И́на слу́жба преподо́бному Иоа́нну По́стнику, патриа́рху Царегра́дскому .

На Го́споди, воззва́х: стихи́ры, глас 5: Подо́бен: Ра́дуйся:

Ра́дуйся, Иоа́нне По́стниче, / благоче́стия подви́жниче! / Ра́дуйся преподо́бных соприча́стниче, / и иера́рхов украше́ние; / вели́ких святи́телей наме́стниче, / и по́стником при́сный дру́же; / ра́дуйся подви́жником ми́ра пра́вило, / и мона́хом утеше́ние, / всем воздержа́ния учи́телю, / лени́вых же рабо́в обличи́телю; / ра́дуйся Правосла́вныя Це́ркве сто́лпе, / нача́льников моли́твенниче неусы́пный, / ца́рствующаго гра́да предстоя́телю, / и чту́щим тя благода́тный храни́телю.

Ра́дуйся, Иоа́нне ми́лостиве, / я́ко ты поми́лован еси́! / Ра́дуйся благода́ти тезоимени́те, / по и́мени твоему́ та́ко и жил еси́, / си́рых от щедро́т твои́х пита́я, / и ми́лостыни та́йныя подава́я. / Ра́дуйся, Ева́нгельскую за́поведь испо́лнивый, / я́ко раб всем послужи́вый, / Христу́, умы́вшему но́ги уподо́бивыйся, / милосе́рдием соверше́нству Отца́ подража́яй. / Ра́дуйся, за любо́вь Бо́гом возлю́бленный, / и оби́тель Тро́ице в се́рдце сотвори́вый, / благода́тию Свята́го Уте́шителя украше́нный, / и уготова́нное ти Ца́рство насле́довавый, благослове́нне.

Ра́дуйся, Иоа́нне Прему́дре, / вселе́нский Святи́телю! / Ра́дуйся све́том до́брых дел твои́х / Отца́ Небе́снаго просла́вивый, / и от мирска́го златоде́лания / на све́щнике первосвяти́тельства превознесе́нный. / Ра́дуйся, Це́ркве тве́рдый управи́телю, / немощны́х душ уте́шный окорми́телю, / благи́х пра́вил му́дрый написа́телю, / гре́шником кро́ткий наказа́телю. / Ра́дуйся, восто́чныя Це́ркве возглави́телю. / Первопресто́льнаго гра́да первопа́стырю, / царе́м вселе́нныя о́тче и учи́телю. / Ра́дуйся вселе́нский Святи́телю.

Сла́ва, глас 8: Мона́хов мно́жества, святи́телей собра́ние, владу́щих сосло́вие, мирски́х исполне́ние, празднолю́бцев собо́р, вси ны́не ра́достно восхва́лим преподо́бнаго По́стника, вселе́нскаго Святи́теля, и́ноков при́снаго дру́га, царе́й побо́рника, ни́щих пита́теля, гре́шных уте́шителя, благочести́вым пра́вило, Це́ркве учи́теля, святы́м сожи́теля. А́нгелам собесе́дника, Тро́ице предстоя́теля; от Нея́же благода́ть дарова́ти всем мо́лит. Церква́м мир и устрое́ние, и душа́м на́шим ве́лию ми́лость.

Сла́ва на стихо́вне, глас 2: Отце́в сла́ву, воздержа́ния учи́теля, покая́ния пропове́дника, Це́ркве ко́рмчаго, мона́хом наста́вника, мирска́го благоче́стия пра́вило, Иоа́нна богому́драго досто́йно просла́вим, моля́щеся благода́ть спасе́ния нам дарова́ти.

Зри тропа́рь: Пра́вило ве́ры:

Ин тропа́рь, глас 4: Те́сным путе́м та́йных по́двигов / от ю́ности в ми́ре ше́ствовал еси́: / посто́м те́ло свое́ умерщвля́я, / ми́лостынями ни́щия ущедря́л еси́. / Сего́ ра́ди от смире́ния на высоту́ возведе́н был еси́ / мы же ублажа́ем Тя си́це: / Ра́дуйся Иоа́нне По́стниче, вселе́нский Святи́телю.

Кано́н, глас 8

Песнь 1

Ирмо́с: Во́ду проше́д, я́ко су́шу, и еги́петскаго зла избежа́в, израильтя́нин вопия́ше: Изба́вителю и Бо́гу на́шему пои́м.

Во́ду жи́ву благода́ти Ду́ха, пе́ти тя начина́ющу, испроси́ моли́твами твои́ми Святи́телю, да просла́влю тя во спасе́ние мое́.

И́мя нося́ благода́ти тезоиме́нное, преподо́бне Иоа́нне, па́че всего́ сию́ возжела́л еси́, и ра́ди тоя́ весь мир, я́ко ничто́же, вмени́л еси́.

Немощны́ми отовсю́ду обложе́н и оживотворя́щую благода́ть Ду́ха попира́я, не вем, ка́ко спасу́ся: ве́ру же вме́сто дел мне вмени́в, Спа́се, по ми́лости Твое́й спаси́ мя.

Богоро́дичен: О́браз Твой, Влады́чице, просла́вити хотя́, во сне стра́ждущей де́ве яви́ся и исцеле́ние да́ти обеща́я; те́мже и моя́ не́мощи посети́ и исцеле́ние те́лу да́руй, и ду́шу поми́луй, Блага́я.

Песнь 3

Ирмо́с: Небе́снаго кру́га Верхотво́рче Го́споди и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных Утвержде́ние, Еди́не Человеколю́бче.

Небе́сныя жи́зни наслажда́тися от ю́ности восхоте́в, по́стничеству от млады́х ногте́й вда́лся еси́, ревни́телю Христо́в, благоче́стия подви́жниче, избра́нниче Бо́жий Иоа́нне.

Я́ко ры́барей апо́столы сотвори́ Иису́с ловцы́ челове́ков, и тебе́ от дея́ния зла́та ги́бнущаго, взыска́ти би́сера Еди́наго, Христа́, сокро́вище неистощи́мое Дух привле́кл есть.

Мно́гажды жи́ти по Бо́зе обещава́яся, па́ки к ми́ру страсте́й прилепля́юся: гла́ден же сый, в покая́нии зову́ Тебе́, Отцу́ Всеблаго́му: моли́твами уго́дника Твоего́, Спа́се, спаси́ мя.

Богоро́дичен: В пра́хе мно́гая ле́та в небреже́нии пребы́вая, боля́щей рабе́ Твое́й откры́лася еси́ и здра́вие подала́ еси́, милосе́рдия Ма́ти; и на́ших скверн не возгнуша́йся. Пречи́стая, но омы́й их благода́тию Ма́терски.

Седа́лен, глас 8: Благода́ть креще́ния опа́сно сохраня́я, и в ми́ре сый житие́ свя́то проводи́л еси́, в посте́х и моли́твах, и ми́лостынех Бо́гу угожда́я, злых угреба́яся и непреста́нно в се́рдце взыва́я: Иису́се, Сы́не Бо́жий, Спа́се ми́ра, спаси́ нас.

Сла́ва: и ны́не. Богоро́дичен: Я́ко смире́нная Де́ва, чту́щая Сло́во Бо́жие, изображе́на еси́ на ико́не, в пречи́стых рука́х Твои́х кни́гу держа́ща; сподо́би и нас во смире́нии у ног Иису́са, Сы́на Твоего́, я́ко Мари́я, седе́ти, благу́ю часть любви́ к Нему́ избра́вших.

Песнь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

В ми́ре живы́й, о свято́м и́ночестем житии́ слы́шав, мона́хов возлюби́л еси́, с те́ми вку́пе сла́вя в моли́твах Преми́рнаго Бо́га.

За́поведь но́вую храня́, ни́щих зело́ возлюби́л еси́, и сия́ всегда́ от сокро́вищ свои́х пита́я, от Христа́, в них живу́щаго, любо́вь стяжа́л еси́.

Зако́н за́поведей и́щущим живота́ ве́чнаго соблюда́ти повеле́вый, от беззако́ний на́ших очи́сти нас и мирски́я и мона́хи моли́твами святы́х Твои́х благода́тию ту́не, Спа́се, спаса́я.

Богоро́дичен: При́сно во хра́ме Зако́ну Бо́жию поуча́яся, угото́вала еси́ Себе́ в Храм Свят Законода́вцу Сло́ву, нас ра́ди безслове́сных воплоти́вшемуся и све́том ра́зума мир просвети́вшему.

Песнь 5

Ирмо́с: Просвети́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколю́бче.

Чистоту́ души́ и те́ла Твоего́ и целому́дрия сохрани́л еси́, в ми́ре живы́й, безпло́тным подо́бяся, и Спа́су вопия́ непреста́нно: от та́йных мои́х очи́сти Бо́же, и спаси́ мя.

В ми́ре и́нок сый ду́хом, с и́ночествующими обще́ние храни́л еси́; еди́наго же иду́щу сему́ с тобо́ю, глас с небесе́ глаго́лаше, ди́вно о тебе́ прорица́я: почто́ одесну́ю вели́каго гряде́ши?

Ди́вному во святы́х Твои́х, Го́споди, дивлю́ся, сам же подража́ти им ника́коже возмого́х; и воззре́ти на преподо́бный о́браз Твой в них срамля́яся, то́кмо вопию́ Ти: Бо́же, поми́луй мя гре́шнаго.

Богоро́дичен: Чистоты́ сокро́вище и высоту́ смире́ния возлюби́ в Тебе́ Зижди́тель, Пресвята́я Де́во; да плоть от Тебе́ прие́м, пло́тских страсте́й изба́вит нас Твои́м Ма́терним к Нему́ предста́тельством, Присноде́во.

Песнь 6

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зол душа́ моя́ испо́лнися и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Моли́твы непреста́нныя творя́ и преподо́бныя ру́ки чи́сте воздева́я, не утаи́лся еси́ я́ко град, наверху́ горы́ стоя́щ; и не хотя́щу ти, просвети́ся житие́ твое́; лю́дие же ви́девше до́брая дела́ твоя́, сла́вяху Отца́ Небе́снаго.

Сконча́вшуся первосвяти́телю ца́рствующаго гра́да, всем любе́зно бысть и́мя твое́, Иоа́нне; сего́ ра́ди на престо́л святи́тельский возведе́н был еси́, да ду́ши ве́рных, па́че зла́та и сребра́ честне́йшия, Царю́ всех устроя́еши.

Вся́ческая Про́мыслом Твои́м управля́я, я́ко вся ве́дый, пути́ моя́ по во́ле Твое́й напра́ви, во смире́нии сохраня́я мя; моли́твы же Преподо́бнаго Твоего́ о мне прие́мля, Сам Христе́ Человеколю́бче, и́миже ве́си судьба́ми, спаси́ мя.

Богоро́дичен: На смире́ние Твое́ призре́в Творе́ц, па́че небе́сных чино́в просла́ви Тя, вся ро́ды научи́в ублажа́ти Тя, су́щую Богоро́дицу; мы же с Арха́нгелом вопие́м Ти уми́льно: Ра́дуйся, Благода́тная, Госпо́дь с Тобо́ю.

Конда́к, глас 2: Посто́м и моли́твами очи́стив се́рдце Твое́, благода́ть любве́ от Бо́га прия́л еси́, ни́щия удовля́я, немощны́я заступа́я; сего́ ра́ди Христо́с пасти́ о́вцы Своя́ поста́ви и в черто́г Небе́сный всели́ Тя, иде́же со ины́ми святи́тели сла́виши Тро́ицу Пресвяту́ю.

Песнь 7

Ирмо́с: От Иуде́и доше́дше, о́троцы, в Вавило́не иногда́ ве́рою Трои́ческою пла́мень пе́щный попра́ша, пою́ще: отце́в Бо́же, благослове́н еси́.

От попече́ний жите́йских свободи́вся, па́че по́стничества и милосе́рдия вда́лся еси́, высоту́ в смире́нии зря, нищету́ та́йную, я́ко бога́тство, почита́я; и первосвяти́тель сый, па́стве слугу́ себе́ вменя́ше.

Сам во всем подвиза́яся, не́мощи не́мощных в се́рдце свое́м носи́л еси́; и тех греха́ми, я́ко свои́ми, страда́я, пра́вила неудобоноси́мая ума́лил еси́, милосе́рдию Отца́ Небе́снаго подража́я.

Оте́ческаго до́ма, я́ко блу́дный сын, бе́гая, в бесо́вское уны́ние никогда́ же впадо́х; па́че же Изба́вителю моему́ прилепля́яся, и тебе́, свя́тче, в хода́тая призыва́я, ве́рою зову́: Ты еси́ спасе́ние мое, Го́споди.

Богоро́дичен: Еще́ на земли́ прославля́емая, в молча́нии слага́ла еси́ вся в се́рдце Твое́м, благода́ть Свята́го Ду́ха внутрь Себе́ храня́ и нас науча́я молвы́ жите́йския отбега́ти любве́ ра́ди Бо́жия.

Песнь 8

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

Сла́вы Ца́рствия Бо́жия взыску́я, че́сти и земны́я сподо́бился еси́, от Собо́ра бо оте́ц Вселе́нским ца́рскаго гра́да ра́ди именова́ся.

По́стническое житие́ сконча́в, ничто́же на земли́ оста́ви, то́чию па́мять пра́веднаго По́стника с похвала́ми.

Оде́жды доброде́телей не стяжа́х, бра́чный хито́н благода́ти ту́не дарова́ти ми, Ми́лостиве, молю́ся.

Богоро́дичен: В Ца́рство Тро́ицы превознесе́нная и одесну́ю Сы́на седя́щая, не забу́ди сродства́ Твои́х на земли́ су́щих.

Песнь 9

Ирмо́с: Вои́стину Богоро́дицу Тя испове́дуем, спасе́нии Тобо́ю, Де́во Чи́стая, с безпло́тными ли́ки Тя велича́юще.

Вели́к нарече́нный на земли́, ве́лий еси́ ны́не в Ца́рствии Небе́сном, я́ко сотвори́в и научи́в; моли́тву о воспева́ющих тя я́ко же́ртву принеси́ Искупи́телю.

Ве́дый не́мощь естества́ челове́ческаго, я́ко оте́ц чадолюби́вый, благода́ть тезоиме́нникам испроси́, от напа́стей лука́ваго изба́ви и с собо́ю жи́ти в ве́ки введи́.

А́ще хощу́, а́ще ли же не хощу́, Христе́ Спа́се мой, спаси́ мя, не посра́мив наде́жды на Тя; да благода́рно с преподо́бным зову́ ны́не и во ве́ки: Аллилу́иа.

Богоро́дичен: Во гра́дех и ве́сех Калу́жских ико́ною Свое́ю пребыва́я, посети́ и нас, в да́льнем разсе́янии су́щих, и моли́твами Ма́терними пути́ на́ша упра́ви.

Свети́лен: Подо́бен: Жены́ услы́шите: Концы́ ми́ра днесь благослове́ние прие́млют, вселе́нскаго Святи́теля па́мять соверша́юще; мы же тя велича́юще, Спа́са прославля́юще, заступле́ния Твоего́ про́сим во е́же спасти́ся нам, По́стниче Спа́сов.

Сла́ва, и ны́не: Богоро́дичен: Де́ва Пречи́стая, Ма́ти Пренепоро́чная, де́вственных похвало́, гре́шников наде́жда, скорбя́щих ра́досте, уныва́ющих отра́да, спаси́ мя к Тебе́ прибега́ющаго и сла́достное и́мя Твое́ призыва́юща: о Ма́ти на́ша, спаси́ всех нас.