Слу́жба блаже́нному отцу́ на́шему Иоа́нну Ми́лостивому Власатому, Росто́вскому чудотво́рцу

На вели́цей вече́рни, Блаже́н муж, 1 антифо́н: На Го́споди, воззва́х, стихи́ры, глас 8. Подо́бен: О пресла́внаго чудесе́:

Блаже́нне Иоа́нне Богому́дре, / чистая твоя́ душа́ правове́рным смы́слом сия́ющи / и блиста́ющи доброде́телей све́тлостьми, / озаря́ет ве́рных исполне́ние, бесо́вскую тму отгоня́ющи, / те́мже я́ко прича́стника тя невече́рней благода́ти / ублажа́ем благоче́стно вси досточу́дне.

Име́я ду́шу ми́лостиву, / и чист по́мысл и се́рдце бо́дро, / ве́ру небла́зненну, и любо́вь вои́стинну нелицеме́рну, / от земли́ преста́вился еси́ к Небе́сным / и с ли́ки пра́ведных водворя́ешися. / Те́мже тя почита́ем свяще́нными пе́сньми / и благоче́стно вси сла́вим, досточу́дне Иоа́нне.

Боже́ственными уче́нии укрепля́лся / стра́сти плотски́я от души́ отгна́л еси́ / и Святе́й Тро́ице селе́ние предочище́нное был еси́. / Тем к Боже́ственней жи́зни преста́вился еси́, / Бо́гу соблюда́ющу и ны́не невреди́мо твое́ блаже́нное те́ло Боже́ственным судо́м, / и́мже Сам весть, прославля́ли тя я́ве, Иоа́нне.

Сла́ва, глас 1: Ка́ко не диви́мся житию́ твоему́, / или́ ка́ко не похва́лим, преподо́бне Иоа́нне, житие́ равноа́нгельное / по́мысла целому́дренное и кро́тости твоея́ смире́нное и молчали́вое, / ми́лостыни не оску́дное, / все́ми доброде́тельми украси́лся еси́, блаже́нне. / Те́мже тебе́ ожида́ет неизглаго́ланная ра́дость / и Небе́сное Ца́рствие.

И ны́не, Богоро́дичен: Всеми́рную сла́ву: Вход. Проки́мен дне и чте́ния 3.

Прему́дрости Соломо́новы чте́ние (3, 1—9).

Прему́дрости Соломо́новы чте́ние (5, 15—24; 6, 1—3).

Прему́дрости Соломо́новы чте́ние (4, 7—15).

На лити́и стихи́ры, глас 1:

Наста́, Богоно́се, / со́лнца светле́йший твой пра́здник, /озаря́ет приходя́щий к тебе́ ве́рою / и безсме́ртием облагоуха́ет, / и душа́м источа́ет исцеле́ния, Иоа́нне преподо́бне, / моли́твенниче о душа́х на́ших.

Чу́вственныя стра́сти теле́сныя / победи́в воздержа́ния бразда́ми, чудоде́йственниче Иоа́нне, / и ре́вности безпло́тных на земли́ показа́в, / вся плотска́я жела́ния ду́ху повину́л еси́, / тем ны́не в Небе́сных селе́ниих водворя́яся, / моли́ о душа́х на́ших.

Процве́л еси́, яко фи́никс, Дави́дски о́тче, / оби́тель яви́лся еси́ Ду́ха Пресвята́го, / и сла́вен вселе́нней показа́вся. / О нас непреста́нно моли́, / почита́ющих ве́рою пречестну́ю па́мять твою́, преподо́бне.

Сла́ва, глас 2: Преподо́бне о́тче, / измла́да доброде́тели приле́жно обучи́вся, орга́н был еси́ Свята́го Ду́ха, / и от Него́ прии́м чуде́с де́йство, / увеща́л еси́ челове́ки преоби́дети сла́дкая. / Н́ы́не же Боже́ственным све́том чисте́йше осиява́ем, / просвети́ и на́ша мы́сли, Иоа́нне, о́тче наш.

И ны́не, Богоро́дичен: Все упова́ние мое́ на Тя возлага́ю, / Ма́ти Бо́жия, / сохрани́ мя под кро́вом Твои́м.

На стихо́вне стихи́ры, глас 2: Подо́бен: До́ме Евфра́фов:

Дом и жили́ще Ду́ха Пресвята́го, / прему́дре Иоа́нне, был еси́. / Те́мже и нас до́мы Того́ соде́лай, / святу́ю твою́ па́мять почита́ющих.

Стих: Возвесели́тся пра́ведник о Го́споде / и упова́ет на Него́.

Житие́ твое́, я́ко со́лнце в сердца́ ве́рных возсия́, / чудеса́ испуща́я, / те́мже и нас све́том невече́рним озари́, / всечестну́ю твою́ па́мять почита́ющих.

Стих: Пра́ведник, я́ко фи́никс процвете́т / и я́ко кедр, и́же в Лива́не умно́жится.

Не преста́й моля́ся, Иоа́нне, / о любо́вию чту́щих тя и твоего́ предста́тельства прося́щих, / да вси честно́е твое́ пра́зднество веселя́щеся почита́ем.

Сла́ва, глас 4: Земны́й а́нгел и Небе́сный челове́к яви́лся еси́, преблаже́нне, / исто́чник умиле́ния, ми́лости пото́к, / пучи́на чуде́с, струя́ исцеле́ний, Иоа́нне досточу́дне, / ма́слина Бо́жия вои́стинну плодови́та, / еле́ем трудо́в твои́х умаща́я ве́рою тя хваля́щих, / и моля́ Человеколю́бца от бед изба́вити любо́вию чту́щих всечестну́ю па́мять твою́.

И ны́не, Богоро́дичен: О чудесе́ но́ваго всех дре́вних чуде́с! / Кто бо позна́ Ма́терь без му́жа ро́ждшу / и на руку́ нося́щу всю тварь Содержа́щаго: / Бо́жие есть изволе́ние Ро́ждшееся. / Его́же я́ко младе́нца, Пречи́стая, Твои́ми рука́ма носи́вши / и Ма́терне дерзнове́ние к Нему́ иму́щи, / не преста́й моля́щи о чту́щих Тя, / уще́дрити и спасти́ ду́ши на́ша.

Ны́не отпуща́еши: Трисвято́е, О́тче наш:

Тропа́рь, глас 8: Яви́лся еси́ во гра́де я́ко в пусты́ни, / в смиренному́дрии, чистоте́ и в труде́х, и по́двизех, и в терпе́нии мно́зе, преблаже́нне о́тче Иоа́нне. / Взем бо Крест Христо́в после́дова Ему́ / и бе в моли́твах и псалмопе́нии день и нощь, / иноязы́чнаго рече́ния о спасе́нии всего́ ми́ра христиа́нскаго ро́да / и пресели́лся еси́ к Невече́рнему Све́ту. / Ны́не же ко гро́бу Твоему́ ве́рнии приходя́щии, / моля́ся Го́сподеви, Богоро́дице и Предте́чи, прие́млют исцеле́ния моли́твами твои́ми. / Но при́сно за ны моли́ся, блаже́нне о́тче Иоа́нне, спасти́ся душа́м на́шим.

Ин тропа́рь, глас 4: Яви́лся еси́ во гра́де, я́ко в пусты́ни, / смиреному́дрием и чистото́ю, / и взем крест Христо́в после́дова Ему́ / в труде́х и по́двизех, и в терпе́нии мно́зе, преблаже́нне о́тче Иоа́нне. / И ны́не моли́ о нас соверша́ющих па́мять твою́, / и усе́рдно притека́ющих к ра́це моще́й твои́х, / изба́витися от бед, и душа́м на́шим пода́ти ве́лию ми́лость.

Сла́ва, и ны́не, Богоро́дичен: И́же нас ра́ди рожде́йся от Де́вы / и распя́тие претерпе́в Благи́й, / испрове́ргий сме́ртию смерть / и воскресе́ние явле́й я́ко Бог, / не пре́зри я́же созда́л еси́ руко́ю Твое́ю. / Яви́ человеколю́бие Твое́, Ми́лостиве, / приими́ Ро́ждшую Тя Богоро́дицу, моля́щуюся за ны / и спаси́, Спа́се наш, люди отча́янныя.

На у́трени на Бог Госпо́дь, тропа́рь свята́го два́жды.

Сла́ва, и ны́не, Богоро́дичен:

По 1 стихосло́вии седа́лен, глас 5: Тве́рдаго адама́нта и столпа́ непоколеби́ма вра́жиими прило́ги, / Богоно́снаго Иоа́нна пе́сньми почти́м. / Терпе́нием бо вои́стинну посра́мив прило́ги сопроти́внаго врага́ и без ве́сти его́ сотвори́вша, / и ны́не моля́щеся о спасе́нии душ на́ших.

Сла́ва, и ны́не, Богоро́дичен: Ужа́сно чу́до зача́тия / и несказа́нен о́браз Рождества́ /в Тебе́ позна́ся, Чи́стая Присноде́во. / Ужаса́ет мой ум и удивля́ет по́мысл. / Сла́ва Твоя́, Богоро́дице, всем простре́ся / во спасе́ние душ на́ших.

По 2 стихосло́вии седа́лен, глас 5: По́стника Госпо́дня пе́сньми почти́м / я́ко умертви́вша вся прило́ги страсте́й / воздержа́нием и тве́рдым терпе́нием вои́стинну / и посра́мивша зело́ противобо́рца врага́ / и всю его́ горды́ню. / И ны́не моля́ще Го́сподеви, поми́ловатися душа́м на́шим. Два́жды.

Сла́ва, и ны́не, Богоро́дичен: Предста́тельнице Необори́мая оскорбля́емых / и Те́плое Заступле́ние упова́ющих на Тя, / от бед мя изба́ви: / Ты бо еси́ всех Помо́щнице.

По Хвали́те И́мя Госпо́дне: Велича́ем тя, / святы́й блаже́нне Иоа́нне Ми́лостиве, / и чтим святу́ю па́мять твою́, / ты бо мо́лиши за нас / Христа́ Бо́га на́шего.

Псало́м избра́нный: Терпя́ потерпе́х:

По полиеле́и седа́лен, глас 1: Погре́бл еси́ страсте́й все воста́ние / умерщвле́нием пло́ти, свяще́нный о́тче, / жизнь безконе́чную по сме́рти прия́л еси́. / Те́мже днесь Христо́ва Це́рковь пра́зднует твою́ досточу́дную па́мять, / преподо́бных украше́ние. Два́жды.

Сла́ва, и ны́не, Богоро́дичен: Тебе́ велича́ем, Богоро́дице, вопию́ще: / Ты Еди́на Благослове́нная, / из Тебе́ бо неизрече́нно роди́ся Христо́с Бог наш.

Степе́нна, 1-й антифо́н, глас 4.

Проки́мен: Возвесели́тся пра́ведник о Го́споде и упова́ет на Него́.

Стих: Услы́ши, Бо́же, глас мой, внегда́ молитимися к Тебе́.

Ева́нгелие от Матфе́а, зачало 48.

По 50-м псалме́ стихи́ра, глас 8: Челове́че Бо́жий, Иоа́нне чу́дный, / ты у́бо, восше́д на ле́ствицу доброде́телей, / по ней же возше́л еси́ к го́рнему Иерусали́му. / И та́мо узре́л еси́ жела́емаго Христа́. / Его́же ра́ди плоть твою́ изнури́л еси́ / и те́ло ме́ртвенное на безсме́ртную жизнь измени́л еси́. / И о нас непреста́нно моли́ся дарова́ти душа́м на́шим мир и ве́лию ми́лость.

Кано́н, Богоро́дицы на 6 и свята́го на 8, глас 4.

Песнь 1.

Ирмо́с: Мо́ря че́рмную пучи́ну:

Припе́в: Святы́й блаже́нне Иоа́нне Ми́лостиве, моли́ Бо́га о нас.

Творе́ц всея́ тва́ри, / Преблаги́й Го́споди Иису́се Христе́ Бо́же наш, / яви́л еси́ нам, рабо́м Свои́м, / сего́ блаже́ннаго Иоа́нна, по́мнящим и слы́шащим его́. / И́же ны́не ра́ди Твоего́ свята́го И́мени, / и Пречи́стыя Богоро́дицы и Предте́чи Иоа́нна, / ко гро́бу его́ приходя́ще, прие́млют исцеле́ния, / тем человеколю́бное смотре́ние сла́вим / и мо́лим Тя, спаси́ нас, Го́споди.

Ми́лостивому Бо́гу / на земли́ подо́бен был еси́, о́тче Иоа́нне, / правове́рным смы́слом оста́вль оте́чество свое́ / и прии́де во град, я́ко в пусты́ню. / И я́ко ца́рскою багряни́цею и ви́ссом власяни́цею одея́вся, о́тче / и ве́нцем терпе́ния с пострада́вшими увя́зеся, / моли́ Христа́ Бо́га о всех нас.

О́тче Иоа́нне блаже́нне, / ко Христу́ ве́ру неблазне́нну име́я, чист по́мысл и любо́вь нелицеме́рну. / Терпе́нием же твои́м и смиренному́дрием / прича́стника тя невече́рней благода́ти, благоче́стно сла́вим.

Богоро́дичен: Роди́выйся от Де́вы, Христе́ Бо́же, / и мир просвети́вый от нетле́ния, / изба́ви и мене́, окая́ннаго, / Богоро́дицы ра́ди и всех святы́х Твои́х / от прегреше́ний мои́х.

Песнь 3.

Ирмо́с: Весели́тся о Тебе́ Це́рковь Твоя́:

Христа́ Бо́га в се́рдце свое́м восприя́л еси,́ о́тче Иоа́нне, / и Престо́ла Бо́жия дости́гл еси́, / Пресвяту́ю Тро́ицу непреста́нно зре́ти сподо́бился еси́. / Мо́лим тя, испроси́ пода́ти правосла́вным христиа́ном здра́вие, / на враги́ одоле́ние и ми́ру умире́ние, и благопло́дие, / и душа́м на́шим спасе́ние.

Име́я, о́тче Иоа́нне, ду́шу чи́сту и ми́лостиву, / и се́рдце бо́дро. / Тем вселе́ние во дворе́ ове́ц Христо́вых / и путь предочище́н обре́т к Пресвяте́й Тро́ице, / и к ве́чному Животу́ прибли́зился еси́, / и нас спаси́ моли́твами твои́ми. ́Пресвято́му Ду́ху на земли́ был еси́ жили́ще, блаже́нне Иоа́нне, / ны́не же на Небеси́ предстои́ши Го́сподеви. / Те́мже мо́лим тя, / и нас Свято́му Ду́ху дом соде́лай моли́твами твои́ми, / чту́щих тя.

Богоро́дичен: Роди́тельнице Безму́жная, / Ма́ти Христа́ Бо́га, Де́во Мари́е, / мо́лим Тя, Госпоже́, / спаси́ рабы́ Твоя́ от всех зол.

Седа́лен: Тве́рдаго адама́нта: (писан по 1-м стихословии).

Сла́ва, и ны́не, Богоро́дичен.

Песнь 4.

Ирмо́с: Вознесе́нна Тя ви́девши:

Лучеза́рными све́тлостьми Пресвяты́я Тро́ицы просия́л еси́, о́тче Иоа́нне, / я́ко ма́слина плодови́та в дому́ Бо́жии еле́ем трудо́в твои́х. / И ны́не в неизглаго́ланной ра́дости пребыва́я, / посеща́й нас моли́твами твои́ми, / чту́щих тя.

Богому́дре о́тче Иоа́нне, / чи́стая твоя́ душа́ с ли́ки святы́х на Небесе́х предстои́т Христу́ Бо́гу, ра́дуяся. / Те́мже мы святу́ю твою́ па́мять пе́сньми почита́ем / и мо́лим тя спасти́ся нам.

Житие́ твое́ на земли́, блаже́нне Иоа́нне, / я́ко со́лнце возсия́, / ны́не же, на Небесе́х предстоя́ Го́сподеви, мо́лишися за ны. / Зде же от гро́ба твоего́ чуде́с лучи́ исцеле́ния прие́млюще, / мо́лим тя: / просвети́ нас Невече́рним Све́том моли́твами твои́ми.

Богоро́дичен: Я́ко заче́нши Преве́чное из Безнача́льнаго Отца́ Сло́во, / пло́тию ро́ждши па́че сло́ва, Де́во Ма́ти, Преве́чнаго Бо́га. / Того́ моли́ спасти́ся рабо́м Твои́м.

Песнь 5.

Ирмо́с: Ты, Го́споди мой, Свет:

Свети́ло пресве́тлое от Бо́га возсия́л еси́, о́тче Иоа́нне, / в преимени́том гра́де Росто́ве / и в доброде́тельных све́тлостех, чудесы́ просия́л еси́. / Те́мже тя прославля́ем, па́мять твою́ почита́юще.

Яви́лся еси́ во гра́де Росто́ве земны́й А́нгел / и Небе́сный челове́к, / подава́я всем исто́чник благоче́стия и ми́лости, / да́руя по преставле́нии же душа́м на́шим спасе́ние и телесе́м исцеле́ние.

Ко́е похвале́ние принесе́м ти, честны́й о́тче Иоа́нне, / ви́дя и слы́ша блаже́нное твое́ житие́ и терпе́ние. / Я́ко и ны́не приходя́ще к тебе́ / прие́млем неоску́дно исцеле́ние и здра́вие, / и что ти возда́мы, не ве́мы, / но то́кмо глаго́лем: / ди́вен Бог во святы́х Свои́х, / творя́й чудеса́ Еди́н.

Богородичен: Всесвята́я Богоро́дице, / во вре́мя живота́ моего́ не оста́ви мене́, / челове́ческому предста́тельству не вве́ри мя, / но Сама́ заступи́ и поми́луй мя.

Песнь 6.

Ирмо́с: Пожру́ Ти со гла́сом:

Богому́дре и всеблаже́нне Иоа́нне, / смиренному́дрием, терпе́нием и по́двиги, возжеле́л еси́ Небе́снаго Ца́рствия. / Ны́не же, предстоя́ со все́ми святы́ми Царе́ви Си́лам, / моли́ за ны спасти́ся рабо́м Твои́м.

Бога́тства Небе́снаго возжела́л еси́, / земну́ю сла́ву и бога́тство ни во что́же вмени́в, обре́т Ца́рство Небе́сное, / нетле́нным и ве́чным бога́тством обогати́лся еси́, / и нас спаси́ моли́твами от всех зол.

Посо́бием и вселе́нием в тя Пресвята́го Ду́ха, о́тче Иоа́нне, / на земли́ терпе́нием побежда́я бесо́вския полки́, / обре́л еси́ вене́ц нетле́нный от Христа́ Бо́га и Спа́са душ на́ших. / Моли́ за ны спасти́ся рабо́м твои́м.

Богоро́дичен: Пое́м Тя, Де́во, Богома́ти Чи́стая, Мари́е, / па́че рождества́, Твое́ Богому́жное Рождество́ и нетле́нную чистоту́, / и́бо сочета́ся де́вство и Рождество́.

Конда́к, глас 8: Христо́вою любо́вию уязви́ся, о́тче Иоа́нне блаже́нне, / вы́шния красоты́ жела́я, / земна́я же вся презре́ и ни во что́же вмени́. / И на земли́ а́нгельское житие́ препроводи́, / в ве́чный поко́й дости́же, / иде́же глас пра́зднущих, / с ни́миже моли́ся за ны. / И душа́м на́шим проще́ние, / и телесе́м исцеле́ние да́руй.

Ин конда́к, глас 2: Христо́вою любо́вию уязви́ся о́тче Иоа́нне блаже́нне, / вы́шния красоты́ жела́я, / земна́я же вся презре́ и ни вочто́же вмени́, / и на земли́ а́нгельское житие́ име́я, / пресели́лся еси́ в ве́чный поко́й, / иде́же предстоя́ Христу́ Бо́гу / моли́ спасти́ся нам и всему́ христиа́нскому ро́ду я́ко да зове́м ти: / ра́дуйся преблаже́нне о́тче Иоа́нне.

И́кос: Ка́ко возмогу́ аз, окая́нный, воспе́ти равноа́нгелыюе житие́ твое́ на земли́: / целому́дрие, терпе́ние / и те́плыя е́же ко Христу́ любве́. / По отше́ствии же твое́м к Бо́гу, / с ве́рою приходя́щим ко гро́бу твоему́, подае́ши исцеле́ние. / И что ти принесе́м, но то́чию мо́лим тя и си́це вопие́м: / ра́дуйся, честны́й о́тче наш Иоа́нне блаже́нне. / Ты бо еси́ гра́ду на́шему похвала́ и утвержде́ние, / боля́щим исцеле́ние / и душа́м на́шим спасе́ние.

Песнь 7.

Ирмо́с: В пещи́ авра́амстии:

Све́тло сия́ющим / спаси́тельным бога́тством на земли́ обогати́лся еси́, блаже́нне о́тче Иоа́нне, / всели́лся в Боже́ственный град Росто́в / и причти́лся еси́ с ли́ки пра́ведных в ве́чное ра́дование. / Моли́ся за ны, пою́щих: / благослове́н Бог оте́ц на́ших.

Боже́ственными веле́нии и уче́нии одея́вся в смысл безстра́стный и моли́твенный, / вни́де во двор ове́ц Па́стыря Небе́снаго, / иде́же ли́ки святы́х веселя́ся пою́т: / благослове́н Бог оте́ц на́ших.

Ди́вен еси́ Бог наш, / я́ко и ко́сти на́ги де́йствуют в ми́ре чудеса́ и подаю́т исцеле́ния, / да благослови́м Го́спода пою́ще: благослове́н Бог оте́ц на́ших.

Богоро́дичен: Безневе́стная Чи́стая Браконеиску́сная Де́во, / Ма́ти Христа́ Бо́га, / моли́ Того́ о спасе́нии пою́щих: / благослове́н Бог оте́ц на́ших.

Песнь 8.

Ирмо́с: Ру́це распросте́р Дании́л:

Благи́м смиренному́дрием твои́м / ум свой простира́я к Вы́шнему, / Боже́ственным призыва́нием вни́де в ра́дость Го́спода своего́, / хваля́ и благословя́ Христа́ во ве́ки.

Мольба́ми твои́ми и благоду́шным терпе́нием, / ду́шу твою́ и те́ло очи́стив от вся́кия скве́рны, / обре́л еси́ ве́чный поко́й, / иде́же есть веселя́щихся и сла́вящих Христа́ во ве́ки.

После́довал еси́, о́тче, отце́м, Иоа́нне блаже́нне, / и́же Христа́ ра́ди на земли́ мно́ги ско́рби претерпе́вый / и Боже́ственная веле́ния вся соверши́вше. / Ты же тле́нная вся мудрова́ния от себе́ отве́ргл еси́, / тем Небе́сное Ца́рство насле́дова во ве́ки.

Богоро́дичен: Я́ко Цари́цу Царя́ всех Бо́га Ро́ждшую, / ве́рнии со Арха́нгелом Благослове́нную возвели́чим Ма́терь Бо́жию: / ра́дуйся, Ма́ти Творца́ тва́ри.

Песнь 9.

Ирмо́с: Ка́мень Нерукосе́чный:

Ра́нами и наруга́нием от бесо́в и лука́вых челове́к, / моли́твенным терпе́нием свои́м, / вра́жия полки́ побежда́я по́мощию Свята́го Ду́ха, / всели́лся еси́ к Невече́рнему Све́ту Бо́жия благода́ти. / Тем тя, хва́ляще, ублажа́ем.

Посреде́ ми́ра живы́й / и вся стре́лы лука́ваго диа́вола сокруши́в, / моли́твами твои́ми дости́гл еси́ го́рняго Иерусали́ма, / предстоя́ Христу́ Бо́гу за чту́щия тя.

Мо́лим тя, блаже́нне Иоа́нне, / моли́ Христа́ Бо́га, и Пречи́стую Богоро́дицу, / и Предте́чу Иоа́нна, и всех святы́х, / пода́ти правосла́вным христиа́ном здра́вие / и побе́ду на вся ви́димыя и неви́димыя враги́ / и жела́ние о исполне́нии соверше́нства во ве́ки веко́в.

Богоро́дичен: И́же нас ра́ди рожде́йся от Де́вы, Христе́ Бо́же, / и за ны распя́тся / и сме́ртию смерть разруши́вый, / моли́твами Богоро́дицы и всех святы́х, поми́луй и спаси́ нас.

Свети́лен: Процве́л еси́, я́ко фи́никс, Дави́дски, о́тче, / и оби́тель яви́лся еси́ Ду́ха Пресвята́го. / И сла́вна тя вселе́нней показа́, о нас непреста́нно моли́, / почита́ющих ве́рою пречестну́ю па́мять твою́, преподо́бне Иоа́нне.

Сла́ва, и ны́не, Богоро́дичен: От Бо́га ми́рови пода́нных благи́х, / Ты вина́ была́ еси́, Богоро́дице, / но и ны́не моли́ о о́бщем спасе́нии благопреме́ннаго Бо́га.

На хвали́тех стихи́ры, глас 4. Подо́бен: Дал еси́ зна́мение:

Дал еси́ притчу́ терпе́ния и му́жества, / Преблаги́й Го́споди, / пра́веднаго Иоа́нна и многочуде́снаго доброде́тельми, / и словесы́, и де́лы сия́юща, / целому́дрием украша́ема и кро́тостию. / Тем твое́ неизрече́нное строе́ние сла́вим, / Иису́се Всеси́льне и Спа́се душ на́ших.

Пра́веден и незло́бив, / и́стинен же и непоро́чен и ве́рен, / уклоня́лся от вся́кия зло́бныя ве́щи, / показа́лся еси́, Иоа́нне блаже́нне, / просвеще́н доброде́тельми и благоче́стием сия́я. / Тем тя ублажа́ем / и свято́е твое́ и честно́е днесь пра́зднуем успе́ние, / ра́дующеся, Богому́дре.

Целому́дрием и благове́рием, / я́ко багряни́цею многоце́нною одея́вся, Иоа́нне. / Пра́вдою же и кро́тостию, я́ко Боже́ственным венце́м увя́злся еси́, / со стра́ждущими Христа́ ра́ди ца́рствовати возжеле́л еси́. / И ны́не Царю́ сил предстои́ши, / Иису́су Всеми́лостивому и Спа́су душ на́ших.

Сла́ва, глас 2: Преподо́бне о́тче, / из младе́нства доброде́тели приле́жно обучи́вся, / орга́н был еси́ Свята́го Ду́ха, / и от него́ прии́м чуде́с де́йство. / И увеща́л еси́ челове́ки преоби́дети сла́дкая. / Ны́не же Боже́ственным Све́том чисте́йше осиява́ем, / просвети́ и на́ша мы́сли, Иоа́нне, о́тче наш.

И ны́не, Богоро́дичен: Все упова́ние мое́ на Тя возлага́ю, / Ма́ти Бо́жия, / сохрани́ мя под кро́вом Твои́м.

Славосло́вие вели́кое и отпу́ст.

На литурги́и: Блаже́нны, свята́го от кано́на, пе́сни 3 и 6.

Проки́мен, глас 7: Честна́ пред Го́сподем смерть преподо́бных Его́.

Стих: Что возда́м Го́сподеви о всех, я́же воздаде́ ми?

Апо́стол к Гала́том, зача́ло 213.

Аллилу́иа. Блаже́н муж боя́йся Го́спода:

Стих: Си́льно на земли́ бу́дет се́мя Его́:

Ева́нгелие от Матфе́а, зача́ло 10.

Прича́стен: В па́мять ве́чную бу́дет пра́ведник: