предста́тельством Твои́м.

Сла́вим Тя, Богоро́дице Де́во, / и, с любо́вию припа́дающе к многоцеле́бному Твоему́ о́бразу, / се́рдцем и усты́ сей целу́ем, / ви́дяще в нем зало́г благода́тный / Твоего́ к нам ма́терняго благоволе́ния.

Седа́лен: Све́тлое днесь Засту́пницы на́шея наста́ торжество́. / Да взыгра́ется тварь, да ликовству́ют челове́честии собо́ри, / созыва́ет бо нас Свята́я Богоро́дица / зре́ти чудоно́сную ико́ну Свою́, / луча́ми ми́лости ве́рныя просвеща́ющую. / Те́мже, ра́дующеся, вопие́м: / заступи́ зе́млю на́шу / от гла́да, губи́тельных боле́зней и междоусо́бныя бра́ни, / и моли́ Сы́на Твоего́ и Бо́га / спасти́ ду́ши на́ша.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися лето́м, позна́ешися, / внегда́ приити́ вре́мени, пока́жешися. / Сла́ва си́ле Твое́й, Го́споди.

Арха́нгел по́слан бысть с высоты́ Небе́с, Пречи́стая Влады́чице, / благовести́ти та́йну спасе́ния на́шего, / и зачала́ еси́ во утро́бе Твое́й предве́чнаго Бо́га, / пло́тию яви́лася еси́ Вседержи́теля, / воспита́вши я́ко Младе́нца Творца́ вселе́нныя.

Безневе́стная Де́во, Чи́стая Голуби́це, / Бо́га Сло́ва Безнача́льнаго родила́ еси́ на земли́, / Его́же, Богоро́дице, чту́ще, пропове́дуем; / моли́ся Ему́ о всех нас.

В мир пришла́ еси́ за гре́шники Хода́таица, / вся утеша́я и ко исправле́нию подвиза́я; / ны́не и нас спаса́й, Влады́чице, / да си́лу Твою́ вели́кую сла́вим и велича́ем, / непотре́бныя рабы́ Твоя́.

Свята́я святы́х су́щи, Чи́стая, / во храм святы́й измла́да возжела́ла еси́ всели́тися / и со А́нгелы, Де́во, бесе́дующе, / пребыва́ла та́мо неизхо́дно, / с Небесе́ хлеб прие́млюще / и в Зако́не Бо́жии поуча́яся.

Иа́кову яви́лася еси́ о́бразно Ле́ствица, / от земли́ к высоте́ утвержде́нная, / е́юже сни́де Влады́ка Не́ба и земли́, / да То́ю пу́ть пра́вый покая́ния пока́жет нам / и к черто́гам го́рним возведе́т нас, / те́пле моля́щихся Пречи́стей Ма́тере Его́.

Неискусобра́чно родила́ еси́ Го́спода, о Де́во! / И по Рождестве́ яви́лася еси́ па́ки де́вствующи; / те́мже немо́лчными гла́сы Тебе́, Влады́чице, / ве́рою несумне́нною воспева́ем, / я́ко ору́жие непобеди́мое на враги́ и спасе́ния наде́жду.

Песнь 5

Ирмо́с: Твой мир даждь нам, Сы́не Бо́жий, / ино́го бо, ра́зве Тебе́, Бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́.

Мир пода́ждь нам, Богоро́дице, / правосла́вных Похвало́ и Предста́тельнице, / све́том Сы́на Твоего́ просвети́ нас, / во мра́ке неве́дения седя́щих, / и ерети́чествующих шата́ния разори́, / и бу́ди Моли́твенница пред Сы́ном Твои́м и Бо́гом / о нас, почита́ющих чу́дный Твой о́браз.

Из глубины́ зол мно́гих Тебе́ припа́даем, Цари́це, / и мо́лимся приле́жно, / Твою́ благода́тную по́мощь нам пода́ждь, / и упра́ви, Пречи́стая, житие́ на́ше / к ти́хому приста́нищу Твоему́.

Ца́рство и Госпо́дство дарова́ Тебе́ Сын Твой и Бог, / ца́рствуеши бо с Ним ве́чно / и покрыва́еши лю́ди, честно́ю Его́ кро́вию искупле́нныя, / я́же сла́вят многопе́тое и́мя Твое́ / и покланя́ются чудотво́рней ико́не Твое́й.

Свята́я Твоя́ ико́на, Богома́ти, / зало́г вои́стину благода́тный яви́ся, / на ню́же взира́юще, / сия́ние Бо́жией благода́ти в ду́ши на́ша неви́димо прие́млем / и Тя, Благоде́тельницу на́шу, непреста́нно велича́ем.

От вели́ких и разли́чных прегреше́ний же и напа́стей / всегда́ избавля́еши нас, Ма́ти Бо́жия, / те́мже к Тебе́ прибега́ем, / непобеди́мей по́мощи скорбя́щим: / от бед изведи́ нас Твои́м заступле́нием.

Горды́нею одержи́мых вразуми́ла еси́, Богоро́дице, / сего́ а́дского пла́мени и нас изба́ви, Всесвята́я, / и лю́тых страсте́й свободи́, / и Сама́ спаси́ грехми́ погружа́емии при́сно.

Песнь 6

Ирмо́с: Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: / сла́ва Тебе́.

Благодари́м Тя, Влады́чице, / о благодея́ниих и чудесе́х Твои́х, / я́же твори́ши чту́щим Тя, / враго́м воспяща́юще и от тех ко́зней рабы́ Твоя́ избавля́юще; / и ны́не заступа́й ны от вся́каго зла, / сохраня́я в ми́ре ду́ши на́ша.

Держа́вная Всецари́це, / я́коже от ви́димых сопроти́вник, ды́шущих огне́м и уби́йством, / зе́млю на́шу свободи́ла иногда́, / та́ко и от неви́димых губи́телей, и́щущих кого́ поглоти́ти, свобожда́й нас.

Безу́мных глаго́л, хуля́щих Тя, / не возгнуша́лася еси, Ми́лостивая, / но деви́цу, изрыга́ющу я, / наказа́нием к сле́зному покая́нию привела́ еси́ / и той исцеле́ние от боле́зни дарова́ла еси́, / те́мже у́бо и нас гре́шных не лиши́ Твоея́ ми́лости.

О́бразу Твоему́ свято́му припа́дающе, / вопие́м Ти, Де́во: / сове́ты хотя́щих нам зла́я разори́ / и напра́ви живо́т наш / твори́ти во́лю Сы́на Твоего́.

Бу́ди нам, Влады́чице, / во искуше́ниих спаси́тельное прибе́жище, / внегда́ смути́тися нам от прегреше́ний на́ших, / си́лою Твое́ю побори́ борю́щия ны, / Богоуго́дное житие́ нам устроя́ющи.

Ско́рби и печа́ли на́ша возвеща́ем Ти, Госпоже́, и вопие́м: / я́коже провеща́ла еси́ не́цей рабе́ Твое́й, / ка́ко от напа́сти спасти́ся, / та́ко и нам пода́ждь му́драя и блага́я разуме́ти / и ко спасе́нию наста́ви / покланя́ющиися ико́не Твое́й.

Конда́к, глас 6: Не и́мамы пе́сней, ниже́ слове́с, / ка́ко досто́йно восхваля́ти Тя, / Ма́ти Христа́ Бо́га на́шего, / явле́ния ра́ди чудотво́рныя ико́ны Твоея́ земли́ Калу́жстей, / то́кмо мо́жем вопи́ти Тебе́: / не отврати́ ми́лости Твоея́ от нас, / и ниспосли́ ю всем притека́ющим к цельбоно́сней ико́не Твое́й.

Песнь 7

Ирмос: Су́щим в пещи́ о́троком Твои́м, Спа́се, / не прикосну́ся, ниже́ стужи́ огнь. / Тогда́ три́е, я́ко еди́неми усты́ поя́ху / и благословля́ху, глаго́люще: / благослове́н Бог оте́ц на́ших.

Ино́го утеше́ния не стяжа́хом на земли́, / ра́зве Тебе́, Цари́це; / моли́ е́же изба́витися нам вся́каго гне́ва и преще́ния Бо́жия, да благода́рственно сла́вим Тя.

Стра́ждущу глухото́ю повеле́ла еси́, Де́во, / моли́тися пред ико́ною Твое́ю явле́нною / и тому́ исцеле́ние нело́жно подала́ еси́; / уврачу́й и на́ша я́звы, Пречи́стая, / и от гно́я страсте́й свободи́ ны.

Ка́ко воспои́м ди́вная чудеса́, / во гра́де на́шем явле́нная от святы́я ико́ны Твоея́ Калу́жския: / о́трока боля́ща я́звы внеза́пу уврачева́ся; / разсла́бленным, на одре́ лежа́щим, кре́пость дарова́ся, / слепы́м зре́ние откры́ся, / врача́ми оста́вленным здра́вие подаде́ся; / тем, Всеблага́я, не презри́ мольбы́ и нас, / неду́гующих скорбьми́ душе́вными же и теле́сными.

Спасе́ние бу́ди, Госпоже́, от руки́ ненави́дящих нас, / я́коже иногда́ спаса́ла еси́ град Твой от пове́трия смертоно́снаго, / не по грехо́м бо на́шим наказу́еши нас, / но ми́луеши при́сно неизрече́ннаго ра́ди человеколю́бия Твоего́.

Хода́таица благоприя́тная и си́льная к Бо́гу, / тьму́ у́бо страсте́й, Ма́ти Све́та, прожени́ от нас, / обстоя́щих све́тлое подо́бие ли́ка Твоего́.

Стена́ необори́мая ве́рных, / стране́ на́шей пода́ждь умире́ние и благоде́нствие, / храни́ лю́дие ея́ от грехо́вных дея́ний и помышле́ний, / да еди́неми усты́ и еди́нем се́рдцем превозно́сим Тя во ве́ки.

Песнь 8

Ирмо́с: Его́же ужаса́ются а́нгели и вся во́инства, / я́ко Творца́ и Го́спода, / по́йте, свяще́нницы, просла́вите, о́троцы, / благослови́те, лю́дие, / и превозноси́те во вся ве́ки.

Яви́ся заступле́ние Твое́, Влады́чице, / во дни междоусо́бныя бра́ни, / егда́ со́нмище сопроти́вных устреми́ся на зе́млю на́шу: / тогда́ ико́на Твоя́ иноплеме́нником на возду́се яви́ся, / и вра́жия полки́ устраши́.

Преклони́ся к мольба́м рабо́в Твои́х, Пречи́стая, / и не закосни́ изба́вити нас от напа́стей, и бед, и омраче́ния душе́внаго, и уны́ния; / вся стра́сти отжени́ от нас, Чи́стая, / да немо́лчно воспева́ем ми́лости Твоя́.

Скорбя́ми испыту́ются ду́ши на́ша, / да не горды́не жите́йстей, ни жестокосе́рдию поработи́мся, / но да смиренному́дрию поучи́мся / и утеше́ния от Ма́тере Бо́жия, я́ко ра́дости всех скорбя́щих, да испо́лнимся.

Я́ко неду́жным и разсла́бленным ско́ро яви́ла еси́ ми́лость Твою́, Пресвята́я Де́во, / та́кожде и от нас не отступа́й, Цели́тельнице, / к покая́нию те́плому душ на́ших ше́ствие устреми́, / слепо́тствующий ум наш ра́зумом и́стиннаго Богове́дения озари́, / да не поги́бнем лю́те во гресе́х на́ших.

Язы́к челове́ческий не возмо́жет изрещи́ ди́вная чудеса́ и неизчисли́мая благодея́ния, явля́емая от ико́ны Твоея́, Богоро́дице, мы же во смире́нии се́рдца со умиле́нием вопие́м Ти: пода́ждь рабо́м Твои́м ве́ру и́стинную и любо́вь нелицеме́рную, да сподо́бимся по́двигом до́брым подвиза́тися, житие́ ми́рно сконча́ти, хваля́ Го́спода.

Песнь 9

Ирмо́с: Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, велича́ем.

Бога́тство духо́вное неиждива́емое / дарова́ла еси́ рабо́м Твои́м, Пренепоро́чная, / ико́ну Твою́ свяще́нную, / ея́же прославле́ние све́тло пра́зднующее, ве́рнии, / избавля́емся от вся́ких бед и ско́рбных обстоя́ний.

Виждь, Чи́стая, от но́щи у́треннюющу па́ству, / ико́ну Твою́ Богохва́льную обстоя́щу, / разреше́ния же грехо́в прося́щу и жития́ исправле́ния: / уми́лостиви о той в Тро́ице Еди́наго Бо́га.

В пещи́ искуше́ний и бед опаля́емыя ороси́, Де́во, струя́ми Твои́х щедро́т, да посра́мятся беззако́ннующии врази́ спасе́ния на́шего и да разуме́ют Тя, Всеблагу́ю Цари́цу, / сла́вимую по всей вселе́нней.

Богоро́дице Пречи́стая, а́ще и многогре́шни суть лю́дие, ко святе́й ико́не Твое́й притека́ющии, но я́коже Сын Твой спасе́ния ра́ди гре́шник от Небе́с к нам прише́л есть, та́ко и Ты с Небесе́ на моле́ния на́ша при́зри, и проше́ний люде́й Твои́х не отри́ни, Всепе́тая.

Умноже́нием чуде́с от преди́вныя ико́ны Твоея́ быва́емых, Влады́чице, да утвержда́ется ве́ра правосла́вная, да прославля́ется в лю́дех Твое́ ми́лостивое предста́тельство.

Никто́же возмо́жет досто́йно Ма́терь Го́спода на́шего просла́вити, / но мы слеза́ми те́плыми ску́дость слове́с воспо́лним, / красоте́ доброде́телей Влады́чицы на́шей дивя́щеся, / и та́ко Сию́ возвели́чим.

Свети́лен: Све́том благода́тным от ико́ны Твоея́ озаря́еми, / воздыха́нии серде́чными и благодаре́нии непреста́нными возопие́м Влады́чице Богоро́дице: / ра́дуйся, безме́здная Цели́тельнице; / ра́дуйся, Ма́ти всех скорбя́щих, / ра́дуйся, А́нгелов Сла́во и челове́ков Похвало́; / ра́дуйся, боже́ственное Утеше́ние ро́ду христиа́нскому; / ра́дуйся, ско́рая Помо́щнице моля́щимся Тебе́. Три́жды.

На хвали́тех стихи́ры, глас 8:

Непреста́нно Це́рковь Христо́ва славосло́вит / преди́вныя чудеса́ милосе́рдия Твоего́, Богома́ти, / на род челове́ческий при́сно излива́емыя. / И́стину бо рекла́ еси́, Влады́чице, / я́ко от восто́к со́лнца до за́пад ублажа́т Тя вси ро́ди, / Честне́йшую херуви́м и Сла́внейшую без сравне́ния серафи́м.

Исто́чник благода́тныя отра́ды яви́ся свята́я ико́на Твоя́, / Преди́вная Мари́е, / всяк бо, и́же с ве́рою по́мощи взыску́ет, / теплоту́ Ма́терния Твоея́ любви́ прие́млет / и со умиле́нием благода́рным се́рдцем воспева́ет Тя, / Честне́йшую херуви́м и Сла́внейшую без сравне́ния серафи́м.

Слеза́ми покая́ния врачу́еши ду́ши на́ша, / егда́ те́рпим лю́тыя бе́ды и обстоя́ния, / чу́дную ико́ну Твою́ посыла́еши в защи́ту нам / и е́ю укроща́еши свире́пство боле́зней, / я́ко Ма́ти Всеси́льнаго Влады́ки Христа́, / Честне́йшая херуви́м и Сла́внейшая без сравне́ния серафи́м.

Пред ико́ною Твое́ю, во гра́де Калу́ге явле́нною, / дарова́нную на ра́дость лю́дем правосла́вным, / избра́нницы Бо́жии воздыха́ния своя́ возноси́ша: / преподо́бнии и пра́веднии, святи́тели и му́ченицы, / и́хже моли́твами сподо́би и нас восхваля́ти Тя, / Честне́йшую херуви́м и Сла́внейшую без сравне́ния серафи́м.

Сла́ва, и ны́не, глас той же: Богоневе́стная, Пречи́стая Де́во! / Сте́ну тве́рду и от бед огражде́ние, / неду́гов исцеле́ние и спаси́тельное прибе́жище / дарова́ла еси́ нам в святе́й ико́не Твое́й Калу́жстей, / то́юже и нам по́мощи у Сы́на Твоего́ испроси́, / да не поги́бнем без покая́ния, / но, Тобо́ю спаса́емии, / немо́лчно взыва́ем Ти и непреста́нно благодари́м / Честне́йшую херуви́м и Сла́внейшую без сравне́ния серафи́м.

Славосло́вие вели́кое, тропа́рь и отпу́ст.

На литурги́и: Блаже́нны от кано́на, пе́сни 3 и 6. Проки́мен: песнь Богоро́дицы, глас 3: Вели́чит душа́ Моя́ Го́спода и возра́довася дух Мой о Бо́ге Спа́се Мое́м.

Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди.

Апо́стол ко Евре́ем, зача́ло 320. Аллилу́ия, глас 8: Слы́ши, Дщи, и ви́ждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́ и и́мя Госпо́дне призову́.